‘ବୁଲ୍ଲିବାଈ ଆପ୍’ ତିଆରି କରିଥିବା ଯୁବକ ଗିରଫ
ଜିଟ୍ହବ୍ରେ ବୁଲ୍ଲିବାଈ ଆପ୍ ଜରିଆରେ ମୁସ୍ଲିମ୍ ମହିଳାଙ୍କ ପ୍ରତି ଅଶ୍ଳୀଳ ମନ୍ତବ୍ୟ ଓ ନିଲାମ ଡାକିବା ଘଟଣାରେ ଦିଲ୍ଲୀ ପୁଲିସ ନୀରଜ ବିଷ୍ଣୋଇ ନାମକ ଜଣେ ଯୁବକକୁ ଆସାମରୁ ଗିରଫ କରିଛି। କୁହାଯାଉଛି ଗିରଫ ଯୁବକ ଜଣକ ହିଁ ଏହି ଆପ୍ର କ୍ରିଏଟର। ନୀରଜ ହେଉଛନ୍ତି ଭୋପାଳସ୍ଥିତ ‘ଭେଲୋର୍ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି’ରେ ଦ୍ବିତୀୟ ବାର୍ଷିକ ବି.ଟେକ୍ ଛାତ୍ର। ତାଙ୍କ ଘର ଆସାମର ଦିଗମ୍ବର ଜୋରହାଟରେ। ନୀରଜ ‘ଆପ୍’ ତିଆରି କରିଥିବା ଉପକରଣଟିକୁ ମଧ୍ୟ ପୁଲିସ ତାଙ୍କ ଘରୁ ଜବତ କରିଛି।
ମୁଖ୍ୟ ଅଭିଯୁକ୍ତା ୧୮ ବର୍ଷୀୟ ଶ୍ବେତା ସିଂହଙ୍କ ସମେତ ମୁମ୍ବାଇ ପୁଲିସ ପୂର୍ବରୁ ଏହି ମାମଲାରେ ୩ଜଣଙ୍କୁ ଗିରଫ କରିସାରିଛି। ଶ୍ୱେତା ସିଂହଙ୍କୁ ଉତ୍ତରାଖଣ୍ଡରୁ ଓ ୨୧ ବର୍ଷୀୟ ଇଞ୍ଜିନିୟରିଂ ଛାତ୍ର ବିଶାଲ କୁମାର ଝାଙ୍କୁ ବେଙ୍ଗାଲୁରୁରୁ ଗିରଫ କରିଥିଲା। ବୁଧବାର ସକାଳେ ଆଉ ଜଣେ ଅଭିଯୁକ୍ତ ୨୧ ବର୍ଷୀୟ ମାୟାଙ୍କ ରାୱଲଙ୍କୁ ଗିରଫ କରିଥିଲା ପୁଲିସ। ଶ୍ୱେତା ଏଭଳି ତିନୋଟି ଆପର ଆକାଉଣ୍ଟକୁ ହ୍ୟାଣ୍ଡେଲ କରୁଥିଲେ। ପୂର୍ବରୁ ଅଭିଯୁକ୍ତମାନେ ୱାଟ୍ସ ମାଧ୍ୟମରେ କଣ୍ଟେଣ୍ଟ ପୋଷ୍ଟ କରୁଥିଲେ, ପରେ ସେମାନେ ମୂଳ ଆକାଉଣ୍ଟରୁ ପୋଷ୍ଟ କରିବା ଆରମ୍ଭ କରିଥିଲେ।
ସୂଚନା ଅନୁଯାୟୀ, ମୁସଲିମ ମହିଳାଙ୍କୁ ଟାର୍ଗେଟ କରିବା ପାଇଁ ‘ବୁଲ୍ଲି ବାଈ’ ନାମରେ ଏକ ଆପ ତିଆରି କରାଯାଇ ଏଥିରେ ପ୍ରତିଷ୍ଠିତ ମୁସଲିମ ମହିଳାଙ୍କ ବିକୃତ ଫଟୋ ଅପଲୋଡ କରାଯାଇଛି। ସୁଲ୍ଲି ଡିଲସ୍ ଓ ଜିଟ୍ହଭ ଭଳି ଗ୍ରୁପ୍ ତିଆରି କରାଯାଇ ସୋଶାଲ ମିଡିଆରୁ ମୁସଲିମ ମହିଳାଙ୍କ ଫଟୋ ସଂଗ୍ରହ କରାଯାଉଛି। ପରେ ବୁଲ୍ଲି ବାଈରେ ଅପଲୋଡ କରାଯାଉଛି। ବିବାଦ ପରେ ଉକ୍ତ ଆପ୍କୁ ବ୍ୟାନ୍ କରାଯାଇଛି।
Powered by Froala Editor
