ପାଟନା : ବିହାର ମୁଖ୍ୟମନ୍ତ୍ରୀ ତଥା ଏନଡିଏ ସହଯୋଗୀ ନୀତୀଶ କୁମାର ପେଗାସସ ଦୁର୍ନୀତି ମାମଲାରେ ତଦନ୍ତ ଦାବି କରିଛନ୍ତି । ଦେଶରେ ରାଜନେତା, ସାମ୍ବାଦିକ ଏବଂ ବିଚାରପତିମାନେ ଏହି ସ୍ପାଏୱେର ଟାର୍ଗେଟରେ ଅଛନ୍ତି ବୋଲି ଅଭିଯୋଗ ହେବାପରେ ଉକ୍ତ ମାମଲାର ତଦନ୍ତ ପାଇଁ ବିରୋଧୀ ନେତାମାନେ ଦାବି କରିଆସୁଛନ୍ତି । ତେବେ ବିରୋଧୀ ନେତାମାନଙ୍କ ସହ ସ୍ୱର ମିଶାଇଛନ୍ତି ନୀତୀଶ  । ସେ କହିଛନ୍ତି, ଲୋକମାନଙ୍କୁ ହଇରାଣ କରିବାପାଇଁ ଏଭଳି କାମ କରିବା ଅନୁଚିତ । ସମ୍ପୂର୍ଣ୍ଣ ଘଟଣା କ’ଣ ତାହା ସର୍ବସମ୍ମୁଖକୁ ଆସିବା ଉଚିତ । ଅନେକ ଦିନ ଧରି ଆମେମାନେ ଟେଲିଫୋନ ଟ୍ୟାପିଂ ବିଷୟରେ ଶୁଣୁଛେ । ତେଣୁ ଏହି ବିଷୟବସ୍ତୁ ଉପରେ ସଂସଦରେ ଆଲୋଚନା ହେବା ଉଚିତ ବୋଲି ସେ କହିଛନ୍ତି । ତେବେ ଏନଡିଏର ପ୍ରଥମ ସହଯୋଗୀ ଭାବେ ନୀତୀଶଙ୍କର ଏଭଳି ମନ୍ତବ୍ୟ ଏକ ଆଲୋଚ୍ୟର ବିଷୟ ହୋଇଛି । ନୀତୀଶଙ୍କର ଏଭଳି ମନ୍ତବ୍ୟ ବିଜେପିକୁ ଅଡ଼ୁଆରେ ପକାଇପାରେ । ପେଗାସସ ମାମଲାକୁ ନେଇ ଦେଶରେ ଏକପ୍ରକାର ରାଜନୈତିକ ଝଡ଼ ଆରମ୍ଭ ହୋଇଛି । ପେଗାସସ ଦୁର୍ନୀତି ମାମଲା ପାଇଁ ସଂସଦରେ ବିରୋଧୀମାନେ ହଙ୍ଗାମା ଓ ହଟ୍ଟଗୋଳ କରିଛନ୍ତି । ଚଳିତ ମୌସୁମୀ ଅଧିବେଶନରେ ଉଭୟ ଗୃହର କାର୍ଯ୍ୟ ଠିକ ଭାବେ ହୋଇପାରୁନି । ଏଭଳି ସମୟରେ ନୀତୀଶଙ୍କର ଏହି ଦାବି ଅସ୍ୱାଭାବିକ ଲାଗୁଛି । ସାମ୍ବାଦିକମାନଙ୍କ ଏକ ପ୍ରଶ୍ନର ଉତ୍ତର ରଖି ନୀତୀଶ କହିଛନ୍ତି, ଉକ୍ତ ଘଟଣାର ତଦନ୍ତ ହେବା ଉଚିତ ଏବଂ ପୂରା ଘଟଣା କ’ଣ ତାହା ସମସ୍ତେ ଜାଣିବା ଉଚିତ । ଉକ୍ତ ଘଟଣାରେ ପ୍ରକୃତ ବିଚାର ହେବାପରେ କାର୍ଯ୍ୟାନୁଷ୍ଠାନ ହେବା ଉଚିତ ବୋଲି ନୀତୀଶ କହିଛନ୍ତି ।

Powered by Froala Editor