ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ୫୦ ପ୍ରତିଶତ ଟାରିଫ ପରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ କହିଛନ୍ତି ଯେ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ଖୁବ ଶୀଘ୍ର ଭାରତ ଗସ୍ତରେ ଆସିବେ। ମସ୍କୋରେ ଥିବା ଡୋଭାଲ ତାରିଖ ଉଲ୍ଲେଖ କରି ନାହାଁନ୍ତି, କିନ୍ତୁ ଇଣ୍ଟରଫ୍ୟାକ୍ସ ନ୍ୟୁଜ ଏଜେନ୍ସି ଅନୁଯାୟୀ, ପୁଟିନଙ୍କ ଗସ୍ତ ଅଗଷ୍ଟ ଶେଷ ଭାଗରେ ହେବାର ସମ୍ଭାବନା ଅଛି।

ଡୋଭାଲ କହିଛନ୍ତି, ରାଷ୍ଟ୍ରପତି ପୁଟିନ ଏହି ବର୍ଷ ଶେଷରେ ଭାରତ ଆସିପାରନ୍ତି। ତେବେ ଚାରି ବର୍ଷ ପରେ ପୁଟିନଙ୍କ ଏହା ପ୍ରଥମ ଭାରତ ଗସ୍ତ ହେବ। ରାଷ୍ଟ୍ରପତି ପୁଟିନ ପ୍ରଧାନମନ୍ତ୍ରୀ ମୋଦିଙ୍କ ସହିତ ଏକ ବଡ଼ ରଣନୀତି ପ୍ରସ୍ତୁତ କରିବେ ବୋଲି ଆଶା କରାଯାଉଛି।

ଭାରତର ଏନଏସଏ ଅଜିତ ଡୋଭାଲ ତାଙ୍କ ମସ୍କୋ ଗସ୍ତ ସମୟରେ କହିଛନ୍ତି ଯେ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଭାରତ ଗସ୍ତର ତାରିଖ ଉପରେ ବିଚାର କରାଯାଉଛି । ଏନଏସଏ ତାଙ୍କ ବୈଠକରେ କୌଣସି ନିର୍ଦ୍ଦିଷ୍ଟ ତାରିଖ କିମ୍ବା ସମୟ ସୂଚିତ କରିନାହାଁନ୍ତି।

ଏନଏସଏ ଅଜିତ ଡୋଭାଲ କହିଛନ୍ତି, ‘ଭାରତ ଏବଂ ରୁଷିଆ ମଧ୍ୟରେ ଏକ ବିଶେଷ ସମ୍ପର୍କ ଅଛି, ଯାହାକୁ ଆମେ ବହୁତ ଗୁରୁତ୍ୱ ଦେଉଛୁ। ଆମର ଉଚ୍ଚସ୍ତରୀୟ ଯୋଗାଯୋଗ ହୋଇଛି। ରାଷ୍ଟ୍ରପତି ପୁଟିନଙ୍କ ଭାରତ ଗସ୍ତ ବିଷୟରେ ଜାଣି ଆମେ ବହୁତ ଉତ୍ସାହିତ ଏବଂ ଖୁସି। ମୁଁ ଭାବୁଛି ଏବେ ତାରିଖ ମଧ୍ୟ ଶୀଘ୍ର ସ୍ଥିର କରାଯିବ।’

ପୁଟିନଙ୍କ ଭାରତ ଗସ୍ତ ଏପରି ଏକ ସମୟରେ ହେବ ଯେତେବେଳେ ଆମେରିକା ରୁଷିଆ ତୈଳ କ୍ରୟ ବନ୍ଦ କରିବା ପାଇଁ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ କରିଛି। ଟ୍ରମ୍ପ ଚେତାବନୀ ଦେଇଛନ୍ତି ଯେ ଯଦି ମସ୍କୋ ଶୁକ୍ରବାର (୮ ଅଗଷ୍ଟ, ୨୦୨୫) ସୁଦ୍ଧା ୟୁକ୍ରେନରେ ଯୁଦ୍ଧ ବନ୍ଦ କରିବାକୁ ରାଜି ନ ହୁଏ, ତେବେ ସେ ରୁଷୀୟ ତୈଳ କ୍ରେତାଙ୍କ ଉପରେ ଦ୍ୱିତୀୟ ଶୁଳ୍କ ଲାଗୁ କରିବେ।

ରୁଷୀୟ ରାଷ୍ଟ୍ରପତିଙ୍କ ବୈଦେଶିକ ବ୍ୟାପାର ପରାମର୍ଶଦାତା ୟୁରି ଉଶାକୋଭ କହିଛନ୍ତି ଯେ ଉଭୟ ଦେଶ ଏକ ବୈଠକ ପାଇଁ ପ୍ରସ୍ତୁତି କରୁଛନ୍ତି। ସେ କହିଛନ୍ତି ଯେ ଟ୍ରମ୍ପ ଏବଂ ପୁଟିନ କେଉଁ ସ୍ଥାନରେ ସାକ୍ଷାତ କରିବେ ତାହା ସହମତ ହୋଇଛି, ଯାହା ପରେ ଘୋଷଣା କରାଯିବ।

Powered by Froala Editor