ରାଜ କୁନ୍ଦ୍ରାଙ୍କ ଖୋଲୁଛି ଗୁମର; ଅଫିସରୁ ମିଳିଲା ଗୁପ୍ତ ଲକର୍
ମୁମ୍ବାଇ: ରାଜ କୁନ୍ଦ୍ରାଙ୍କ ବିରୋଧରେ ପ୍ରମାଣ ଯୋଗାଡ଼ରେ ଲାଗି ପଡ଼ିଛି ମୁମ୍ବାଇ ପୁଲିସ୍ର କ୍ରାଇମ୍ବ୍ରାଞ୍ଚ । ପତ୍ନୀ ଶିଳ୍ପୀ ସେଟ୍ଟୀଙ୍କୁ ବାରମ୍ବାର ଜେରା କରିବା ସହିତ ରାଜଙ୍କ ଅଫିସ୍ ଓ ଘରେ ଚଢ଼ଉ ଜାରି ରଖିଛି । ଇତିମଧ୍ୟରେ ଆସିଛି ଏକ ଚାଞ୍ଚଲ୍ୟକର ଖବର । ରାଜଙ୍କ ଅଫିସରୁ ମିଳିଛି ଗୁପ୍ତ ଲକର୍ । ଅନ୍ଧେରୀସ୍ଥିତ ଭିଆନ୍ ଇଣ୍ଡଷ୍ଟ୍ରୀ ଏବଂ ଜେଲ୍ ଷ୍ଟ୍ରିମ୍ ଅଫିସରୁ ଏହି ସୁରାକ୍ କ୍ରାଇମ୍ବ୍ରାଞ୍ଚ ହାତରେ ଲାଗିଛି । କେବଳ ସେତିକି ନୁହେଁ, ଏଥିରୁ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ ହୋଇଥିବା ଜଣାପଡ଼ିଛି । ଯାହାକି ରାଜଙ୍କ ବିରୋଧରେ ଚାଲିଥିବା ମାମଲାକୁ ଅଧିକ ବଳିଷ୍ଠ କରିବ ବୋଲି ଜଣେ ତଦନ୍ତକାରୀ ଅଫିସ୍ର କହିଛନ୍ତି ।
ଏହି ଲକରକୁ ଅଫିସରେ ଲୁଚାଇ ରଖାଯାଇଥିଲା । ଏଥିରେ ବ୍ୟବସାୟ, କ୍ରିପ୍ଟୋକରେନ୍ସି ସହିତ ଜଡିତ ଅନେକ ଡକ୍ୟୁମେଣ୍ଟ ରହିଛି । ବର୍ତମାନ କ୍ରାଇମବ୍ରାଞ୍ଚ ସେସବୁ ଯାଞ୍ଚ କରିବା ସହ ଅଧିକ ତଦନ୍ତ କରୁଛି । ସେପଟେ ପତ୍ନୀ ଶିଳ୍ପା ସେଟ୍ଟୀଙ୍କୁ ପଚରାଉଚରା ଚଳାଉଛି । କ୍ରାଇମବ୍ରାଞ୍ଚ ସନ୍ଦେହ କରୁଛି ଯେ ରାଜ କୁନ୍ଦ୍ରା କ୍ରିକେଟ୍ ବେଟିଂ ଏବଂ କ୍ରିପ୍ଟୋକରେନ୍ସିରେ ବିନିଯୋଗ କରିଥିବା ଟଙ୍କା ଅଶ୍ଳୀଳ ଚଳଚ୍ଚିତ୍ର ନିର୍ମାଣରୁ ଉତ୍ପାଜନ କରିଛନ୍ତି ।
ସେପଟେ ରାଜ କୁନ୍ଦ୍ରା ଜେଲ୍ରୁ ମୁକୁଳିବା ପଇଁ ବମ୍ବେ ହାଇକୋର୍ଟରେ ଜାମିନ ଆବେଦନ କରିଛନ୍ତି । ସୋମବାର ଏହାର ଶୁଣାଣି ଅଛି । ପର୍ଣ୍ଣ ଭିଡିଓ ତିଆରି ମାମଲାରେ ରାଜ କୁନ୍ଦ୍ରାଙ୍କୁ ଜୁଲାଇ ୧୯ ତାରିଖରେ ମୁମ୍ବାଇ ପୁଲିସ ଗିରଫ କରିଥିଲା । ତାଙ୍କୁ ୨୭ ତାରିଖ ଯାଏଁ ପୁଲିସ ହେପାଜତରେ ରଖାଯାଇଛି । ସେପଟେ ରାଜ ତାଙ୍କ ବିରୋଧରେ ଆସିଥିବା ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି । ସମୟ ଆସିଲେ ସେ କୋର୍ଟରେ ସବୁ କିଛି ପ୍ରମାଣ ଦାଖଲ କରିବେ ବୋଲି କହିଛନ୍ତି ।
Powered by Froala Editor
