ଏଣିକି ଅନ୍ତରଙ୍ଗ ମୁହୂର୍ତ୍ତର ସିନ୍ କରିପାରିବେନି ଅଭିନେତା ଓ ଅଭିନେତ୍ରୀ । ଆଲିଙ୍ଗନ କିମ୍ବା ବୋଲ୍ଡ ସିନ୍ ଉପରେ ରୋକ ଲଗାଇଛନ୍ତି ପାକିସ୍ତାନ ସରକାର । ସୂଚନା ମୁତାବକ ପାକିସ୍ତାନର ଟିଭି ଚ୍ୟାନେଲମାନଙ୍କରେ ପ୍ରସାରିତ ହେଉଥିବା କାର୍ଯ୍ୟକ୍ରମରେ ଅଶ୍ଳୀଳତା ବଢୁଥିବାବେଳେ ଏହାକୁ ନେଇ ଦର୍ଶକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି | ଏବାବଦରେ ଦର୍ଶକମାନେ ବାରମ୍ବାର ଅଭିଯୋଗ କରିବା ପରେ ପାକିସ୍ତାନ ଇଲେକ୍ଟ୍ରୋନିକ୍ସ ମିଡ଼ିଆ ରେଗୁଲେଟରି ଅଥରିଟି(ପେମରା) ପକ୍ଷରୁ ନିର୍ଦ୍ଦେଶାବଳୀ ଜାରି କରାଯାଇଛି । ପେମରା ସ୍ଥାନୀୟ ଟେଲିଭିଜନ ଚ୍ୟାନେଲଗୁଡିକୁ ସିରିଏଲ୍‌ ବା ନାଟକରେ ଆଲିଙ୍ଗନ, ଚୁମ୍ବନ ତଥା ସ୍ପର୍ଶ ଦୃଶ୍ୟ ବନ୍ଦ କରିବାକୁ ନିର୍ଦ୍ଦେଶ ଦେଇଛି।

ବିଜ୍ଞପ୍ତିରେ ଆହୁରି କୁହାଯାଇଛି, ‘ସମାଜର ଏକ ଗୁରୁତ୍ୱପୂର୍ଣ୍ଣ ଗୋଷ୍ଠୀ ବିଶ୍ୱାସ କରେ ଯେ ନାଟକଗୁଡ଼ିକ ପାକିସ୍ତାନୀ ସମାଜର ପ୍ରକୃତ ଚିତ୍ରକୁ ଚିତ୍ରିତ କରୁନାହିଁ। ପାକିସ୍ତାନୀ ସମାଜର ଇସଲାମିକ ଶିକ୍ଷା ତଥା ସଂସ୍କୃତିକୁ ସମ୍ପୂର୍ଣ୍ଣ ଅବମାନନା କରି ଆଲିଙ୍ଗନ / ପରକୀୟାପ୍ରୀତି / ଅଶ୍ଳୀଳ ଦୃଶ୍ୟ/ ବୋଲ୍ଡ ଡ୍ରେସିଂ, ବେଡ୍‌ ସିନ୍‌ ଏବଂ ବିବାହିତ ଦମ୍ପତିଙ୍କ ଅନ୍ତରଙ୍ଗତାକୁ ଅଧିକ ଗ୍ଲାମରସ୍ କରାଯାଉଛି।’

ସୂଚନା ମୁତାବକ, ସେପ୍ଟେମ୍ବର ମାସରେ ପେମରା କଲ୍ ସେଣ୍ଟର ଦ୍ୱାରା ଅଧିକାଂଶ ଅଭିଯୋଗ ଗ୍ରହଣ କରାଯାଇଛି। ସିରିଏଲ୍‌ ‘ଜୁଦା ହୁଏ କୁଛ ଇସ୍‌ ତରହା’ର ଏକ ଏପିସୋଡ୍‌ ଟିଜରରେ ଦର୍ଶାଯାଇଥିବା ବୋଲ୍ଡ ସିନ୍‌କୁ ନେଇ ଝଡ ସୃଷ୍ଟି ହୋଇଥିଲା। ଏହାପରେ ପାକିସ୍ତାନୀ ଚ୍ୟାନେଲ ‘ହମ୍‌’ ଟିଭିକୁ ଚାରିଆଡୁ ସମାଲୋଚନା କରାଯାଇଥିଲା। ଅଥରିଟି ପକ୍ଷରୁ କୁହାଯାଇଛି ଯେ ଧାରାବାହିକରେ ଦିନକୁ ଦିନ ଅଶ୍ଳୀଳତା ବଢୁଥିବା ଯୋଗୁଁ ଦେଶସାରା ଅଭିଯୋଗ ଆସିବାରେ ଲାଗିଛି । ସେଥିପାଇଁ ଏଭଳି ପଦକ୍ଷେପ ନିଆଯାଇଛି । 

Powered by Froala Editor