ଭୁବନେଶ୍ୱର : ବିଜୁ ଜନତା ଦଳକୁ ଆୟକର ବିଭାଗ ପକ୍ଷରୁ ନୋଟିସ ଦିଆଯାଇଛି  । ତେବେ ଆୟକର ବିଭାଗ ନୋଟିସକୁ ଚାଲେଞ୍ଜ କରି ବିଜୁ ଜନତା ଦଳ (ବିଜେଡି)ଦାୟର କରିଥିବା ମାମଲାରେ ହାଇକୋର୍ଟ ଅନ୍ତରୀଣ ଅଙ୍କୁଶ ଜାରି କରିଛନ୍ତି । ମାମଲାରେ ଦୁଇ ସପ୍ତାହ ଭିତରେ ଜବାବ ଦାଖଲ ପାଇଁ ଆୟକର ବିଭାଗକୁ ହାଇକୋର୍ଟ ନିଦେ୍ର୍ଧଶ ଦେଇଛନ୍ତି । ଏଥିସହିତ ୨୦୨୧, ମେ ୬ ଓ ମେ ୨୦ର ନୋଟିସ୍ ଆଧାରରେ ଆବେଦନକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ପାରିବନାହିଁ ବୋଲି ହାଇକୋର୍ଟ ଅନ୍ତରୀଣ ନିଦେ୍ର୍ଧଶ ଦେଇଛନ୍ତି ।

ମୁଖ୍ୟ ବିଚାରପତି ଡକ୍ଟର ଜଷ୍ଟିସ ଏସ.ମୁରଲୀଧର ଓ ଜଷ୍ଟିସ ବି.ପି.ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ବିଜେଡି ପକ୍ଷରୁ କୋଷାଧ୍ୟକ୍ଷ ଓ ଅନ୍ୟ ଜଣେ ଦାୟର କରିଥିବା ମାମଲାର ଶୁଣାଣି କରି ଏପରି ନିଦେ୍ର୍ଧଶ ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଅଗଷ୍ଟ ୨୩କୁ ଧାର୍ଯ୍ୟ କରାଯାଇଛି । ମାମଲାର ବିବରଣୀରୁ ପ୍ରକାଶ ଯେ ୨୦୧୪-୧୫ ଆୟକର ଆକଳନ ବର୍ଷରେ ବିଜୁ ଜନତା ଦଳକୁ ଡୋନେସନ ବାବଦରେ ମୁମ୍ବାଇର ଏକ ସଂସ୍ଥା ନିକଟରୁ ମିଳିଥିବା ଅର୍ଥ ଉପରେ ଆୟକର ପଇଠ ପ୍ରସଂଗକୁ ନେଇ ଆୟକର ବିଭାଗ ମେ ୬ରେ ନୋଟିସ ଜାରି କରିଥିଲା । ଏହି ନୋଟିସକୁ ଚାଲେଞ୍ଜ କରି ବିଜୁ ଜନତା ଦଳ କୋଷାଧ୍ୟକ୍ଷ ଓ ଅନ୍ୟ ଜଣଙ୍କ ପକ୍ଷରୁ ଦାୟର ମାମଲାରେ ଦର୍ଶାଯାଇଥିଲା ଯେ ଆଇନ ଦ୍ୱାରା ନିର୍ଦ୍ଧାରିତ ସମୟ ପରେ ଏପରି ନୋଟିସ୍ ଜାରି କରାଯିବା ବୈଧ ନୁହେଁ । 

Powered by Froala Editor