ଦେଶର ଏୟାରଲାଇନ୍ସ ଏବଂ ହୋଟେଲଗୁଡିକ କିଛି ଦିନ ହେବ ବୋମା ଧମକ ପାଉଛନ୍ତି। କେତେବେଳେ ବିମାନକୁ ବୋମାରେ ଉଡ଼ାଇ ଦେବାକୁ ମିଳୁଛି ଧମକ ତ କେତେବେଳେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଆଉ ସରକାରୀ ଅଫିସକୁ ବି ମିଳୁଛି ଧମକ । ଏହି ମାମଲାରେ ନାଗପୁର ପୁଲିସ୍‌ ୩୫ବର୍ଷ ବୟସ୍କ ଯୁବକଙ୍କୁ ଗିରଫ କରିଛି ଯେଉଁଥିରେ ୩୫୪ରୁ ଅଧିକ ଧମକପୂର୍ଣ୍ଣ ଇମେଲ ପଠାଯାଇଥିବା ଅଭିଯୋଗ ହୋଇଛି। କୁହାଯାଉଛି ଯେ ସେ ପିଏମଓ, ବରିଷ୍ଠ ସରକାରୀ କର୍ମଚାରୀ, ବିମାନ ଏବଂ ଟ୍ରେନକୁ ଉଡ଼ାଇ ଦେବେ ବୋଲି ଧମକ ଦେଇଛନ୍ତି।

ଗିରଫ ଯୁବକ ଜଗଦୀଶ ଉଇକି ଜଣେ ଲେଖକ ହୋଇଥିବା ବେଳେ ପ୍ରାୟ ଶହେରୁ ଊର୍ଦ୍ଧ୍ୱ ଧମକପୂର୍ଣ୍ଣ କଲ୍‌ ଓ ମେସେଜ ଓ ମେଲ୍‌ କରିଥିବା ଜଣାଯାଇଛି। ତାଙ୍କ ଘର ମହାରାଷ୍ଟ୍ରର ଗୋଣ୍ଡିଆ ଜିଲ୍ଲାରେ ହୋଇଥିବା ବେଳେ ସେ ଦିଲ୍ଲୀରୁ ନାଗପୁରରେ ପହଞ୍ଚିବା ପରେ ତାଙ୍କୁ ବାନ୍ଧିଛି ପୁଲିସ୍‌। ଏହାପୂର୍ବରୁ ସେ ଏପରି ଏକ ମାମଲାରେ ୨୦୨୧ ମସିହାରେ ବନ୍ଧା ହୋଇଥିଲେ।

ଜଗଦୀଶ ଜାନୁଆରୀ ୨୦୨୪ ପରଠାରୁ ପିଏମଓ ଏବଂ ଅନ୍ୟ ଅଧିକାରୀମାନଙ୍କୁ ୧୦୦ରୁ ଅଧିକ ଇମେଲ ପଠାଇଛନ୍ତି, ଯେଉଁଥିରେ କେବଳ ଧମକ ଦିଆଯାଇଥିଲା। ନାଗପୁର ଡିସିପି ଅଭିଯୁକ୍ତଙ୍କ ବିଷୟରେ କହିଛନ୍ତି ଯେ ଅଭିଯୁକ୍ତ ଜଗଦୀଶ ଆତଙ୍କବାଦୀଙ୍କ ଉପରେ ଏକ ପୁସ୍ତକ ଲେଖିଛନ୍ତି, ଯାହାର ଶୀର୍ଷକ ଆତଙ୍କବାଦ – ଏକ ତୁଫାନି ରାକ୍ଷକ।

Powered by Froala Editor