ଭୁବନେଶ୍ୱର : ସାରା ଦେଶରେ ଶିକ୍ଷକଙ୍କଠାରୁ ଅଧିକ ଅଛନ୍ତି ଶିକ୍ଷୟିତ୍ରୀ । ୟୁନିଫାଏଡ ଡିଷ୍ଟ୍ରିକ୍ଟ ଇନଫରମେସନ ଅନ ସ୍କୁଲ ଏଜୁକେସନ ପକ୍ଷରୁ ୨୦୧୯ ମସିହାର ତଥ୍ୟ ଆଧାରରେ ଏହି ରିପୋର୍ଟ ଜାରି ହୋଇଛି । କାର୍ଯ୍ୟରତ ୯୬.୮ ଲକ୍ଷ ଶିକ୍ଷକ-ଶିକ୍ଷୟିତ୍ରୀଙ୍କ ମଧ୍ୟରୁ ସମୁଦାୟ ୪୯.୨ ଲକ୍ଷ ଶିକ୍ଷୟିତ୍ରୀ କାର୍ଯ୍ୟ କରିବା ଦେଶ ପାଇଁ ଶୁଭ ସୂଚନା ବୋଲି ବିଶେଷଜ୍ଞମାନେ କହିଛନ୍ତି । ସୂଚନା ଅନୁଯାୟୀ, ପ୍ରଥମ ଥର ପାଇଁ ସଂଖ୍ୟା ଦୃଷ୍ଟିରୁ ଶିକ୍ଷକଙ୍କୁ ଶିକ୍ଷୟିତ୍ରୀ ଟପି ଯାଇଛନ୍ତି । ୨୦୧୨ ମସିହାରେ ଦେଶରେ ସମୁଦାୟ ୪୨.୪ ଲକ୍ଷ ଶିକ୍ଷକ ଓ ୩୫.୮ ଶିକ୍ଷୟିତ୍ରୀ ଥିଲେ । ୭ ବର୍ଷ ମଧ୍ୟରେ ଶିକ୍ଷୟିତ୍ରୀଙ୍କ ସଂଖ୍ୟା ୩୭ ପ୍ରତିଶତ ଅର୍ଥାତ ୧୩ ଲକ୍ଷ ବୃଦ୍ଧି ପାଇଛି । କେବଳ ପ୍ରାଥମିକ ଶିକ୍ଷାସ୍ତରରେ ଏହି ସ୍ଥିତି ରହିଛି । ଉଚ୍ଚ ପ୍ରାଥମିକ ଶିକ୍ଷାରେ ଶିକ୍ଷକଙ୍କ ଆଧିପତ୍ୟ ଜାରି ରହିଛି । ପ୍ରାଥମିକ ଶିକ୍ଷା ପୂର୍ବରୁ ଅର୍ଥାତ କେଜି, ନର୍ସରିରେ ଅଧିକ ସଂଖ୍ୟକ ଶିକ୍ଷୟିତ୍ରୀ ଅଛନ୍ତି । ଏଠାରେ ୧ ଲକ୍ଷ ଶିକ୍ଷୟିତ୍ରୀ, ୨୭ ହଜାର ଶିକ୍ଷକ ଅଛନ୍ତି । ପ୍ରାଥମିକ ସ୍ତରରେ ୧୯.୬ ଲକ୍ଷ ଶିକ୍ଷୟିତ୍ରୀ, ୧୫.୭ ଲକ୍ଷ ଶିକ୍ଷକ ଅଛନ୍ତି । ଉଚ୍ଚ ପ୍ରାଥମିକ ଶ୍ରେଣୀରେ ୧୧.୫ ଲକ୍ଷ ଶିକ୍ଷକ, ୧୦.୬ ଲକ୍ଷ ଶିକ୍ଷୟିତ୍ରୀ ରହିଛନ୍ତି । ଏହାପରଠାରୁ ଅନ୍ୟ ବୃତ୍ତି ଭଳି ଶିକ୍ଷା କ୍ଷେତ୍ରରେ ମଧ୍ୟ ମହିଳା-ପୁରୁଷଙ୍କ ବ୍ୟବଧାନ ବଢ଼ିଚାଲିଛି । ମାଧ୍ୟମିକ ସ୍କୁଲରେ ୬.୩ ଲକ୍ଷ ଶିକ୍ଷକ, ୫.୨ ଲକ୍ଷ ଶିକ୍ଷୟିତ୍ରୀ, ଉଚ୍ଚ ମାଧ୍ୟମିକ କ୍ଷେତ୍ରରେ ୩.୭ ଲକ୍ଷ ଶିକ୍ଷକ, ୨.୮ ଲକ୍ଷ ଶିକ୍ଷୟିତ୍ରୀ ଅଛନ୍ତି । କୌତୂହଳର ବିଷୟ ହେଲା; ସରକାରୀ ଅନୁଦାନ ପ୍ରାପ୍ତ ସ୍କୁଲରେ ଶିକ୍ଷକ ଅଧିକ, ଘରୋଇ ଏବଂ ଅଣଅନୁଦାନପ୍ରାପ୍ତ ସ୍କୁଲରେ ଶିକ୍ଷୟିତ୍ରୀ ଅଧିକ ଅଛନ୍ତି । ଦେଶର ସବୁ ସ୍ଥାନରେ ମାଧ୍ୟମିକ, ଉଚ୍ଚ ମାଧ୍ୟମିକ ଶିକ୍ଷାରେ ଶିକ୍ଷକଙ୍କ ସଂଖ୍ୟା ଅଧିକ ରହିଛି । ତେବେ ଶିକ୍ଷା କ୍ଷେତ୍ରରେ ଆଗୁଆ କେରଳ, ସରକାରୀ ସ୍କୁଲ ଭଲ ପ୍ରଦର୍ଶନ ପାଇଁ ଚର୍ଚ୍ଚାରେ ରହିଥିବା ଦିଲ୍ଲୀ ସମେତ ମେଘାଳୟ, ପଞ୍ଜାବ ଏବଂ ତାମିଲନାଡ଼ୁରେ ପ୍ରାଥମିକଠାରୁ ଉଚ୍ଚ ମାଧ୍ୟମିକ ପର୍ଯ୍ୟନ୍ତ ସବୁ ସ୍ତରରେ ଶିକ୍ଷୟିତ୍ରୀଙ୍କ ସଂଖ୍ୟା ଅଧିକ ରହିଛି । କେରଳରେ ୭୯ ପ୍ରତିଶତ, ପଞ୍ଜାବରେ ୭୬ ପ୍ରତିଶତ, ତାମିଲନାଡ଼ୁରେ ୭୫ ପ୍ରତିଶତ, ଦିଲ୍ଲୀରେ ୭୪ ପ୍ରତିଶତ ଏବଂ ହରିୟାଣାରେ ୬୨ ପ୍ରତିଶତ ଶିକ୍ଷୟିତ୍ରୀ ଥିବା ରିପୋର୍ଟରେ ଦର୍ଶାଯାଇଛି ।

Powered by Froala Editor