ନୂଆବର୍ଷରେ ମାଓ ସଂଗଠନକୁ ଶକ୍ତ ଝଟ୍କା: ଆତ୍ମସମର୍ପଣ କଲେ ୪୫ ନକ୍ସଲ
ରାୟପୁର: ନୂଆବର୍ଷରେ ମାଓ ସଂଗଠନକୁ ଶକ୍ତ ଝଟ୍କା । ଏକାଥରକେ ପୁଲିସ୍ ନିକଟରେ ଆତ୍ମସମର୍ପଣ କରିଛନ୍ତି ୪୫ ନକ୍ସଲ । ଛତିଶଗଡ଼ ରାଜ୍ୟ ସୁକମା ଜିଲ୍ଲା ପୁଲିସ କାର୍ଯ୍ୟାଳୟରେ ଏସ୍ପି ସୁନୀଲ ଶର୍ମାଙ୍କ ନିକଟରେ ସମସ୍ତେ ଆତ୍ମସମର୍ପଣ କରିଥିବା ଜଣାପଡ଼ିଛି । ପୁଲିସର ନୂତନ ମାଓ ଦମନ ନୀତି ଓ ସମାଜର ମୁଖ୍ୟ ସ୍ରୋତରେ ସାମିଲ ହେବାକୁ ଆଧାର କରି ଏମାନେ ନିଜ ଗୋଷ୍ଠୀ ହାତ ଛାଡ଼ିଛନ୍ତି ।
ଏନେଇ ଏସ୍ପି ଶ୍ରୀ ଶର୍ମା କହିଛନ୍ତି, ଆତ୍ମସମର୍ପଣ କରିଥିବା ସମସ୍ତ ନକ୍ସଲ ସୁକମା ଓ ଦରଭା ଡିଭିଜନର । ଏମାନେ ଏକାଧିକ ହିଂସାକାଣ୍ଡ ସହ ସାମିଲ ଥିଲେ । ଏମାନଙ୍କ ମଧ୍ୟରେ ଜଣଙ୍କ ମୁଣ୍ଡରେ ୨ଲକ୍ଷ ଟଙ୍କାର ପୁରସ୍କାର ଘୋଷଣା ହୋଇଥିଲା । ଆତ୍ମସମର୍ପଣ କରିଥିବା ମାଓବାଦୀଙ୍କ ମଧ୍ୟରେ ୯ଜଣ ମହିଳା ଅଛନ୍ତି ।
ଆତ୍ମସମର୍ପଣ କରିଥିବା ସମସ୍ତ ମାଓବାଦୀଙ୍କୁ ନୂଆବର୍ଷ ଅବସରରେ ସୁସ୍ୱାଦୁ ବ୍ୟଞ୍ଜନ ଦିଆଯାଇଥିଲା । ଏଥିସହ ଧୋତି, କମ୍ବଳ, ଚଦର ଓ ଶାଢି ମଧ୍ୟ ବଣ୍ଟନ କରାଯାଇଥିଲା । ସରକାରଙ୍କ ନୀତି ନିୟମ ଅନୁଯାୟୀ ସମସ୍ତଙ୍କୁ ସରକାରୀ ସହାୟତା ଯୋଗାଇ ଦିଆଯିବ ବୋଲି ଏସ୍ପି କହିଛନ୍ତି । ଏହାସହ ଆଗାମୀ ଦିନରେ ଅନ୍ୟ ମାଓବାଦୀମାନେ ମଧ୍ୟ ହିଂସା ଛାଡ଼ି ସମାଜର ମୁଖ୍ୟ ସ୍ରୋତରେ ସାମିଲ ହେବାକୁ ଆହ୍ୱାନ ଦେଇଛନ୍ତି ।
Powered by Froala Editor
