ନୃଶଂସ । ରାକ୍ଷାସ । ବିକୃତ ମାନସିକ ରୋଗୀ । ଏଭଳି ଅନେକ ଶବ୍ଦ ବି ଏଭଳି ସିରିୟଲ କିଲର ପାଖରେ କମ୍ ପଡିବ । ଯିଏ ପ୍ରତିଶୋଧ ନେବା ଉଦ୍ଦେଶ୍ୟରେ ୧୦୦ ଶିଶୁ କନ୍ୟାଙ୍କୁ ବଳାତ୍କାର କରି ମାରି ଦେଇଛି । ଖାଲି ମାରିନି । ସେମାନଙ୍କ ଶବକୁ ଏସିଡ୍ ଟ୍ୟାଙ୍କରରେ ପକାଇ ନଷ୍ଟ କରିଛି । ଏଭଳି ଭୟଙ୍କର ଛାତିିଥରା ଘଟଣା ୧୯୯୯ ମସିହା ପାକିସ୍ତାନରେ ଘଟିଥିଲା । କୁଖ୍ୟାତ ଅପରାଧୀର ନାଁ ଥିଲା ଜାଭେଦ ଇକବାଲ । 

୧୯୫୬ ମସିହାରେ ଲାହୋରରେ ଜନ୍ମ ହୋଇଥିଲା ଜାଭେ । ବଡ଼ ହୋଇଯିବା ପରେ ଶିଶୁ କନ୍ୟାଙ୍କୁ ପ୍ରଲୋଭନ ଦେଖାଇ ଅପହରଣ କରୁଥିଲା । ଏହା ପରେ ସେମାନଙ୍କ ସହ ଦୁଷ୍କର୍ମ କରି ହତ୍ୟା କରୁଥିଲା । ପ୍ରମାଣ ନଷ୍ଟ କରିବା ପାଇଁ ସେ ଶବଗୁଡ଼ିକୁ ଏସିଡ୍ ପକାଇ ଜଳାଇ ଦେଉଥିଲା ।

ଏମିତି ୧୦୦ ଶିଶୁଙ୍କୁ ହତ୍ୟା କରିବା ପରେ ୧୯୯୯ରେ ନିଜର ଦୋଷ ସ୍ୱୀକାର କରିଥିଲା ଜାଭେଦ ଇକବାଲ । କିନ୍ତୁ  ତାର ଏହି ଭୁଲ ପାଇଁ ସେ କେବେ ବି ପଶ୍ଚାତାପ କରୁନଥିଲା । ତା ପଛର କାରଣ ଥିଲା ପ୍ରତିଶୋଧ ।  ସେ କହିଥିଲା ଯେ, ଛୋଟ ଥିବା ବେଳେ କୌଣସି ଏକ କାରଣରୁ ତାକୁ ପୋଲିସ ଗିରଫ କରିଥିଲା । ଭୁଲ ନଥାଇ ପୋଲିସ ତାକୁ ଗିରଫ କରିଥିଲା ଏବଂ ଅକଥନୀୟ ଯନ୍ତ୍ରଣା ଦେଇଥିଲା । ତାକୁ ମୁକ୍ତ କରିବା ପାଇଁ ତା ମା ପୋଲିସ ସାମ୍ନାରେ କାକୁତି ମିନତି କରିଥିଲା । ହେଲେ ପୋଲିସ ତା ମା’ କଥାକୁ ଖାତିର କରିନଥିଲା । ଏହା ଦେଖି ୧୦୦ ଶିଶୁଙ୍କୁ ହତ୍ୟା କରିବ ଏବଂ ୧୦୦ ମା ଠିକ ସେମିତି ପିଲାମାନଙ୍କ ପାଇଁ ନ୍ୟାୟ ଭିକ୍ଷା ମାଗିବେ ବୋଲି ମନରେ ସ୍ଥିର କରିଥିଲା । ଏହା ପରେ ସେ ପାଲଟି ଯାଇଥିଲା ସିରିୟଲ କିଲର । 

ଦୋଷ ସ୍ୱୀକାର କରିବା ପରେ ଇକବାଲକୁ ମାର୍ଚ୍ଚ ୨୦୦୦ରେ କୋର୍ଟରେ ହାଜର କରାଯାଇଥିଲା । କୋର୍ଟ ଦଣ୍ଡ ଶୁଣାଇବା ପରେ ଅକ୍ଟୋବର ୨୦୦୧ରେ ସେ ନିଜ ବାରାକରେ ଫାଶୀ ଲଗାଇ ଆତ୍ମହତ୍ୟା କରିଥିଲା । କିନ୍ତୁ କିଛି ଲୋକଙ୍କ ମତରେ ଇକବାଲକୁ ହତ୍ୟା କରାଯାଇଥିଲା ।

Powered by Froala Editor