ରସିକ ନାଗର ଥିଲେ ରମେଶ ସ୍ୱାଇଁ । ୧୪ ନୁହେଁ ୧୭ ଜଣଙ୍କୁ ସ୍ତ୍ରୀ କରି ସେମାନଙ୍କ ଟଙ୍କାରେ ମଉଜ ମଜଲିସ କରୁଥିଲେ । । ଆଗକୁ ଏହି ତାଲିକା ଲମ୍ୱିବ ବୋଲି ପୁଲିସ୍‌ ଅନୁମାନ କରୁଛି। ସେପଟେ ଆଜି ସାମ୍ନାକୁ ଆସିଥିବା ମହିଳାଙ୍କ ଭିତରେ ଗୌହାଟିର ଜଣେ ଡାକ୍ତର ଥିବା ବେଳେ ଛତିଶଗଡ଼ର ଅନ୍ୟ ଜଣେ ଚାଟାର୍ଡ ଆକାଉଣ୍ଟାଣ୍ଟ ଓ ଜଣେ ଉଚ୍ଚଶିକ୍ଷିତା ଅଛନ୍ତି। ତେବେ ରମେଶଙ୍କ ଏଭଳି କଳା କାରନାମା ସାମ୍ନାକୁ ଆସିବା ପରେ ପୁଲିସ ଖୋଳତାଡରେ ଲାଗିପଡିଛି । ଏନେଇ ଏକ ସ୍ୱତନ୍ତ୍ର ଟିମ୍‌ ଗଠନ ହୋଇଛି । ଏହି ଟିମ୍‌ରେ ମହିଳା ଥାନା ଆଇଆଇସିଙ୍କ ସହ ୨ଜଣ ସବ୍‌ ଇନସପେକ୍ଟର , ଜଣେ ଏନ୍‌ଜିଓ କାଉନ୍‌ସିଲର ରହିଛନ୍ତି । ଅନେକ ମହିଳା କେସ୍‌ ସଂପର୍କରେ ଜାଣିବାକୁ ଫୋନ୍‌ କରିଛନ୍ତି । ସେମାନଙ୍କ ସହ ଯୋଗଯୋଗ କରି ତଦନ୍ତ ହେବ ।

କେନ୍ଦ୍ରାପଡ଼ା ଜିଲ୍ଲା ପାଟକୁରା ଅଞ୍ଚଳର ରମେଶ ସ୍ୱାଇଁ। ସେ ନିଜକୁ ଡାକ୍ତର ପରିଚୟ ଦେଇ ଜଣଙ୍କ ପରେ ଜଣେ ମହିଳାଙ୍କୁ ବିବାହ କରିବା ସହ ଅତି ଚତୁରତାରେ ସେମାନଙ୍କୁ ଲୁଟୁଥିଲା। ମାଟ୍ରିମୋନିଆଲ୍‌ ସାଇଟ୍‌ରେ ଭିନ୍ନ ଭିନ୍ନ ନାଁରେ ଆଇଡି ଖୋଲି ମିଠା ମିଠା ଚାର୍ଟିଂ କରି ମହିଳାମାନଙ୍କ ସଂସ୍ପର୍ଶରେ ଆସିଥିଲା। ଏହା ପରେ ବିଧିବଦ୍ଧ ବିବାହ କରୁଥିଲା। ଯାହାଫଳରେ କେହି ତାକୁ ସନ୍ଦେହ କରୁନଥିଲେ।

ସେହିପରି ଜଗତସିଂହପୁର ଜଣେ ବ୍ୟକ୍ତିଙ୍କ ଠାରୁ ଗତ କିଛି ମାସ ଭିତରେ ଏମ୍‌ବିବିଏସ୍‌ କରିଦେବେ କହି ୧୮ ଲକ୍ଷ ଟଙ୍କା ଠକିଥିବା ଅଭିଯୋଗ ଆସିଛି । ଗତବର୍ଷ ପାତ୍ରପଡାରେ ନକଲି ପରିଚୟ ଦେଇ ଭଡାରେ ରହୁଥିବା ନେଇ ମହିଳା ଥାନାରେ ଏକ ମାମଲା ରହିଛି । ଏବେ ରମେଶଙ୍କୁ ରିମାଣ୍ଡରେ ଅଣାଯିବ । ରିମାଣ୍ଡ ସମୟରେ ଆହୁରୀ ଅନେକ ତଥ୍ୟ ପୋଲିସ ହାତରେ ଲାଗିବ ବୋଲି ଭୁବନେଶ୍ୱର ଡିସିପି ଉମାଶଙ୍କର ଦାସ ସୂଚନା ଦେଇଛନ୍ତି ।

ପୁଲିସ୍‌ ଦେଇଥିବା ତଥ୍ୟ ଅନୁଯାୟୀ ୧୯୮୨ରେ ରମେଶ ପ୍ରଥମ ବିବାହ କରିଥିଲା। ପ୍ରଥମ ପତ୍ନୀଙ୍କଠାରୁ ୩ ପିଲା ଅଛନ୍ତି। ୨୦୦୨ ମସିହାରେ ସେ ଦ୍ୱିତୀୟ ବିବାହ କରିଥିଲା। ତାଙ୍କର ମଧ୍ୟ ଦୁଇ ପିଲା ଅଛନ୍ତି। ତେବେ ତା’ ପରେ ସେ ଆଉ ୧୫ ମହିଳାଙ୍କୁ ବିବାହ କରିବା ସହ ସେମାନଙ୍କ ଅର୍ଥରେ ଅୟସ୍‌ କରୁଥିଲା। ସେ ଓଡ଼ିଶାରୁ ୩, ଦିଲ୍ଲୀର ୨, ମଧ୍ୟପ୍ରଦେଶ ଜବଲପୁରର ୨, ପଞ୍ଜାବ, ଆସାମ, ଛତିଶଗଡ଼, ଝାଡଖଣ୍ଡ ଭଳି ରାଜ୍ୟରେ ୧୪ ମହିଳାଙ୍କୁ ମିଛ ବିବାହ କରିଥିଲା। ଏବେ ଆଉ ୩ଟି ମିଛ ବିବାହର ଖବର ସାମ୍ନାକୁ ଆସିଛି। ତେବେ ରମେଶ ବିବାହ କରିନଥିବା କିମ୍ବା ଛାଡପତ୍ର ହୋଇଯାଇଥିବା ସମ୍ଭ୍ରାନ୍ତ ଓ ମଧ୍ୟମ ବୟସ୍କା ମହିଳାଙ୍କୁ ଟାର୍ଗେଟ କରୁଥିଲା।

Powered by Froala Editor