ଭୁବନେଶ୍ବର: ସୁଭଦ୍ରା ଯୋଜନାରେ ତୃତୀୟ ପର୍ଯ୍ୟାୟରୁ ବଞ୍ଚିତ ୨ ଲକ୍ଷ ୮୫ ହଜାର ହିତାଧିକାରୀଙ୍କୁ ପୁଣି ଯୋଜନାରେ ସାମିଲ ପାଇଁ ଦ୍ବାର ଦ୍ବାର ଯାଇ ସର୍ବେକ୍ଷଣ କରାଯିବ। ସୁଭଦ୍ରା ଯୋଜନାର ସମୀକ୍ଷା ପରେ ଉପ-ମୁଖ୍ୟମନ୍ତ୍ରୀ ତଥା ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ପ୍ରଭାତୀ ପରିଡ଼ା ଏହା କହିଛନ୍ତି। ବୁଧବାର ମହିଳା ଓ ଶିଶୁ ବିକାଶ ସମ୍ମିଳନୀ କକ୍ଷରେ ଅନୁଷ୍ଠିତ ସମୀକ୍ଷା ବୈଠକ ପରେ ଶ୍ରୀମତୀ ପରିଡ଼ା କହିଥିଲେ, ତୃତୀୟ ପର୍ଯ୍ୟାୟରେ ବଞ୍ଚିତ ୨ ଲକ୍ଷ ୮୫ ହଜାର ହିତାଧିକାରୀଙ୍କୁ ସାମିଲ ପାଇଁ ପୁଣି ସର୍ବେକ୍ଷଣ କରାଯିବ। ଅଧିକାରୀମାନେ ଆଗାମୀ ୧୫ଦିନ ଭିତରେ କ୍ଷେତ୍ରକୁ ଯାଇ ତଦନ୍ତ ରିପୋର୍ଟ ଦେବେ। ଏଥିପାଇଁ ଦୁଇଦିନ ଭିତରେ ଅଭିଯୋଗ ପୋର୍ଟାଲ ଖୋଲିବ।

ବାଦ୍ ପଡ଼ିଥିବା ହିତାଧିକାରୀ ପୋର୍ଟାଲରେ ଅଭିଯୋଗ କରି ଆଉଥରେ ସାମିଲ ପାଇଁ ଆବେଦନ କରି ପାରିବେ। ୧୫ ହଜାର ୯୮୪ଜଣ ମୃତ ହିତାଧିକାରୀ ବାଦ୍‌ ପଡ଼ିଥିବାବେଳେ ୧୮୦୫ ଜଣ ଜୀବିତ ଅଛନ୍ତି ବୋଲି ସ୍ବାସ୍ଥ୍ୟ ବିଭାଗ ରିପୋର୍ଟରୁ ସ୍ପଷ୍ଟ ହୋଇଛି। ୩୬, ୭୦୨ ହିତାଧିକାରୀ ଚାରି ଚକିଆ ଗାଡ଼ି ଥିବା ଯୋଗୁଁ ବାଦ୍ ପଡ଼ିଛନ୍ତି। ପରିବହନ ବିଭାଗ ପକ୍ଷରୁ ଦିଆଯାଇଥିବା ରିପୋର୍ଟରୁ ଏହା ଜଣାପଡ଼ିଛି। ୨୧ ହଜାର ୩୫ଜଣ ହିତାଧିକାରୀ ଆୟକର ଦାଖଲରୁ ବାଦ୍ ପଡ଼ିଥିବା ବେଳେ ୧ ଲକ୍ଷ ୩୩ ହଜାର ୬୯୧ ଜଣ ଧାନ ବିକ୍ରି ପଞ୍ଜୀକରଣ ଏବଂ କୃଷକ ଭାବେ ପଞ୍ଜୀକରଣ କରି ଯୋଜନାରୁ ବାଦ୍ ପଡ଼ିଛନ୍ତି। ବୟସାଧିକ ହିତାଧିକାରୀଙ୍କ ଆଧାରକୁ ପୁନର୍ବାର ଯାଞ୍ଚ କରିବା ପରେ ବାଦ୍ ପଡ଼ିଥିବା ଯୋଗ୍ୟ ମହିଳାଙ୍କୁ ସୁଭଦ୍ରାରେ ସାମିଲ କରାଯିବ।

ବୈଠକରେ ମହିଳା ଓ ଶିଶୁ ବିକାଶ ବିଭାଗର ପ୍ରମୁଖ ଶାସନ ସଚିବ ଶୁଭା ଶର୍ମା, ନିର୍ଦେଶିକା ମୋନିଷା ବାନାର୍ଜୀ, ବାଣିଜ୍ୟ ଓ ପରିବହନ, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ସ୍ବାସ୍ଥ୍ୟ ଓ ପରିବାର କଲ୍ୟାଣ, ଉଚ୍ଚ ଶିକ୍ଷା, ଅନୁସୂଚିତ ଜାତି ଓ ଜନଜାତି ବିଭାଗର ଅଧିକାରୀ, ସୁଭଦ୍ରା ଟିମ୍‌ର ଅଧିକାରୀ ଉପସ୍ଥିତ ଥିଲେ।

Powered by Froala Editor