କେରଳରେ ବଢିଲା ଡେଲ୍ଟା ସଂକ୍ରମଣ, ବିଶେଷଜ୍ଞ କହିଲେ ତୃତୀୟ ଲହର ହେବ ମାରାତ୍ମକ
କେରଳରେ ଲଗାତାର ସଂକ୍ରମଣ ବଢ଼ୁଥିବାରୁ ବିଶେଷଜ୍ଞମାନେ ତୃତୀୟ ଲହର ନେଇ ସତର୍କ କରାଇଛନ୍ତି । କେରଳରେ ଜୁନ୍ ୪ରୁ ଜୁଲାଇ ଶେଷ ସପ୍ତାହ ପର୍ଯ୍ୟନ୍ତ ଦୈନିକ ସଂକ୍ରମଣ ୧୨୦୦୦-୧୪୦୦୦ ରହୁଥିଲା। ଗତ ୬ ଦିନରେ ଦୈନିକ ସଂକ୍ରମଣ ୨୦ ହଜାରରୁ ୨୨ ହଜାର ରହିଛି। ଅନ୍ୟପକ୍ଷେ ରାଜ୍ୟରେ ଟେଷ୍ଟ୍ ପଜିଟିଭ୍ ହାର ୧୨ ପ୍ରତିଶତରୁ ଅଧିକ ରହିଛି। ବଢୁଥିବା ସଂକ୍ରମଣକୁ ନଜରରେ ରଖି ବିଶେଷଜ୍ଞମାନେ ଏହା ତୃତୀୟ ଲହରର ଆରମ୍ଭ ବୋଲି ମତ ରଖିଛନ୍ତି।
ବିଶେଷଜ୍ଞମାନେ କହିଛନ୍ତି, ଆମେମାନେ ତୃତୀୟ ଲହରର ଆରମ୍ଭରେ ଅଛୁ ଏବଂ ଆମକୁ ଅଧିକ ସତର୍କ ହେବାକୁ ପଡ଼ିବ। ନୂଆ କୋଭିଡ୍ ଲହରର ମୁକାବିଲା ପାଇଁ ସରକାର ଦୀର୍ଘକାଳୀନ ରଣନୀତିରେ କାର୍ଯ୍ୟ କରିବା ଉଚିତ ବୋଲି କହିଛନ୍ତି।
କେରଳରେ ଏବେ ଦେଶର ମୋଟ୍ ସଂକ୍ରମଣ ମାମଲାର ୫୧ ପ୍ରତିଶତରୁ ଅଧିକ ରହିଛି। ରାଜ୍ୟରେ ୭ ଦିନର ହାରାହାରି ଦୈନିକ ସଂକ୍ରମଣ ବୃଦ୍ଧି ହାର ୦.୬୦ ପ୍ରତିଶତ ରହିଛି । ଏପରିକି ସଂକ୍ରାମକ ଡେଲ୍ଟା ପ୍ରଜାତି କେରଳରେ ଭୟଙ୍କର ସ୍ଥିତି ସୃଷ୍ଟି କରିଛି ଏବଂ ମେ’ରୁ ଜୁଲାଇ ମଧ୍ୟରେ ସଂଗ୍ରହ ହୋଇଥିବା ପ୍ରାୟ ୯୦ ପ୍ରତିଶତ ନମୁନାରେ କରୋନାର ଡେଲ୍ଟା ପ୍ରଜାତି ଚିହ୍ନଟ ହୋଇଛି।
କେରଳରେ କରୋନାର ୩ଟି ପ୍ରଜାତି ଆଲ୍ଫା, କାପ୍ପା ଏବଂ ଡେଲ୍ଟା ଚିହ୍ନଟ ହୋଇଛି। କିନ୍ତୁ ଡେଲ୍ଟା ଅଧିକ ସଂକ୍ରାମକ। ଏବେ ରାଜ୍ୟରେ ଡେଲ୍ଟା ଏକ ପ୍ରଭାବୀ ପ୍ରଜାତି ହୋଇଛି। ଆସନ୍ତା ୩ ସପ୍ତାହ ରାଜ୍ୟ ପାଇଁ ଅତି ଗୁରୁତ୍ବପୂର୍ଣ୍ଣ ବୋଲି ରାଜ୍ୟ ସ୍ବାସ୍ଥ୍ୟମନ୍ତ୍ରୀ ବୀଣା ଜର୍ଜ କହିଛନ୍ତି।
ଅନ୍ୟପଟେ ଆମେରିକାର କୋଭିଡ୍ ଉପଦେଷ୍ଟା ଡ. ଆଣ୍ଟୋନି ଫାଉସି କହିଛନ୍ତି ଯେ, କୋଭିଡ୍ ମାମଲା ବଢ଼ିବାରେ ଲାଗିଛି ଏବଂ ଆଗକୁ ଅଧିକ କଷ୍ଟ ଓ ଯନ୍ତ୍ରଣା ଅଛି। ଯେଉଁ ଆମେରିକୀୟମାନେ ଟିକା ନେଇ ନାହାନ୍ତି ସରକାର ସେମାନଙ୍କୁ ତୁରନ୍ତ ଟିକା ଦେବାର ବ୍ୟବସ୍ଥା କରନ୍ତୁ ବୋଲି ସେ ପରାମର୍ଶ ଦେଇଛନ୍ତି। ସଂକ୍ରମଣ ବଢ଼ିଲେ ବି ଆମେରିକାରେ ଆଉ ଅଧିକ ଲକ୍ଡାଉନ୍ର ଆବଶ୍ୟକତା ପଡ଼ିବ ବୋଲି ସେ ଭାବୁନାହାନ୍ତି, କାରଣ ବହୁ ଲୋକ ଟିକା ନେଇସାରିଲେଣି। କିନ୍ତୁ ସେତିକି ଲୋକ ଟିକା ନେଇନାହାନ୍ତି, ଯେତିକି ନେଇଥିଲେ ଏ ସଂକ୍ରମଣ ଆଉ ବଢ଼ିବାର ସୁଯୋଗ ପାଇ ନଥାନ୍ତା। ନୂଆ ସଂକ୍ରମଣ ଅଧିକାଂଶ ଟିକା ନେଇ ନ ଥିବା ଲୋକଙ୍କୁ ହେଉଛି।
Powered by Froala Editor
