ନାଗାଲାଣ୍ଡର ମୋନ୍‌ ଜିଲ୍ଲାର ଏକାଧିକ ସ୍ଥାନରେ ରବିବାର ପ୍ରବଳ ବର୍ଷା ଯୋଗୁଁ ଘଟିଥିବା ଭୟାବହ ଭୂସ୍ଖଳନରେ ଅନେକ ଜୀବନହାନି ଘଟିଛି। ଏଥିରେ ଅତି କମରେ ୮ ଜଣଙ୍କର ମୃତ୍ୟୁ ହୋଇଛି ଏବଂ ୧୨ ଜଣ ଆହତ ହୋଇଛନ୍ତି। ମୋନ୍ ଜିଲ୍ଲା ଡେପୁଟି କମିଶନର ୱେନୟୀ କୋନ୍ୟାକ୍ କହିଛନ୍ତି, "ଏପର୍ଯ୍ୟନ୍ତ ୪ ଜଣଙ୍କ ମୃତଦେହ ଉଦ୍ଧାର କରାଯାଇଛି, ଏବଂ ଅନ୍ୟ ୪ ଜଣ ଏବେ ବି ମାଟିତଳେ ଚାପି ଅଛନ୍ତି।" ସେ କହିଛନ୍ତି ଯେ ମୋନ୍ ଜିଲ୍ଲାରେ ନିରନ୍ତର ପ୍ରବଳ ବର୍ଷା ଯୋଗୁଁ ହୋଇଥିବା ଭୂସ୍ଖଳନରେ ୮ ଜଣଙ୍କର ମୃତ୍ୟୁ ହୋଇଛି। 

ସୂଚନା ମୁତାବକ ଗତ ରାତିସାରା ପ୍ରବଳ ବର୍ଷା ଲାଗି ରହିଥିଲା ଏବଂ ସକାଳ ୬ରୁ ୭ଟା ମଧ୍ୟରେ ବିଭିନ୍ନ ସ୍ଥାନରେ ପାହାଡ଼ ଧସିଥିଲା। ବିପର୍ଯ୍ୟୟ ଯୋଗୁଁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଥିବା ବେଳେ ବ୍ୟାପକ ସରକାରୀ ଓ ଘରୋଇ ସମ୍ପତ୍ତି ନଷ୍ଟ ହୋଇଛି। 

ପ୍ରଶାସନର ସୂଚନା ଅନୁସାରେ, ଭୂସ୍ଖଳନ ପ୍ରଭାବରେ ବିଶେଷ କରି ମୋନ୍‌ ସହର ଏବଂ ଟିଜିଟ୍‌  ଅଞ୍ଚଳ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି। ବ୍ୟାପକ ମାଟି ଅତଡ଼ା ସହ ବଡ଼ ପଥର ଧସି ଆବାସିକ କ୍ଷେତ୍ରଗୁଡ଼ିକ ଉପରେ ପଡ଼ିବା ଫଳରେ ଅନେକ ପରିବାରର ବାସଗୃହ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି। ଅନେକ ସ୍ଥାନୀୟ ଲୋକେ ଅତଡ଼ା ତଳେ ଫସି ରହିଥିବା ଆଶଙ୍କା କରାଯାଉଛି। 

ବର୍ତ୍ତମାନ ସୁଦ୍ଧା ଉଦ୍ଧାରକାରୀ ଦଳ ମାଟି ଓ ଆବର୍ଜନା ତଳୁ ୪ ଜଣଙ୍କ ମୃତଦେହ ବାହାର କରିବାରେ ସଫଳ ହୋଇଛନ୍ତି, ଯେଉଁଥିରେ ୩ ଜଣ ମହିଳା ଏବଂ ଜଣେ ପୁରୁଷ ଅଛନ୍ତି। ବିପଦସଙ୍କୁଳ ଅଞ୍ଚଳରୁ ସାଧାରଣ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଉଛି।

ବିଜେପି ନାଗାଲାଣ୍ଡ ରାଜ୍ୟ ସଭାପତି ବେଞ୍ଜାମିନ୍ ୟେପଥୋମି ମୋନ୍ ଜିଲ୍ଲାରେ ଘଟିଥିବା ଦୁଃଖଦ ଭୂସ୍ଖଳନ ଉପରେ ଗଭୀର ଶୋକ ପ୍ରକାଶ କରିଛନ୍ତି, ଯେଉଁଥିରେ ଅନେକ ଲୋକଙ୍କ ଜୀବନ ଯାଇଛି ଏବଂ ମୋକୋକଚୁଙ୍ଗ ଜିଲ୍ଲାରେ ବହୁ ସଂଖ୍ୟକ ଲୋକଙ୍କୁ ଛାଡ଼ି ଦିଆଯାଇଛି। ତୁଲି ଅଞ୍ଚଳରେ ହୋଇଥିବା ଭୂସ୍ଖଳନ ଅନେକ ପରିବାର ପାଇଁ ଅତ୍ୟନ୍ତ ଦୁଃଖ ଆଣିଛି।

Powered by Froala Editor