ଜବାହର ଲାଲ ନେହରୁ ୟୁନିଭର୍ସିଟି ବା ଜେଏନ୍‌ୟୁର ପ୍ରଥମ ମହିଳା କୁଳପତି ଭାବେ ପ୍ରଫେସର ଶାନ୍ତିଶ୍ରୀ ଧୂଳିପୁଡ଼ି ପଣ୍ଡିତଙ୍କୁ ନିଯୁକ୍ତି ଦିଆଯାଇଛି । ସୋମବାର ଶିକ୍ଷା ମନ୍ତ୍ରଣାଳୟ ତାଙ୍କୁ ଜେଏନ୍‌ୟୁର କୁଳପତି ଭାବେ ନିଯୁକ୍ତି ଦେଇଛି। ଭାଇସ୍‌ ଚାନସେଲର ପ୍ରଫେସର ଏମ୍‌. ଜଗଦେଶ କୁମାରଙ୍କୁ ୟୁଜିସି ଗ୍ରାଣ୍ଟ କମିଶନ୍‌ର ଅଧ୍ୟକ୍ଷ ନିଯୁକ୍ତ କରାଯିବା ପରେ ତାଙ୍କ ସ୍ଥାନରେ ଶାନ୍ତିଶ୍ରୀ ଏବେ ଜେଏନ୍‌ୟୁର ଦାୟିତ୍ୱ ସମ୍ଭାଳିବେ। ଶାନ୍ତିଶ୍ରୀଙ୍କୁ କୁଳପତି ନିଯୁକ୍ତ କରିବା ପାଇଁ ରାଷ୍ଟ୍ରପତି ରାମନାଥ କୋବନ୍ଦଙ୍କ ଅନୁମତି ପରେ ଶିକ୍ଷା ମନ୍ତ୍ରାଳୟ ଜେଏନ୍‌ୟୁ ରେଜିଷ୍ଟ୍ରାରଙ୍କୁ ଚିଠି ଲେଖି ଜଣାଇଛି । ଆଗାମୀ ୫ ବର୍ଷ ଯାଏଁ ସେ ଏହାର କୁଳପତି ଦାୟିତ୍ୱରେ ରହିବା ନେଇ ଜଣାପଡ଼ିଛି ।

ବର୍ତ୍ତମାନ ପ୍ରଫେସର ପଣ୍ଡିତ ମହାରାଷ୍ଟ୍ରର ସାବିତ୍ରୀବାଇ ଫୁଲେ ବିଶ୍ୱବିଦ୍ୟାଳୟରେ କୁଳପତି ଭାବେ କାମ କରୁଛନ୍ତି। ୫୯ ବର୍ଷୀୟା ଶାନ୍ତଶ୍ରୀ ପଣ୍ଡିତ ଜେଏନ୍‌ୟୁର ପୂର୍ବତନ ଛାତ୍ରୀ। ସେ ଏମଫିଲ ସହ ଅନ୍ତର୍ଜାତୀୟ ସମ୍ପର୍କ ବିଷୟରେ ଏଠାରେ ପିଏଚଡି କରିଥିଲେ। ଏବେ ତାଙ୍କୁ ଜେଏନୟୁର ପ୍ରଥମ ମହିଳା କୁଳପତି ହେବାର ଆଖ୍ୟା ମିଳିଛି।

ଋଷିଆର ଏସ୍‌ଟି ପିଟର୍ସବର୍ଗରେ ୧୯୬୨ ଜୁଲାଇ ୧୫ ତାରିଖରେ ଜନ୍ମଗ୍ରହଣ କରିଥିବା ପ୍ରଫେସର ପଣ୍ଡିତ୍ ୧୯୮୮ରୁ ଶିକ୍ଷାଦାନ କରିଆସୁଛନ୍ତି। ୧୯୮୮ରୁ ପ୍ରଫେସର ପଣ୍ଡିତ ଗୋଆ ବିଶ୍ୱବିଦ୍ୟାଳୟରୁ ତାଙ୍କ ଶିକ୍ଷାଦାନ କ୍ୟାରିୟର ଆରମ୍ଭ କରିଥିଲେ। ଶ୍ରୀମତୀ ପଣ୍ଡିତ ଏକାଧିକ ବଡ଼ ବଡ଼ ସଂସ୍ଥାନର ସଦସ୍ୟ ରହିଛନ୍ତି। ଯଥା- ଆମେରିକାର ଷ୍ଟଡିସ୍ ରିସର୍ଚ୍ଚ ଇନ୍‌ଷ୍ଟଚ୍ୟୁଟ୍ ହାଇଦ୍ରାବାଦ, ଇଣ୍ଡିଆନ ଆସୋସିଏସନ୍‌ ଅଫ୍ ଆମେରିକାନ ଷ୍ଟଡିଜ୍, ଅଲ୍ ଇଣ୍ଡିଆ ପଲିଟିକାଲ ସାଇନ୍ସ ଆସୋସିଏସନ୍, ଭଣ୍ଡାରକର ଓରିଏଣ୍ଟାଲ ରିସର୍ଚ୍ଚ ଇଷ୍ଟଚ୍ୟୁଟ୍, ଇଣ୍ଡିଆନ ସେକୁଲାର ସୋସାଇଟି ଇତ୍ୟାଦିରେ ଶ୍ରୀମତି ପଣ୍ଡିତ ସଦସ୍ୟ ରହିଛନ୍ତି।

Powered by Froala Editor