ଭୁବନେଶ୍ୱର: ପୁରୀକୁ ସ୍ୱଛ ଓ ବିଶୁଦ୍ଧ ଜଳ ଯୋଗାଇ ଦେବାକୁ ଆରମ୍ଭ ହୋଇଛି ସୁଜଳ ପ୍ରୋଜେକ୍ଟ । ଏହା ଦେଶର ପ୍ରଥମ ଡ୍ରିଙ୍କ୍ ଫ୍ରମ୍ ଟାପ୍ ପ୍ରକଳ୍ପ । ଦେଶର କୌଣସି ସହରରେ ଏଭଳି ସୁବିଧା ଉପଲବ୍ଧ ନଥିବା ବେଳେ ଓଡ଼ିଶା ପ୍ରଥମ ରାଜ୍ୟ ଭାବେ ପୁରୀରେ ଏହି ସୁବିଧା ଯୋଗାଇ ଦେଇଛି । ଏହି ଯୋଜନା ଯୋଗୁଁ ପୁରୀ ସହରର ପାଖାପାଖି ଅଢେଇ ଲକ୍ଷ ବାସିନ୍ଦା ବିଶୁଦ୍ଧ ପାନୀୟ ଜଳ ପାଇବେ । ସିଧାସଳଖ ପାଇପରୁ ପାଣି ନେଇ ପିଇ ପାରିବେ ଓ ରୋଷେଇ କରିପାରିବେ । ପାଣିକୁ ପୁଣିଥରେ ବିଶୋଧନ କରିବାକୁ ପଡିବ ନାହିଁ । ଆରଓ କିମ୍ବା ଫିଲ୍ମଟର ଆବଶ୍ୟକତା ନାହିଁ ।

ଦେଶର ବଡ଼ ବଡ଼ ମେଟ୍ରୋ ଏଭଳି ସୁବିଧା ନିଜ ନାଗରିକଙ୍କୁ ଏପର୍ୟ୍ୟନ୍ତ ଯୋଗାଇ ପାରିନଥିବା ବେଳେ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ଉଦ୍ୟମ ଏବେ  ଚର୍ଚ୍ଚାର ପ୍ରସଙ୍ଗ ପାଲଟିଛି ।

ପୁରୀରେ ଆରମ୍ଭ ହୋଇଥିବା ଡ୍ରିଙ୍କ ଫର୍ମ ଟ୍ୟାପ୍ ମଡେଲ ପାନୀୟ ଜଳ ଯୋଗାଣ ବ୍ୟବସ୍ଥାକୁ ପ୍ରଶଂସା କରିଛି କେନ୍ଦ୍ର ଗୃହ ଓ ନଗର ଉନ୍ନୟନ ମନ୍ତ୍ରାଳୟ । ଦେଶର ଅନ୍ୟ ସହରଗୁଡିକ ଏହାକୁ ଅନୁକରଣ କରିବା ପାଇଁ ମତ ଦେଇଛନ୍ତି କେନ୍ଦ୍ର ଗୃହ ଓ ନଗର ଉନ୍ନୟନ ସଚିବ ଦୁର୍ଗାଶଙ୍କର ମିଶ୍ର ।

ସୋମବାର ଦିନ ପୁରୀରେ ଏହି ଆକାଂକ୍ଷିତ ପ୍ରକଳ୍ପ ଉଦଘାଟିତ ହୋଇଛି । ଦେଶର ପ୍ରଥମ ସହର ଭାବେ ପୁରୀରେ ୨୪ ଘଂଟିଆ ବିଶୁଦ୍ଧ ଓ ଉଚ୍ଚମାନର ଜଳ ଯୋଗାଇ ଦିଆଯାଉଛି । ପୁରୀରେ ଶହେ ପ୍ରତିଶତ ଘରେ ମିଟର ଲଗାଯାଇ ଦିନରାତି ବିଶୁଦ୍ଧ ପାନୀୟ ଜଳ ଯୋଗାଇ ଲଣ୍ଡନ, ସିଙ୍ଗାପୁର ଓ ନ୍ୟୁୟର୍କ ଭଳି ବିଶ୍ୱସ୍ତରୀୟ ସହରଗୁଡିକ ସହ ଏହି ସହର ସମକକ୍ଷ ହୋଇପାରିଛି । ଦିଲ୍ଲୀର ଅଧୀକ୍ଷଣ ଯନ୍ତ୍ରୀ ମଧ୍ୟ ପୁରୀର ବିଭିନ୍ନ ସ୍ଥାନ ପରିଦର୍ଶନ କରି ଏହି ଅତ୍ୟାଧୁନିକ ଜଳ ଯୋଗାଣ ବ୍ୟବସ୍ଥାର ପ୍ରଶଂସା କରିଛନ୍ତି ।

Powered by Froala Editor