ବମ୍ବେ ହାଇକୋର୍ଟ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଜୀବନୀ ଉପରେ ଆଧାରିତ ଫିଲ୍ମ ‘ଅଜୟ: ଦି ଅନଟୋଲ୍ଡ ଷ୍ଟୋରି’ ଦେଖିବା ପରେ ସବୁଜ ସଙ୍କେତ ଦେଇଛନ୍ତି ।ଏହି ଚଳଚ୍ଚିତ୍ର ଏବେ ଶୀଘ୍ର ରିଲିଜ୍ ହୋଇପାରେ। ଚଳଚ୍ଚିତ୍ରର ‘ଅଜୟ: ଦି ଅନଟୋଲ୍ଡ ଷ୍ଟୋରୀ ଅଫ୍ ଏ ଯୋଗୀ’ ରିଲିଜ୍ ନେଇ ବମ୍ବେ ହାଇକୋର୍ଟରେ ଶୁଣାଣି ହୋଇଥିଲା। ହାଇକୋର୍ଟ ସ୍ପଷ୍ଟ କରିଥିଲେ ଯେ ପ୍ରଥମେ ସେ ଚଳଚ୍ଚିତ୍ରଟି ଦେଖିବେ, ତା’ପରେ ଏହା ସମ୍ପର୍କରେ ନିର୍ଦ୍ଦେଶ ଜାରି କରାଯିବ। ଏହାପରେ ଏବେ ଚଳଚ୍ଚିତ୍ର ନିର୍ମାତାମାନଙ୍କୁ ଆଶ୍ୱସ୍ତି ମିଳିଛି।

ଏହି ଚଳଚ୍ଚିତ୍ରଟି ‘ଦି ମଙ୍କ ହୁ ବିକେମ ଚିଫ ମିନିଷ୍ଟର’ ପୁସ୍ତକ ଦ୍ୱାରା ଅନୁପ୍ରାଣିତ ଏବଂ ଏହା ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଜୀବନୀ ଉପରେ ଆଧାରିତ ବୋଲି କୁହାଯାଉଛି। ବିଚାରପତି ରେବତୀ ମୋହିତେ ଡେରେ ଏବଂ ବିଚାରପତି ନୀଳା ଗୋଖଲେଙ୍କ ଖଣ୍ଡପୀଠ ଗୁରୁବାର ଫିଲ୍ମ ନିର୍ମାତାମାନଙ୍କୁ ଫିଲ୍ମର ଏକ କପି କୋର୍ଟରେ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ, ଯେଉଁଥିରେ CBFC ଦ୍ୱାରା ଚିହ୍ନିତ ଦୃଶ୍ୟ କିମ୍ବା ଅଂଶଗୁଡ଼ିକୁ ସ୍ପଷ୍ଟ ଭାବରେ ଚିହ୍ନିତ କରାଯାଇଛି। ଯେଉଁ ପୁସ୍ତକ ଉପରେ ଫିଲ୍ମଟି ଆଧାରିତ ତାହାର ଏକ କପି ପୂର୍ବରୁ କୋର୍ଟରେ ଦାଖଲ କରାଯାଇଛି। ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଉପରେ ନିର୍ମିତ ଚଳଚ୍ଚିତ୍ରକୁ ବମ୍ବେ ହାଇକୋର୍ଟରୁ ସବୁଜ ସଙ୍କେତ ମିଳିଛି।

Powered by Froala Editor