ବିଦ୍ୟୁତ୍ ସଞ୍ଚାରଣ ବ୍ୟବସ୍ଥା କ୍ଷେତ୍ରରେ ଓଡ଼ିଶା ଠାରୁ ଢେର୍ ଅଗ୍ରଗତି କରିଛି ଆନ୍ଧ୍ର
ଭୁବନେଶ୍ବର: କେବଳ ମୁଣ୍ଡପିଛା ବିଜୁଳି ଖର୍ଚ୍ଚ ଓ ଉପଭୋକ୍ତା କ୍ଷେତ୍ରରେ ନୁହେଁ, ବିଦ୍ୟୁତ୍ ଭିତ୍ତିଭୂମି (ବିତରଣ ଓ ସଞ୍ଚାରଣ)ରେ ବି ଆନ୍ଧ୍ରପ୍ରଦେଶ ଓଡ଼ିଶାଠୁ ଢେର୍ ଆଗରେ ରହିଛି। ଓଡ଼ିଶାର ସର୍ବମୋଟ୍ ୪.୫୬ ଲକ୍ଷ କି.ମି. ବିଦ୍ୟୁତ୍ ଲାଇନ୍ ଥିବାବେଳେ ଆନ୍ଧ୍ରପ୍ରଦେଶରେ ୭.୧୩ ଲକ୍ଷ କି.ମି. ରହିଛି। କେନ୍ଦ୍ର ଶକ୍ତି ମନ୍ତ୍ରଣାଳୟ ଅଧୀନରେ କାର୍ଯ୍ୟ କରୁଥିବା କେନ୍ଦ୍ରୀୟ ବିଦ୍ୟୁତ ପ୍ରାଧିକରଣ (ସିଇଏ)ର ସଦ୍ୟ ପ୍ରକାଶିତ ସର୍ବଭାରତୀୟ ବିଦ୍ୟୁତ୍ ତଥ୍ୟ ରିପୋର୍ଟରୁ ଏହା ଜଣାପଡ଼ିଛି। ରିପୋର୍ଟ ଅନୁଯାୟୀ, ବିଦ୍ୟୁତ୍ ବିତରଣ କ୍ଷେତ୍ରରେ ଓଡ଼ିଶା ୧୬,୩୨୦ ଏମ୍ଭିଏ କ୍ଷମତାର ସମୁଦାୟ ୩.୦୭ ଲକ୍ଷ ଟ୍ରାନ୍ସଫର୍ମର ସ୍ଥାପନ କରିଥିବା ବେଳେ ଆନ୍ଧ୍ର ୪୫,୪୭୮ ଏମ୍ଭିଏ କ୍ଷମତାର ୧୩.୯୫ ଲକ୍ଷ ଟ୍ରାନ୍ସଫର୍ମର ସ୍ଥାପନ କରିଛି। ୩୩ କେଭି ଲାଇନ କ୍ଷେତ୍ରରେ ଓଡ଼ିଶା ସମୁଦାୟ ୧୭,୨୩୨ କି.ମି. ନିର୍ମାଣ କରିଥିବା ବେଳେ ଆନ୍ଧ୍ର ନିର୍ମାଣ କରିଛି ୩୦,୪୮୫ କି.ମି.। ସେହିପରି ୧୧ କେଭି ଲାଇନ କ୍ଷେତ୍ରରେ ଓଡ଼ିଶା ସମୁଦାୟ ୧.୭୯ ଲକ୍ଷ କି.ମି. ନିର୍ମାଣ କରିଥିବାବେଳେ ଆନ୍ଧ୍ର ନିର୍ମାଣ କରିଛି ୨.୮୩ ଲକ୍ଷ କି.ମି.। ଏଲ୍ଟି ଲାଇନ କ୍ଷେତ୍ରରେ (୫୦୦ ଭୋଲ୍ଟ ମଧ୍ୟରେ) ଓଡ଼ିଶା ସମୁଦାୟ ୨.୩୧ ଲକ୍ଷ କି.ମି. ନିର୍ମାଣ କରିଥିବା ବେଳେ ଆନ୍ଧ୍ର ୩.୪୪ ଲକ୍ଷ କି.ମି. କରିଛି।
ଆଶ୍ଚର୍ଯ୍ୟର କଥା ଆନ୍ଧ୍ର ସମୁଦାୟ ୨୨,୬୬୯ କି.ମି. ୬.୬/୪.୪ କେଭି ଲାଇନ ନିର୍ମାଣ କରିଥିବାବେଳେ ଓଡ଼ିଶାରେ ଆଦୌ ହୋଇନାହିଁ। ସେହିପରି ବିଦ୍ୟୁତ୍ ସଞ୍ଚାରଣ ବ୍ୟବସ୍ଥା କ୍ଷେତ୍ରରେ ଓଡ଼ିଶା ଠାରୁ ଆନ୍ଧ୍ର ଢେର୍ ଅଗ୍ରଗତି କରିଛି। ଓପିଟିସିଏଲ୍ ଓଡ଼ିଶାରେ ମୋଟ ୩୦୫ କି.ମି. ଦୂରତାର ୭୬୫ କେଭି ଲାଇନ୍ ନିର୍ମାଣ କରିଥିବାବେଳେ ଆନ୍ଧ୍ର ନିର୍ମାଣ କରିଛି ୩୬୪ କି.ମି.।
ସେହିପରି ୪୦୦ କେଭି, ୨୨୦ କେଭି ଓ ୧୩୨ କେଭି ଲାଇନ କ୍ଷେତ୍ରରେ ଓଡ଼ିଶା ଯଥାକ୍ରମେ ୨,୮୦୦ କି.ମି., ୧୨,୮୭୮ କି.ମି. ଓ ୧୧,୯୯୬ କି.ମି. ନିର୍ମାଣ କରିଥିବାବେଳେ ଆନ୍ଧ୍ର ନିର୍ମାଣ କରିଛି ଯଥାକ୍ରମେ ୫,୬୧୧ କି.ମି., ୧୩,୨୩୩ କି.ମି. ଓ ୧୪,୦୮୬ କି.ମି.। ଓଡ଼ିଶା ସ୍ଥାପନ କରିଥିବା ଷ୍ଟେପ୍-ଅପ୍ ଓ ଷ୍ଟେପ୍-ଡାଉନ୍ ଟ୍ରାନ୍ସଫର୍ମର କ୍ଷମତା ଯଥାକ୍ରମେ ୫,୪୯୬ ଏମଭିଏ ଓ ୪୦,୩୫୬ ଏମଭିଏ ରହିଥିବାବେଳେ ଆନ୍ଧ୍ର ସ୍ଥାପନ କରିଛି ଯଥାକ୍ରମେ ୧୮,୮୪୮ ଏମଭିଏ ଓ ୧,୦୦,୭୩୬ ଏମଭିଏ।
Powered by Froala Editor
