ଗର୍ଭବତୀ ମହିଳାଙ୍କୁ ଚଳନ୍ତା ଟ୍ରେନରୁ ଠେଲି ଦେଲେ ଜଣେ ଯୁବକ। ଟ୍ରେନରୁ ପଡ଼ି ଗର୍ଭବତୀ ମହିଳା ଜଣଙ୍କ ଗୁରୁତର ଆହତ ହୋଇଥିବା ବେଳେ ବର୍ତ୍ତମାନ ଏକ ସରକାରୀ ହସ୍ପିଟାଲରେ ସେ ଚିକିତ୍ସିତ ହେଉଛନ୍ତି । ଏଭଳି ଅଭାବନୀୟ ଘଟଣା ତାମିଲନାଡୁର କୋଏମ୍ବାଟୁର ଜିଲ୍ଲାରେ। ଏହି ମାମଲାରେ ସମ୍ପୃକ୍ତ ଜଣେ ସନ୍ଦିଗ୍ଧକୁ ପୋଲିସ ଅଟକ ରଖିଥିବା ଜଣାପଡ଼ିଛି ।

ସୂଚନା ଅନୁଯାୟୀ, ତାମିଲନାଡୁର ଭେଲୋର ଜିଲ୍ଲାରେ ଫେବୃଆରୀ ୬ ରାତିରେ ଜଣେ ଗର୍ଭବତୀ ମହିଳା ତିରୁପତି ଇଣ୍ଟରସିଟି ଏକ୍ସପ୍ରେସ ଯୋଗେ ଆନ୍ଧ୍ରପ୍ରଦେଶ ଚିତ୍ତୋରକୁ ଯାଉଥିଲେ। ଟ୍ରେନ ଷ୍ଟେସନ ଛାଡିବା ପରେ ୨୭ ବର୍ଷୀୟ ହେମରାଜ ଟ୍ରେନରେ ଚଢିଥିଲେ। ମହିଳା ଏକା ବସିଥିବା ଦେଖି ତାଙ୍କୁ ଦୁର୍ବ୍ୟବହାର କରିବା ସହ ପରେ ଯୌନ ଶୋଷଣ କରିବାକୁ ଚେଷ୍ଟା କରିଥିଲା ଯୁବକ।

ମହିଳା କମ୍ପାର୍ଟମେଣ୍ଟରେ ଯୁବକ ତାଙ୍କୁ ଶୌଚାଳୟ ପର୍ଯ୍ୟନ୍ତ ପିଛା କରିଥିଲେ । ସେଠାରେ ପ୍ରଥମେ ମହିଳାଙ୍କୁ ମୌଖିକ ଦୁର୍ବ୍ୟବହାର କରିବା ସହ ପରେ ଯୌନ ଶୋଷଣ କରିଥିଲେ ।
ମହିଳା ଜଣଙ୍କ ସାହାଯ୍ୟ ପାଇଁ ଚିତ୍କାର କରିଥିଲେ । ଏଥିରେ ଭୟଭୀତ ହୋଇ ଯୁବକ ମହିଳାଙ୍କୁ ଚଳନ୍ତା ଟ୍ରେନରୁ ତଳକୁ ଫିଙ୍ଗି ଦେଇଥିଲେ ।

ଚଳନ୍ତା ଟ୍ରେନରୁ ପଡ଼ି ଗର୍ଭବତୀ ମହିଳାଙ୍କ ଗୋଡ଼ ଏବଂ ହାତରେ ଫ୍ରାକ୍ଚର ଆସିଥିଲା ଏବଂ ମୁଣ୍ଡରେ ମଧ୍ୟ ଗଭୀର ଆଘାତ ଲାଗିଥିବା ସୂଚନା ମିଳିଛି। ଏନେଇ ଜୋଲାରପେଟାଇ ରେଳବାଇ ପୋଲିସ ଏକ ମାମଲା ରୁଜୁ କରିଛି । ଅଭିଯୁକ୍ତକୁ ଗିରଫ କରିଛି ପୋଲିସ ।

Powered by Froala Editor