ଭୁବନେଶ୍ୱର : ଦିଲ୍ଲୀର ଜଣେ ପ୍ରତିଷ୍ଠିତ ବ୍ୟକ୍ତିଙ୍କ ଘରୁ ୭୦ ଲକ୍ଷ ଟଙ୍କାର ସୁନା ଓ ହୀରା ଅଳଙ୍କାର ଚୋରି କରିବା ଅଭିଯୋଗରେ ଭୁବନେଶ୍ୱରର ଜଣେ ମହିଳା ଧରା ପଡ଼ିଛନ୍ତି । ସେ ହେଉଛନ୍ତି ସାଲିଆ ସାହିର ସୁଜାତା ମହାପାତ୍ର । କମିଶନରେଟ ପୁଲିସ ସହଯୋଗରେ ତାଙ୍କୁ ରାଜମହଲ ଛକର ଏକ ହୋଟେଲରୁ ଉଠାଇ ନେଇଛି ଦିଲ୍ଲୀ ପୁଲିସ । ତାଙ୍କଠାରୁ ଚୋରି  ଅଳଙ୍କାର ଜବତ ହୋଇଛି । ପୁଲିସ ଠାରୁ ମିଳିଥିବା ସୂଚନା ମୁତାବକ, ସୁଜାତା ତାଙ୍କର ଜଣେ ପୁରୁଷ ବନ୍ଧୁଙ୍କ ସହ ଦିଲ୍ଲୀର ଜଣେ ବ୍ୟକ୍ତିଙ୍କ ଘରେ ମେଡ ସର୍ଭାଣ୍ଟ ଭାବେ କାମ କରୁଥିଲେ । ୧୫ ଦିନ ତଳେ ଘର ମାଲିକ ସପରିବାର ଏକ ବିବାହ ଭୋଜିରେ ଯୋଗ ଦେବାକୁ ଯାଇଥିଲେ । ଘରେ ଥିବା ସୁଜାତା ଏହାର ସୁଯୋଗ ନେଇଥିଲେ । ସୁଜାତା ଓ ତାଙ୍କର ପୁରୁଷ ବନ୍ଧୁ ମିଶି ମାଲିକଙ୍କ ଘରେ କଳାକନା ବୁଲାଇ ଦେଇଥିଲେ । ମୂଲ୍ୟବାନ ଅଳଙ୍କାର ସବୁ ଉଠାଇ ଭୁବନେଶ୍ୱର ପଳାଇ ଆସିଥିଲେ । ଘର ମାଲିକ ଫେରିବା ପରେ ଚୋରି ହୋଇଥିବା ଜାଣି ପାରିଥିଲେ । ସୁଜାତା ଘରେ ନଥିବାରୁ ତାଙ୍କ ଉପରେ ସନେ୍ଦହ ଉପୁଜିଥିଲା । ତେଣୁ ସେ ନୂଆଦିଲ୍ଲୀର ଏକ ଥାନାରେ ଏତଲା ଦେଇଥିଲେ । ମଙ୍ଗଳବାର ଦିଲ୍ଲୀ ପୁଲିସର ୩ ଜଣିଆ ଟିମ ସୁଜାତାଙ୍କୁ ସ୍ଥାନୀୟ ଏସଡିଜେଏମ କୋର୍ଟରେ ହାଜର କରି ଟ୍ରାଞ୍ଜିଟ ରିମାଣ୍ଡରେ ନେଇଛି । ଏହି ଘଟଣାରେ ସମ୍ପୃକ୍ତ ମାଷ୍ଟର ମାଇଣ୍ଡ ପୁରୁଷ ବନ୍ଧୁ ଫେରାର ଅଛନ୍ତି ।

Powered by Froala Editor