ଅଭାବ ରୋକିପାରିନି ସଫଳତାର ବାଟ । ଦୃଢ ଇଚ୍ଛାଶକ୍ତି ପାଇଁ ଜଣେ ରିକ୍ସା ଚାଳକଙ୍କ ପୁଅ ଡାକ୍ତର ହେବାକୁ ଯାଉଛନ୍ତି । ସେ ହେଉଛନ୍ତି ଭଦ୍ରକ ପୁରୁଣା ବଜାରର ମୈରାଜ ଖାନଙ୍କ ପୁଅ ମୁର୍ସିଦ ଖାନ । ମୁର୍ସିଦ ଚଳିତ ବର୍ଷ ନିଟ୍ ପରୀକ୍ଷାରେ କୃତ କାର୍ଯ୍ୟ ହୋଇ ସରକାରୀ ମେଡିକାଲ କଲେଜରେ ଡାକ୍ତରୀ ପଢିବାକୁ ଯୋଗ୍ୟ ବିବେଚିତ ହୋଇଛନ୍ତି।

୪ ପୁଅ ଓ ୨ ଝିଅ ସମେତ ବାପ ମାଆଙ୍କୁ ମିଶାଇ ୮ଜଣିଆ ପରିବାରରେ ବାପା ମୈରାଜ ଖାନ ହେଉଛନ୍ତି ଏକମାତ୍ର ଆୟକାରୀ ବ୍ୟକ୍ତି । ମୈରାଜ ରିକ୍ସା ଚଳାଇ ପରିବାର ପ୍ରତିପୋଷଣ କରିବା ସହ ପୁଅ ଝିଅ ପାଠ ପଢ଼ା ଖର୍ଚ୍ଚ ମଧ୍ୟ ବହନ କରନ୍ତି । ଏଭଳି ଅଭାବ ଭିତରେ ମଧ୍ୟ ମୁର୍ସିଦ ଆଶା ଥିଲା ଡାକ୍ତର ହେବେ । ହେଲେ ୨୦୦୭ ରେ ମୁର୍ସିଦଙ୍କ ସ୍ୱପ୍ନର ଜୁଆରରେ ଭଟ୍ଟା ପଡ଼ିଥିଲା । ଯେତେବେଳେ ତାଙ୍କ ବାପାଙ୍କ ଦୁର୍ଘଟଣା ଘଟିଥିଲା । ଏବଂ ସେ ରିକ୍ସା ଚଳାଇବାକୁ ଅସମର୍ଥ ହୋଇଥିଲା । କିନ୍ତୁ ପରବର୍ତ୍ତୀ ସମୟରେ ମୈରାଜଙ୍କ ବଡ଼ ଭାଇ ସମ୍ଭାଳିଥିଲେ ପରିବାର ବୋଝ । ତଥାପି ସୁଧୁନି ଥିଲା ସ୍ଥିତି କିନ୍ତୁ ଭାଙ୍ଗି ନଥିଲା ଡାକ୍ତର ହେବାର ସ୍ୱପ୍ନ । ଆଉ ଏହାର ଫଳ ସ୍ୱରୂପ ମୁର୍ସିଦ ନିଟ୍ ପରୀକ୍ଷାରେ ୬୦୯ ରାଙ୍କ କୃତକାର୍ଯ୍ୟ ହେବା ସହ ସର୍ବଭାରତୀୟ ସ୍ତରରେ ୧୫ ହଜାର ୨୩୯ ରାଙ୍କ୍ ହାସଲ କରି ସରକାରୀ ମେଡିକାଲ କଲେଜରେ ଡାକ୍ତରୀ ପଢିବା ପାଇଁ ମନୋନୀତ ହୋଇଛନ୍ତି । ଯାହାକୁ ନେଇ ପରିବାର ସହ ସ୍ଥାନୀୟ ଅଞ୍ଚଳରେ ଖୁସି ଦେଖିବାକୁ ମିଳିଛି । ମୁର୍ସିଦଙ୍କ ଏଭଳି ଉପଲବ୍ଧି ପାଇଁ ସ୍ଥାନୀୟ ଅଞ୍ଚଳବାସୀ ବେଶ୍ ଖୁସିଥିବା ବେଳେ ତାଙ୍କର ଏଭଳି କାର୍ଯ୍ୟ ପାଇଁ ତାଙ୍କୁ ସମ୍ମାନିତ ମଧ୍ୟ କରିଛନ୍ତି।

Powered by Froala Editor