ପେଟ୍ରୋଲ ଏବଂ ଡିଜେଲ ବ୍ୟବହାର ୯.୧ ପ୍ରତିଶତ କମିଛି
ନୂଆଦିଲ୍ଲୀ : ଗତବର୍ଷ ମାର୍ଚ୍ଚରୁ ଦେଶରେ କରୋନା ପାଇଁ ଲକଡାଉନ ଏବଂ ବିଭିନ୍ନ ପ୍ରକାର କଟକଣା ଆରମ୍ଭ ହୋଇଯାଇଥିଲା । ଏହାର ବଡ଼ ଧରଣର ପ୍ରଭାବ ପେଟ୍ରୋଲ ଏବଂ ଡିଜେଲ ବିକି୍ର ଉପରେ ପଡ଼ିଛି । ୨୦୨୦-୨୧ ବର୍ଷରେ ଏଥିପାଇଁ ପେଟ୍ରୋଲ ଏବଂ ଡିଜେଲ ବ୍ୟବହାର ୯.୧ ପ୍ରତିଶତ କମିଯାଇଛି । ଗତ ଦୁଇ ଦଶନ୍ଧିରୁ ଅଧିକ ସମୟ ପେଟ୍ରୋଲ ଏବଂ ଡିଜେଲ ବ୍ୟବହାର ପ୍ରଥମ ଥର ପାଇଁ ସଙ୍କୁଚିତ ହୋଇଛି । ଦେଶରେ ୨୦୧୯-୨୦ ଆର୍ଥିକ ବର୍ଷରେ ୨୧୪.୧୨ ନିୟୁତ ଟନ ପେଟ୍ରୋଲିୟମ ସାମଗ୍ରୀ ବ୍ୟବହାର ହୋଇଥିଲା । କିନ୍ତୁ ୨୦୨୦-୨୧ ଆର୍ଥିକ ବର୍ଷରେ ଏହା ୧୯୪.୬୩ ନିୟୁତ ଟନକୁ ହ୍ରାସ ପାଇଛି ବୋଲି ପେଟ୍ରୋଲିୟମ ମନ୍ତ୍ରାଳୟର ପେଟ୍ରୋଲିୟମ ପ୍ଲାନିଂ ଆଣ୍ଡ ଆନାଲିସିସ ସେଲ (ପିପିଏସି) ସୂତ୍ରରୁ ଜଣାଯାଇଛି । ୧୯୯୮-୯୯ ମସିହା ଠାରୁ ପ୍ରଥମ ଥର ପାଇଁ ହ୍ରାସ ଘଟିଛି ବୋଲି ଜଣାଯାଇଛି । ଡିଜେଲ ଉପଯୋଗ ୧୨ ପ୍ରତିଶତ ହ୍ରାସ ଘଟି ୭୨.୭୨ ନିୟୁତ ଟନ ରହିଥିବା ବେଳେ ପେଟ୍ରୋଲ ଉପଯୋଗ ୬.୭ ପ୍ରତିଶତ ହ୍ରାସ ଘଟି ୨୭.୯୫ ନିୟୁତ ଟନ ରହିଛି ।
