“ସ୍କୁଲ ଯିବା ପାଇଁ ପିଲାଙ୍କୁ ଟିକା ଦରକାର ନାହିଁ”
ନୂଆଦିଲ୍ଲୀ:ପିଲାଙ୍କ କୋଭିଡ ଟିକାକରଣ ନେଇ ବୁଧବାର ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲୁଏଚଓ) ଏକ ଗୁରୁତ୍ୱପୂର୍ଣ୍ଣ ସୂଚନା ଦେଇଛି । ସ୍କୁଲ ଯିବା ପାଇଁ ପିଲାଙ୍କର ଟିକାକରଣ କରାଇବା ଦରକାର ନାହିଁ ବୋଲି ଏହା ସ୍ପଷ୍ଟ କରିଛି । କୋଭିଡ ମହାମାରୀ ଯୋଗୁ ଦୁଇ ବର୍ଷ ହେଲା ପିଲାମାନେ ସ୍କୁଲ ମାଟି ମାଡ଼ି ନଥିବା ବେଳେ ଡବ୍ଲୁଏଚଓର ଏଭଳି ମନ୍ତବ୍ୟ ସାମାନ୍ୟ ଆଶ୍ୱସ୍ତି ଆଣିଛି । ତଥାପି ସଂକ୍ରମଣ ଭୟରେ ଅଭିଭାବକମାନେ ସେମାନଙ୍କ ପିଲାଙ୍କୁ ସ୍କୁଲ ଛାଡ଼ିବେ କି ନାହିଁ, ତାହା ଏବେ ବି ପ୍ରଶ୍ନବାଚୀରେ ରହିଛି । କରୋନା ସଂକ୍ରମଣ ପ୍ରସଙ୍ଗରେ ବୁଧବାର ଡବ୍ଲୁଏଚଓ ପକ୍ଷରୁ ଏକ ସାମ୍ବାଦିକ ସମ୍ମିଳନୀ କରାଯାଇଥିଲା । ଏଥିରେ ଉପସ୍ଥିତ ଡବ୍ଲୁଏଚଓ କୋଭିଡ ବିଶେଷଜ୍ଞ କମିଟି ସଦସ୍ୟ ଡା. କ୍ୟାଥେରାଇନ ଓ ବି୍ରଏନ ବର୍ତ୍ତମାନ ପରିପ୍ରେକ୍ଷୀରେ ବିଶ୍ୱବ୍ୟାପୀ ସ୍କୁଲ ଖୋଲାଯିବା ଆବଶ୍ୟକ ବୋଲି ଦର୍ଶାଇଥିଲେ । ସେ କହିଥିଲେ ବିନା କୌଣସି ଭୟରେ କିଶୋର ଓ ଶିଶୁମାନେ ବିଦ୍ୟାଳୟ ଯାଇପାରିବେ । ଏଥିପାଇଁ ସେମାନଙ୍କୁ ବାଧ୍ୟତାମୂଳକ ଭାବେ ଟିକା ଦେବା ଦରକାର ନାହିଁ । ସ୍କୁଲ ଯିବାକୁ ହେଲେ ସେମାନଙ୍କ ପାଇଁ କୌଣସି ପ୍ରକାର ପ୍ରତିବନ୍ଧକ ରହିବା ଅନୁଚିତ ।
Powered by Froala Editor