ମୁମ୍ବାଇ: ଚାହାଣୀ ନଜର ଟାଣିଲା ଭଳି । ଅଙ୍ଗଭଙ୍ଗୀ ଭିଡ଼ ଭିତରେ ସ୍ୱତନ୍ତ୍ର । ପୁଣି ସୌନ୍ଦର୍ଯ୍ୟକୁ ଯିଏ ଦେଖିବ କ୍ଷଣିଏ ନିଶ୍ଚିତ ଅଟକିବ । ତା’ ସାଙ୍ଗକୁ ଉପସ୍ଥିତ ବୁଦ୍ଧି । ମୋଟାମୋଟି ଭାବେ କହିବାକୁ ଗଲେ ସେ ସର୍ବଗୁଣା ସମ୍ପୂର୍ଣ୍ଣା । ସେଥିପାଇଁ ନିର୍ଦ୍ଦେଶକ ଦେଖିବା ମାତ୍ରେ ଅଫର୍ ଅଜଡ଼ି ଦେଲେ । ଏକାଥରକେ ଫିଲ୍ମର ଅଭିନେତ୍ରୀ ଲାଗି କହିଲେ । ଆଉ ଏଭଳି ସୁଯୋଗ ବି ହାତ ଛଡ଼ା କଲେନି ଦକ୍ଷିଣୀ ଅଭିନେତ୍ରୀ ନିଧି ଅଗ୍ରୱାଲ୍ । ଆରମ୍ଭ କଲେ ନିଜ ଫିଲ୍ମ କ୍ୟାରିଅର୍ । ଏହି ଯାତ୍ରା ତାଙ୍କୁ ଦେଇ ଚାଲିଛି ଗୋଟିଏ ପରେ ଗୋଟେ ସଫଳତା । ସ୍ୱଳ୍ପ ଫିଲ୍ମ ଓ ମ୍ୟୁଜିକ୍ ଭିଡିଓ କରିଥିଲେ ବି ସବୁଗୁଡ଼ିକ ହୋଇଛି ହିଟ୍ । ନିଧି ବି ତାଙ୍କ କ୍ୟାରିଅର୍‌କୁ ନେଇ ବେଶ୍ ଉତ୍ସାହିତ ଥିବା ଜଣାପଡ଼ିଛି । କମ୍ କାମ ମିଳିଥିଲେ ବି ଦର୍ଶକ ଯେଉଁ ଭଲ ପାଇବା ଦେଇଛନ୍ତି ସେଥିପାଇଁ ସେ ଚିର ଋଣି ବୋଲି କହିଛନ୍ତି ।

ହାଇଦ୍ରାବାଦରେ ଏକ ହିନ୍ଦୀଭାଷୀ ମାରୱାଡ଼ି ପରିବାରରେ ୧୯୯୩ ଅଗଷ୍ଟ ୧୭ରେ ନିଧି ଜନ୍ମିତ । ସେ ହିନ୍ଦୀ ସମେତ ତେଲୁଗୁ ଓ ତାମିଲ ଭାଷା କହିବା, ବୁଝିବା ଓ ଲେଖିବାରେ ପାରଙ୍ଗମ । ଯେହେତୁ ସେ ବ୍ୟାବସାୟିକ ପରିବାରରେ ଜନ୍ମିତ ତେଣୁ ପିଲାଦିନୁ ତାଙ୍କର ବ୍ୟବସାୟ ପ୍ରତି ଦୁର୍ବଳତା ଥିଲା । ଏଥିପାଇଁ ସେ ବାଣିଜ୍ୟ ପରିଚାଳନାରେ ସ୍ନାତକ ଡିଗ୍ରି ହାସଲ କରିଥିଲେ । ଏହାପରେ ସେ ନିଜର ପାରିବାରିକ ବାଣିଜ୍ୟ ପ୍ରତିଷ୍ଠାନ ସମ୍ଭାଳିବାଟା ନିଶ୍ଚିତ ଥିଲା । ମାତ୍ର ତାଙ୍କର ଯାଦୁକରୀ ଚାହାଣୀ ସାଙ୍ଗକୁ ଆକର୍ଷଣୀୟ ଅଙ୍ଗସୌଷ୍ଠବ ୨୦୧୬ରେ ହିନ୍ଦୀ ସିନେ ନିର୍ଦ୍ଦେଶକ ସବ୍ବିର ଖାଁଙ୍କ ଦୃଷ୍ଟି ଆକର୍ଷଣ କରିଥିଲା । ସେ ତାଙ୍କ ଚଳଚ୍ଚିତ୍ର ମୁନ୍ନା ମାଇକେଲରେ ନାୟିକା ଭାବେ ଉପସ୍ଥାପନା କରିବାର ପ୍ରସ୍ତାବ ଦେଇଥିଲେ ।

ଏ ପ୍ରକାର ସୁଯୋଗକୁ ନିଧି ହାତଛଡ଼ା କରିନଥିଲେ । ସଙ୍ଗେ ସଙ୍ଗେ ପ୍ରସ୍ତାବରେ ରାଜି ହୋଇଥିଲେ । ଆଉ ଫିଲ୍ମ ଇଣ୍ଡଷ୍ଟ୍ରିରେ ପାଦ ଥାପିଥିଲେ । ତାଙ୍କର ଏହି ପ୍ରଥମ ପଦାର୍ପଣକୁ ଦର୍ଶକ ଖୁବ୍ ଗ୍ରହଣ କରିଥିଲେ । ସେଥିପାଇଁ ତାଙ୍କୁ ୨୦୧୭ରେ ଶ୍ରେଷ୍ଠ ଅଭିନେତ୍ରୀ ଭାବେ ଜୀ ସିନେ ସମ୍ମାନ ମିଳିଥିଲା । ଏଥିରେ ସେ ଉତ୍ସାହିତ ହୋଇ ପାରିବାରିକ ବ୍ୟବସାୟକୁ ଭୁଲି ଅଭିନୟରେ ହିଁ ଜୀବନ ଗଢ଼ିବାକୁ ଦୃଢ଼ ପରିକର ହୋଇଥିଲେ । ଏହାପରେ ୨୦୧୮ରେ ସେ ସବ୍ୟସାଚୀ ଚଳଚ୍ଚିତ୍ର ମାଧ୍ୟମରେ ତେଲୁଗୁ ରାଇଜକୁ ପ୍ରବେଶ କରିଥିଲେ । ଏହାର ବିପୁଳ ଗ୍ରହଣୀୟତା ତାଙ୍କୁ ତହିଁ ପରବର୍ଷ ଆଉ ଦୁଇଟି ତେଲୁଗୁ ସିନେମା ପାଇଁ ସୁଯୋଗ ଆଣିଥିଲା । ସେହିପରି ଗତବର୍ଷ ତାମିଲ ସିନେ ଦୁନିଆରେ ସେ ପାଦ ଦେଇଥିଲେ ଈଶ୍ୱରମ୍ ମାଧ୍ୟମରେ । ଆସନ୍ତାବର୍ଷ ପ୍ରାରମ୍ଭରେ ଆସିବାକୁ ଥିବା ତେଲୁଗୁ ଫିଲ୍ମ ହରି ହର ବୀର ମଲ୍ଲୁ ପାଇଁ ସେ ଏବେ ସୁଟିଂରେ ବ୍ୟସ୍ତ ରହିଛନ୍ତି ।

ନିଧି ପାଂଚ ବର୍ଷର ଅଭିନୟ ଜୀବନ ଭିତରେ ଆଠଟି ଚଳଚ୍ଚିତ୍ର ଓ ତିନିଟି ମ୍ୟୁଜିକ୍ ଭିଡିଓରେ ଅଭିନୟ କରିଛନ୍ତି । ଯାହାକି ଅନ୍ୟ ଅଭିନେତ୍ରୀଙ୍କ ଠାରୁ ଢେର୍ କମ୍ । ହେଲେ ଏଥିପାଇଁ ସେ ଆଦୌ ଚିନ୍ତିତ କିମ୍ବା ବିବ୍ରତ ନୁହଁନ୍ତି । ଦର୍ଶକ ତାଙ୍କୁ ଯେଉଁ ଭଲ ପାଇବା ଦେଇଛନ୍ତି ସେଥିପାଇଁ ସେ ବଧାଇ ଜଣାଇବା ସହିତ ଆଗାମୀ ଦିନରେ ନିଶ୍ଚିତ ଭାବେ ଭଲ ସିନେମା ଭେଟି ଦେବେ ବୋଲି ପ୍ରତିଶ୍ରୁତି ଦେଇଛନ୍ତି ।

Powered by Froala Editor