ଶ୍ରୀ ଅମରନାଥଙ୍କ ପବିତ୍ର ଗୁମ୍ଫାରେ ଉପରାଜ୍ୟପାଳ ମନୋଜ ସିହ୍ନା 'ପ୍ରଥମ ପୂଜା' କରିଛନ୍ତି । ଫଳରେ ୫୭ ଦିନ ଧରି ଚାଲିବାକୁ ଥିବା ଅମରନାଥ ଯାତ୍ରା ଆନୁଷ୍ଠାନିକ ଭାବେ ଆରମ୍ଭ ହୋଇଛି। ଜୁଲାଇ ୩ ରେ ଯାତ୍ରା ଆରମ୍ଭ ହେବା ସହିତ ପ୍ରଶାସନ, ଶ୍ରୀ ଅମରନାଥ ମନ୍ଦିର ବୋର୍ଡ, ସେନା, ପୋଲିସ, ସୁରକ୍ଷା ବାହିନୀ, ସ୍ଥାନୀୟ ସମ୍ପ୍ରଦାୟ, ସେବା ପ୍ରଦାନକାରୀ, ସ୍ଵେଚ୍ଛାସେବକମାନେ ସମ୍ପୂର୍ଣ୍ଣ ସମନ୍ୱୟରେ କାର୍ଯ୍ୟ କରୁଛନ୍ତି। ପ୍ରତ୍ୟେକ ଅଂଶୀଦାର ସମସ୍ତ ତୀର୍ଥଯାତ୍ରୀଙ୍କ ପାଇଁ ଏକ ନିରାପଦ, ଅସୁବିଧାମୁକ୍ତ ଏବଂ ଏକ ସ୍ମରଣୀୟ ତୀର୍ଥଯାତ୍ରା ସୁନିଶ୍ଚିତ କରିବା ପାଇଁ ସମର୍ପିତ।

ଉପରାଜ୍ୟପାଳ 'ବାବା ବର୍ଫାନି'ଙ୍କ ଦିବ୍ୟ ଆଶୀର୍ବାଦ କାମନା କରିଥିଲେ ଏବଂ ସମସ୍ତଙ୍କ ଶାନ୍ତି, ସମୃଦ୍ଧି, ସ୍ୱାସ୍ଥ୍ୟ ଏବଂ କଲ୍ୟାଣ ପାଇଁ ପ୍ରାର୍ଥନା କରିଥିଲେ। ସେ ବାବା ବର୍ଫାନିଙ୍କ ସମସ୍ତ ଭକ୍ତଙ୍କୁ ନିମନ୍ତ୍ରଣ ଜଣାଇଥିଲେ। ସେମାନଙ୍କୁ ବହୁ ସଂଖ୍ୟାରେ ପବିତ୍ର ତୀର୍ଥଯାତ୍ରାରେ ଯୋଗଦେବା ଏବଂ ଆଧ୍ୟାତ୍ମିକ ଯାତ୍ରାର ଅନୁଭବ କରିବାକୁ ଉତ୍ସାହିତ କରିଥିଲେ।  ଆଧ୍ୟାତ୍ମିକ ପରିପୂର୍ଣ୍ଣ ଯାତ୍ରା ପାଇଁ ଭକ୍ତମାନଙ୍କୁ ସ୍ୱାଗତ କରିବାକୁ ସମ୍ପୂର୍ଣ୍ଣ ପ୍ରସ୍ତୁତ ବୋଲି ଉପରାଜ୍ୟପାଳ କହିଥିଲେ।

ଶ୍ରୀ ଅମରନାଥ ମନ୍ଦିର ବୋର୍ଡ (SASB) ପ୍ରତିବର୍ଷ ଜ୍ୟେଷ୍ଠ ପୂର୍ଣ୍ଣିମାରେ ପବିତ୍ର ଗୁମ୍ଫାରେ ପ୍ରଥମ ପୂଜା ଆୟୋଜନ କରିଥାଏ। ଚଳିତ ବର୍ଷ ୫୭ ଦିନିଆ ତୀର୍ଥଯାତ୍ରା ଜୁଲାଇ ୩ ତାରିଖରେ ଆନୁଷ୍ଠାନିକ ଭାବରେ ଆରମ୍ଭ ହେବ । ଏହି ଯାତ୍ରା ଅଗଷ୍ଟ ୨୮ ତାରିଖରେ ରକ୍ଷା ବନ୍ଧନ ଦିନ ଶେଷ ହେବ।

Powered by Froala Editor