ଭଦ୍ରକ: କରୋନା କାଳରେ ମାତିଛନ୍ତି ଧଳାଜହର ବେପାରୀ । ବାରମ୍ବାର ଚଢଉ ଓ ଧରପଗଡ଼ ସତ୍ତ୍ୱେ  ଏହି ବେପାର କମିବା ବଦଳରେ ବଢୁଛି । ଏହି କ୍ରମରେ  ଭଦ୍ରକ ଜିଲ୍ଲା ପୋଲିସ କବଜାରେ ପଡିଛନ୍ତି ବ୍ରାଉନ ସୁଗାର ମାଫିଆ । ଜିଲ୍ଲାରୁ ୧ କୋଟିରୁ ଅଧିକ ମୂଲ୍ୟର ବ୍ରାଉନସୁଗାର ଜବତ କରାଯାଇଛି । ଏହି ନିଶାଦ୍ରବ୍ୟ ଜଳେଶ୍ବରରୁ ଚାଲାଣ ହେଉଥିଲା । ଘଟଣାରେ ୪ ଜଣଙ୍କୁ ଗିରଫ କରିଛି ପୋଲିସ ।

 ଜବତ ବ୍ରାଉନସୁଗାରର ଓଜନ ୧ କିଲୋ ୯୦ ଗ୍ରାମ ହୋଇଥିବା ବେଳେ ବ୍ରାଉନସୁଗାରର ମୂଲ୍ୟ ୧ କୋଟିରୁ ଅଧିକ ଟଙ୍କା ବୋଲି ଜଣାପଡିଛି । ଜଳେଶ୍ବରର ବ୍ରାଉନସୁଗାର ମାଫିଆ ଚାଚିର ଭାଇ ଓ ମୋଷ୍ଟ ୱାଣ୍ଟେଡ଼ ଏସକେ ଅସଗରର ଶ୍ୱଶୁର ଏସକେ ଅବଦୁଲ ହମିଦ ମଧ୍ୟ ଗିରଫ ହୋଇଛନ୍ତି । ଘଟଣାରେ ମୋଟ ୪ ଜଣଙ୍କୁ ଗିରଫ କରିଛି ପୋଲିସ ।  ଏହି ନିଶାଦ୍ରବ୍ୟଗୁଡିକ ଅଟୋରେ ଭଦ୍ରକ ଆଣୁଥିବା ବେଳେ ୧୬ ନମ୍ବର ଜାତୀୟ ରାଜପଥର ଚରମ୍ପା ନିକଟସ୍ଥ ଧାମରା ରେଳ ଓଭରବ୍ରିଜ ନିକଟରେ ଗ୍ରାମାଞ୍ଚଳ ପୋଲିସ ଏହାକୁ ଜବତ କରିଛି ।ଘଟଣାସ୍ଥଳରେ ହିଁ ଅଟୋରେ ଥିବା ୪ ଜଣଙ୍କୁ ଗିରଫ କରିଥିଲା ପୋଲିସ । ଗିରଫଙ୍କ ମଧ୍ୟରେ ଜଣେ ମହିଳା ରହିଛନ୍ତି । ଅଟୋ ସହ ନଗଦ ୧ ଲକ୍ଷ ଟଙ୍କା ଜବତ ହୋଇଛି । ଗିରଫ ହୋଇଥିବା ଅନ୍ୟମାନଙ୍କ ମଧ୍ୟରେ ବାଲେଶ୍ୱର ଜିଲ୍ଲା ଖଇରା ଥାନା ଉଦୟପୁର ଗାଁର ମନୋଜ ଦାସ, ଭଦ୍ରକ ଗ୍ରାମାଞ୍ଚଳ ଥାନା ବରାଳପୋଖରୀ ଗାଁର କୁନିଲତା ଷଡଙ୍ଗୀ ଓ ଅଜୟ କୁମାର ଷଡଙ୍ଗୀଙ୍କୁ ମଧ୍ୟ ପୋଲିସ ଗିରଫ କରିଛି ।

Powered by Froala Editor