ନାଗାଲାଣ୍ଡର ସୁଖୋଇ ଅଞ୍ଚଳରେ ଆସାମ ରାଇଫଲ୍ସର ଏକ କାଫିଲା ନିକଟରେ ସନ୍ଦିଗ୍ଧ ଇମ୍ପ୍ରୋଭାଇଜ୍ଡ ଏକ୍ସପ୍ଲୋସିଭ୍ ଡିଭାଇସ୍ (IED) ବିସ୍ଫୋରଣ ହୋଇଥିବାର ସୂଚନା ମିଳିଛି। ବିସ୍ଫୋରଣରେ ଜଣେ ସୈନିକଙ୍କ ମୃତ୍ୟୁ ଘଟିଛି ଏବଂ ୪ ଜଣ ଆହତ ହୋଇଛନ୍ତି। ନାଗାଲାଣ୍ଡର ଚୁମୌକେଡିମା ଅଞ୍ଚଳରେ ଏହି ବିସ୍ଫୋରଣ ଘଟିଛି। ଏହି ଘଟଣା ପରେ, ସମଗ୍ର ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।

ଆସାମ ରାଇଫଲ୍ସର ଏକ କାଫିଲା ନିୟମିତ ପାଟ୍ରୋଲିଂରେ ଥିବା ସମୟରେ ଏକ ଘାଟି ରାସ୍ତା କଡ଼ରେ ଥିବା ଆଇଇଡି ବିସ୍ଫୋରଣ ହୋଇଥିଲା। ଏହି ଘଟଣାଟି ନାଗାଲାଣ୍ଡର ଚୁମୌକେଡିମା ଅଞ୍ଚଳରେ ଘଟିଛି, ଯାହାକୁ ଏକ ସୁରକ୍ଷା-ସମ୍ବେଦନଶୀଳ ଅଞ୍ଚଳ ଭାବରେ ବିବେଚନା କରାଯାଏ।

ବିସ୍ଫୋରକ ଘଟଣା ପରେ, ସୁରକ୍ଷା ବାହିନୀ ସମଗ୍ର ଅଞ୍ଚଳକୁ ଘେରାବନ୍ଦୀ କରିଛନ୍ତି ଏବଂ ଆକ୍ରମଣ ପଛରେ ଥିବା ଲୋକଙ୍କୁ ଖୋଜିବା ପାଇଁ ଏକ ବ୍ୟାପକ ତଲାସୀ ଅଭିଯାନ ଆରମ୍ଭ କରିଛନ୍ତି। ସୁରକ୍ଷା ସଂସ୍ଥା ଗୁଡ଼ିକ ଆକ୍ରମଣ ଯୋଜନା କିଏ କରିଥିଲା ଏବଂ ଅନ୍ୟ କିଏ ଏଥିରେ ସାମିଲ ଥିଲା ତାହା ନିର୍ଣ୍ଣୟ କରିବା ପାଇଁ ଆଖପାଖ ଅଞ୍ଚଳ ଗୁଡ଼ିକର ମଧ୍ୟ ତଦନ୍ତ କରୁଛନ୍ତି।

ଉତ୍ତର-ପୂର୍ବ ସୀମାରେ ଏକ ସପ୍ତାହ ମଧ୍ୟରେ ଆସାମ ରାଇଫଲ୍ସ ଉପରେ ଏହା ଦ୍ୱିତୀୟ ବଡ଼ ଆକ୍ରମଣ। ଏହା ପୂର୍ବରୁ ଗତ ଜୁଲାଇ ୬ ତାରିଖରେ ମଣିପୁରର ଉଖରୁଲ ଜିଲ୍ଲାରେ ମଧ୍ୟ ଏକ ସେନା କନଭୟ ଉପରେ ଆମ୍ବୁସ କରାଯାଇଥିଲା। ସେହି ଆକ୍ରମଣରେ ୪୦ତମ ବାଟାଲିୟନର ୱାରେଣ୍ଟ ଅଫିସର ବଲୱନ୍ତ ସିଂ ଏବଂ ରାଇଫଲମ୍ୟାନ୍ ସିଏମ୍ ସିଂ ସହୀଦ ହୋଇଥିଲେ। ସେହିପରି ଗତ ନଭେମ୍ବର ମାସରେ ମଧ୍ୟ ଭାରତ-ମିଆଁମାର ସୀମାନ୍ତ ତେଙ୍ଗନୌପାଲ ଜିଲ୍ଲାରେ ପାଟ୍ରୋଲିଂ କରୁଥିବା ଯବାନଙ୍କ ଉପରକୁ ଆତଙ୍କବାଦୀମାନେ ଗୁଳି ଚଳାଇଥିଲେ, ଯେଉଁଥିରେ ୪ ଜଣ ଯବାନ ଆହତ ହୋଇଥିଲେ।

Powered by Froala Editor