ବଡ ପରଦାରେ ଆସିବ ସମସ୍ତଙ୍କ ପ୍ରିୟ ‘ଶକ୍ତିମାନ’ ।  ୯୦ ଦଶକରେ ସମସ୍ତଙ୍କ ପ୍ରଥମ ପସନ୍ଦ ସାଜିଥିବା ସୁପର ହିରୋ ଶକ୍ତିମାନ ନୂଆ ଅନ୍ଦାଜରେ ଆସିବ ।  ସୋନୀ ପିକଚର୍ସ ଏ ନେଇ ବିଧିବଦ୍ଧ ଭାବେ ଘୋଷଣା କରିଛି ।  ସବୁଠୁ ବଡ କଥା ହେଲା ‘ଶକ୍ତିମାନ୍’ ଧାରାବାହିକର ନିର୍ମାତା ମୁକେଶ ଖାନ୍ନାଙ୍କ ପ୍ରଡକ୍ସନ ହାଉସ୍ ଭୀଷ୍ମ ଇଣ୍ଟରନେସନାଲ୍ ସହ ସନି ପିକ୍ଚର୍ସ୍ ହାତ ମିଳାଇଛି ବୋଲି ଘୋଷଣା କରିଛି। ଭୀଷ୍ମ ଇଣ୍ଟରନେସନାଲ ସହ ବ୍ରିଉଇଂ ଥଟ୍ସ୍ ପ୍ରାଇଭେଟ୍ ଲିମିଟେଡ୍ ସହ ମଧ୍ୟ ଏହି ଚଳଚ୍ଚିତ୍ର ପାଇଁ ସନି ପିକ୍ଚର୍ସ୍ ହାତ ମିଳାଇଛି।

ଗୁରୁବାର ‘ଶକ୍ତିମାନ୍’ ଚଳଚ୍ଚିତ୍ର ନିର୍ମାଣ ହେବ ବୋଲି ଘୋଷଣା କରାଯିବା ପରେ ଟ୍ଵିଟରରେ ହ୍ୟାଜ୍-ଟ୍ୟାଗ୍ ଶକ୍ତିମାନ୍ ଟ୍ରେଣ୍ଡ୍ କରିଥିଲା। କିଛି ଲୋକ ଅତ୍ୟନ୍ତ ଉତ୍ସାହିତ ହୋଇଯାଇଥିବା ବେଳେ କିଛି ଲୋକ ପୁରୁଣା ‘ଶକ୍ତିମାନ୍’ କଥା ମନେ ପକାଇ ଭାବୁକ ହୋଇଯାଇଥିଲେ।

‘ଶକ୍ତିମାନ’ ଚଳଚ୍ଚିତ୍ର ଆସିବ ବୋଲି ଘୋଷଣା ହୋଇଥିବା ବେଳେ ଏଥିରେ କେଉଁମାନେ ଅଭିନୟ କରିବେ ତା ବିଷୟରେ ସୋନୀ ପିକ୍ଚର୍ସ୍ ଘୋଷଣା କରିନାହିଁ। ସୁପର ହିରୋର ଭୂମିକା କିଏ କରିବ ସେ ନେଇ କୌଣସି ତଥ୍ୟ ମିଳିନାହିଁ । ଜଣେ ଲୋକପ୍ରିୟ ହିରୋ ଏବଂ ପ୍ରତିଷ୍ଠିତ ନିର୍ଦ୍ଦେଶକ ଏହାର ନିର୍ଦ୍ଦେଶନା ଭାର ସମ୍ଭାଳିବେ । ଖୁବଶୀଘ୍ର କଳାକାର ଚୟନ କରାଯିବ ବୋଲି ସୋନୀ ପିକଚର୍ସ ପକ୍ଷରୁ କୁହାଯାଇଛି । ତେଣୁ ସୋସିଆଲ ମିଡିଆରେ କିଏ ‘ଶକ୍ତିମାନ’ ଚଳଚ୍ଚିତ୍ରରେ ଅଭିନୟ କଲେ ସବୁଠୁ ଭଲ ହେବ ତା ନେଇ ଚର୍ଚ୍ଚା ଚାଲିଥିଲା। କିଛି ଲୋକ ଅକ୍ଷୟ କୁମାର ଶକ୍ତିମାନର ଚରିତ୍ର ସହ ସବୁଠୁ ଭଲ ମାନିବେ ବୋଲି କହିଥିଲେ।

Powered by Froala Editor