ମାଲକାନଗିରି: କମ୍ବିଂ ବେଳେ ଯବାନଙ୍କୁ ମିଳିଛି ବଡ଼ ସଫଳତା । ଆନ୍ଧ୍ର-ଓଡ଼ିଶା ସୀମାରେ ଗିରଫ ହୋଇଛନ୍ତି ୩ ହାର୍ଡକୋର୍ ମହିଳା ମାଓବାଦୀ । ସେମାନେ ହେଲେ ରାମେ, ଦେବୀ, ଓ ସଂଗୀତା । ରାମେ ନାଁ'ରେ ୪ ଲକ୍ଷ ଟଙ୍କା ପୁରସ୍କାର ରାଶି ଥିବାବେଳେ ଦେବୀ ଓ ସଂଗୀତା ନାଁରେ ୧ ଲକ୍ଷ ଟଙ୍କାର ପୁରସ୍କାର ରାଶି ରହିଛି ।

ଆନ୍ଧ୍ର-ଓଡିଶା ସୀମାରେ କମ୍ବିଂ ସମୟରେ ସୁରକ୍ଷା ବାହିନୀଙ୍କ ହାବୁଡ ପଡିଥିଲେ ଏହି ତିନି ମିହିଳା ମାଓ କ୍ୟାଡ଼ର । ସୁରକ୍ଷା ବାହିନୀଙ୍କୁ ଦେଖି ଖସି ପଳେଇବାକୁ ଚେଷ୍ଟା କରୁଥିବା ବେଳେ, ସେମାନଙ୍କୁ ଗିରଫ କରିବାରେ ସଫଳ ହୋଇଥିଲେ ଆନ୍ଧ୍ର ଗ୍ରେହାଉଣ୍ଡ ଯବାନ ।

ଅନ୍ୟପଟେ ଆନ୍ଧ୍ର ଓଡିଶା ଡିଭିଜନ ମାଓ ସଙ୍ଗଠନ ପୁଣି ଏକ ଚିଠି ଜାରି କରିଛି । ଏଥିରେ ଉଲ୍ଲେଖ କରାଯାଇଛି ଯେ, ନୀରିହ ଲୋକଙ୍କୁ ଗିରଫ କରି ସେମାନଙ୍କ ଉପରେ ଅତ୍ୟାଚାର କରାଯାଉଛି । ପୂର୍ବରୁ ଯେଉଁ ନକ୍ସଲମାନେ ପୁଲିସ୍‌ ପାଖେ ନିଜେ ଆତ୍ମସମର୍ପଣ କରିଥିଲେ, ସେମାନେ ବର୍ତ୍ତମାନ ପୁଲିସର କାର୍ଯ୍ୟ କରୁଛନ୍ତି ।

ସେମାନଙ୍କ ନାଁରେ ମିଥ୍ୟା କେଶ କରି ଜେଲ ପଠାଉଛନ୍ତି । ଏଭଳି ଅତ୍ୟାଚାରକୁ ବନ୍ଦ କରାଯାଉ । ନଚେତ, ଏହା ଉପରେ ରାଜନୈତିକ ଦଳ ହସ୍ତକ୍ଷେପ କରି ଯଥା ଶୀଘ୍ର ଏହାକୁ ରୋକିବାକୁ ଚିଠିରେ ଉଲ୍ଲେଖ କରାଯାଇଛି । ଯଦି ଏଥିପ୍ରତି ଦୃଷ୍ଟି ଦିଆନଯାଏ ତେବେ, ପୂର୍ବତନ ବିଧାୟକଙ୍କୁ ଯେଉଁଭଳି ହତ୍ୟା କରାଗଲା, ସେହିଭଳି ଘଟଣାର ପୁନାରବୃତ୍ତି ହେବ ବୋଲି ଚିଠିରେ ଚେତାବନୀ ଦିଆଯାଇଛି ।

ସୂଚନାଯୋଗ୍ୟ, ବର୍ତ୍ତମାନ ନକ୍ସଲଙ୍କ ପିଏଲ୍‌ଜିଏ ସପ୍ତାହ ଚାଲିଛି । ଏହି ସମୟରେ ବିଭିନ୍ନ ମାଓ ସଂଗଠନ ଅନେକ ହିଂସାକାଣ୍ଡ କରନ୍ତି । ସେଥିପାଇଁ ଏବେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି । ସୀମାରେ ଗାଡ଼ି ମୋଟର ଯାଞ୍ଚ କରାଯାଉଛି । ସେପଟେ ଜଙ୍ଗଲରେ କମ୍ବିଂ ଅପରେସନ୍‌କୁ ଜୋରଦାର୍ କରାଯାଇଛି । ଏହି ସମୟରେ ୩ ମାଓବାଦୀଙ୍କୁ ଗିରଫ କରାଯିବା ଯବାନଙ୍କ ମନ ବଳକୁ ଆହୁରି ବଢ଼ାଇଛି ବୋଲି ଜଣେ ବରିଷ୍ଠ ପୁଲିସ୍ ଅଧିକାରୀ କହିଛନ୍ତି ।

Powered by Froala Editor