ଭୁବନେଶ୍ୱର : ଏଆଇସିସିରୁ ଡକରା ପାଇ ଦିଲ୍ଲୀ ଯାଇଛନ୍ତି ଚିରଞ୍ଜିବୀ ବିଶ୍ୱାଳ  । ସେଠାରେ ବହୁ ବରିଷ୍ଠ ନେତାଙ୍କ ସହ ସେ ଆଲୋଚନା କରିବାର କାର୍ଯ୍ୟକ୍ରମ ରହିଛି । କମଲନାଥ ଓ ଗୁଲାମ ନବୀ ଆଜାଦଙ୍କୁ ଭେଟି ରାଜ୍ୟର ସାଂଗଠନିକ ସ୍ଥିତି ନେଇ ଆଲୋଚନା କରିବେ ବୋଲି ଜାଣିବାକୁ ମିଳିଛି  । ଅପରପକ୍ଷରେ ଅନ୍ୟ ଏକ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଆସନ୍ତା ୨୮ରେ ଚିରଞ୍ଜିବୀ ରାହୁଲ ଗାନ୍ଧୀଙ୍କୁ ଭେଟିବେବୋଲି ଜଣାପଡ଼ିଛି  । ସେହିପରି ୨୯ରେ ସେ ସୋନିଆ ଗାନ୍ଧୀଙ୍କ ସହ ବି ସାକ୍ଷାତ ଆଲୋଚନା କରିବେ  ।

ଚିରଞ୍ଜିବୀ ପ୍ରଦେଶ କଂଗ୍ରେସ ସଭାପତି ହେବେବୋଲି ଚର୍ଚ୍ଚା ଏବେ ଜୋର ଧରିଛି  । ଫଳରେ ଏକଦା ପିସିସି ସଭାପତି ହେବା ପାଇଁ ଆଶାୟୀ ମହମ୍ମଦ ମୁକିମଙ୍କ ଗୋଷ୍ଠୀକୁ ଧକ୍କା ଲାଗିଛି  । ତେବେ କଂଗ୍ରେସରେ ଜଣେ ବରିଷ୍ଠ ନେତାଙ୍କ କହିବାନୁଯାୟୀ, ଚିରଞ୍ଜିବୀ ନିଜେ ମଧ୍ୟ ସଭାପତି ହେବାକୁ ଚାହୁଁନାହାନ୍ତି  । ସମ୍ପ୍ରତି କଂଗ୍ରେସର ସାଂଗଠନିକ ସ୍ଥିତି ସୁଦୃଢ଼ ନଥିବାବେଳ ଆଗକୁ ପଂଚାୟତ ନିର୍ବାଚନ ଆସୁଛି  । ୨୦୨୨ରେ ପଂଚାୟଚ ଓ ପୌର ନିର୍ବାଚନ ହେବବୋଲି କୁହାଯାଉଛି । ହାତରେ ଆଉ ଅଳ୍ପ ସମୟ ଥିବାରୁ ପିସିସି ସଭାପତି ହେବାପାଇଁ ଚିରଞ୍ଜିବୀଙ୍କର ସେତେଟା ଆଗ୍ରହ ନାହିଁ  । କାହିଁକିନା ପଂଚାୟତ ନିର୍ବାଚନରେ ଦଳର ପରାଜୟର ବୋଝ ତାଙ୍କ ଉପରେ ହିଁ ଲଦି ହେବାର ଆଶଙ୍କା ରହିଛି । ତେଣୁ ସେ ବି ଚାହୁଁଛନ୍ତି ନିରଞ୍ଜନ ପଟ୍ଟନାୟକ ପୂର୍ବଭଳି ସଭାପତି ରୁହନ୍ତି  । ପଂଚାୟତ ନିର୍ବାଚନ ପରେ ହିଁ ନୂତନ ପିସିସି ସଭାପତି ହେବା ପାଇଁ  ସେ ଆଗ୍ରହୀ ବୋଲି କୁହାଯାଉଛି  । ଅତଏବ ଅନ୍ୟ ନେତାଙ୍କ ଭଳି ସେ ମଧ୍ୟ ନିରଞ୍ଜନ ପଟ୍ଟନାୟକ ପିସିସି ସଭାପତି ହୁଅନ୍ତୁ ବୋଲି ଚାହୁଁଥିବା ଜଣାପଡ଼ିଛି  ।

Powered by Froala Editor