ସିକ୍କିମର ନାମଚି ଜିଲ୍ଲାରେ ଭୂସ୍ଖଳନ ଯୋଗୁ ଏକ ନିର୍ମାଣାଧୀନ ସୁଡ଼ଙ୍ଗ (ଟନେଲ) ଭୁଶୁଡ଼ି ପଡ଼ିଛି । ଫଳରେ ୨୦ ଜଣ ଶ୍ରମିକଙ୍କ ମୃତ୍ୟୁ ଘଟିଛି । ଅନ୍ୟ ୫ ଜଣ ଏବେ ବି ଫସି ରହିଛନ୍ତି । ୧୬ ଜଣ ଶ୍ରମିକଙ୍କୁ ସୁରକ୍ଷିତ ଉଦ୍ଧାର କରାଯାଇଛି । ମୃତ ଓ ଫସି ରହିଥିବା ଶ୍ରମିକମାନେ ଝାଡ଼ଖଣ୍ଡ, ଆସାମ, ପଞ୍ଜାବ ଏବଂ ଜମ୍ମୁ-କାଶ୍ମୀରର ବାସିନ୍ଦା ।

ଏନ୍ଏଚ୍‌ପିସି ଅନୁସାରେ, ସୋମବାର ଦିନ ପ୍ରାୟ ୧.୦୪ ମିନିଟ୍‌ରେ ସମରଡୁଙ୍ଗ ନିକଟ ତିସ୍ତା ଷ୍ଟେଜ-୬ ଜଳବିଦ୍ୟୁତ ପ୍ରକଳ୍ପର ୭ କିମି ଲମ୍ବା ନିର୍ମାଣାଧୀନ ସୁଡ଼ଙ୍ଗରେ ଏହି ଦୁର୍ଘଟଣା ଘଟିଛି । ଏନ୍ଏଚ୍‌ପିସି ଲାଗି ପଟେଲ ଇଞ୍ଜିନିୟରିଂ କମ୍ପାନି ସେହି ସୁଡ଼ଙ୍ଗକୁ ନିର୍ମାଣ କରୁଛି । ଦୁର୍ଘଟଣା ସମୟରେ ସେଠାରେ ୨୭ ଜଣ ଶ୍ରମିକ କାମ କରୁଥିଲେ । ସୁଡ଼ଙ୍ଗ ଖୋଳା ଚାଲିଥିବାବେଳେ ହଠାତ୍ ଭୂସ୍ଖଳନ ହୋଇଥିଲା ଏବଂ ସୁଡ଼ଙ୍ଗ ମଧ୍ୟରେ ପଥର ଚଟାଣ ସନ୍ଧିରେ ଥିବା ମିଥେନ୍ ଗ୍ୟାସ୍ ଅଚାନକ ବିସ୍ଫୋରକ ଭାବେ ବାହାରି ଆସିଥିଲା । 

ନ୍ୟାସନାଲ ହାଇଡ୍ରୋଇଲେକ୍ଟ୍ରିକ୍ ପାୱାର କର୍ପୋରସେନ୍ (ଏନ୍ଏଚ୍ପିସି)ର ତିସ୍ତା ଷ୍ଟେଜ-୬ ଜଳବିଦ୍ୟୁତ୍ ପ୍ରକଳ୍ପର ଏହି ସୁଡ଼ଙ୍ଗ ନିର୍ମାଣ କରାଯାଉଥିଲା । ଭୂସ୍ଖଳନ ଯୋଗୁ ସୁଡ଼ଙ୍ଗ ଭୁଶୁଡ଼ି ପଡ଼ିଥିଲା । ଫଳରେ ସୁଡ଼ଙ୍ଗର ଉଭୟ ପ୍ରବେଶ ପଥ ବନ୍ଦ ହୋଇଯାଇଥିଲା । 

ସୁଡ଼ଙ୍ଗ ଭିତରେ ଫସି ରହିଥିବା ଶ୍ରମିକଙ୍କୁ ଉଦ୍ଧାର କରିବା ଲାଗି ଏନ୍ଡିଆରଏଫ୍, ଏସ୍ଡିଆରଏଫ୍, ରାଜ୍ୟ ପୁଲିସ ଏବଂ ଅଗ୍ନିଶମ ବିଭାଗ ପକ୍ଷରୁ ଅଭିଯାନ ଜାରି ରହିଛି ।  ଇତିମଧ୍ୟରେ ସୁଡ଼ଙ୍ଗ ବିସ୍ଫୋରଣ ଘଟଣାରେ ଲୋକଙ୍କ ମୃତ୍ୟୁ ନେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗଭୀର ଦୁଃଖ ପ୍ରକାଶ କରିଛନ୍ତି । 

Powered by Froala Editor