ତାମିଲ ଅଭିନେତା ଅଜିତ କୁମାରଙ୍କର ଏକ ଭୟଙ୍କର ଦୁର୍ଘଟଣା ଘଟିଛି। ଦୁବାଇର ୨୪ ହାୱାର ରେସ୍ ୨୦୨୫ ପାଇଁ ପ୍ରସ୍ତୁତି କରୁଥିବା ସମୟରେ ଏହି ଦୁର୍ଘଟଣା ଘଟିଛି। ତେବେ ଏଥିରେ ତାଙ୍କର ବିଶେଷ କିଛି କ୍ଷତି ହୋଇ ନ ଥିବା କୁହାଯାଉଛି।

ଦୀର୍ଘ ବର୍ଷ ପରେ ନିଜ ପୁରୁଣା ରେସିଂ କ୍ୟାରିୟରକୁ ଫେରିଥିବା ଅଜିତ ଦୁବାଇରେ ୨୪ ହାୱାର ରେସ୍ ୨୦୨୫ରେ ଭାଗ ନେବାକୁ ପ୍ରସ୍ତୁତ ହେଉଛନ୍ତି। ଏଥିପାଇଁ ଦୁବାଇ ଗ୍ରାଣ୍ଡ ଫିକ୍ସ ଅଭ୍ୟାସ ସମୟରେ ତାଙ୍କ କାର ଦୁର୍ଘଟଣାଗ୍ରସ୍ତ ହୋଇ ସଂପୂର୍ଣ୍ଣ କ୍ଷତିଗ୍ରସ୍ତ ହୋଇଛି।

ଅଭ୍ୟାସ ସମୟର ଭାଇରାଲ୍ ଭିଡିଓ ଦର୍ଶାଉଛି ଯେ ଅଭିନେତା ତାଙ୍କ କାର ଉପରେ ନିୟନ୍ତ୍ରଣ ହରାଇବାରୁ ଏହି ଦୁର୍ଘଟଣା ଘଟିଛି। ଫଳସ୍ୱରୂପ, କାରଟି ମୁଖ୍ୟ ରାସ୍ତାର କଡରେ ଥିବା କାନ୍ଥରେ ପିଟି ହେବା ପରେ ଟ୍ରାକରେ ଘୁରୁଥିବା ଦେଖିବାକୁ ମିଳିଥିଲା ଯାହା ଏକ ବଡ଼ ଧରଣର ଦୁର୍ଘଟଣାର କାରଣ ହୋଇଥିଲା। ତେବେ ଅଜିତ କୁମାର ଦୁର୍ଘଟଣାରୁ ରକ୍ଷା ପାଇଛନ୍ତି। ଅଭିନେତାଙ୍କ ପ୍ରଶଂସକମାନେ ତାଙ୍କର ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରି ଦୁର୍ଘଟଣାର ଭିଡିଓ ସେୟାର କରିଛନ୍ତି।

ଉଲ୍ଲେଖ ଯୋଗ୍ୟ, ତାମିଲ ଅଭିନେତା ଅଜିତ କୁମାର ରେସିଂ କାର୍ ଓ ବାଇକ୍ ବହୁତ ପସନ୍ଦ କରନ୍ତି। ୯୦ ଦଶକ ଆରମ୍ଭରେ ସେ ଜାତୀୟ ମୋଟରସାଇକେଲ୍ ରେସିଂ ଚାମ୍ପିୟନଶିପରେ ତାଙ୍କ ରେସିଂ କ୍ୟାରିୟର ଆରମ୍ଭ କରିଥିଲେ। ଏକ ବଡ଼ ଦୁର୍ଘଟଣାରେ ଗୁରୁତର ଭାବେ ଆହତ ହେବା ପରେ ସେ ନିଜ ପ୍ରିୟ କ୍ରୀଡ଼ାରୁ ସାମୟିକ ବ୍ରେକ୍ ନେଇଥିଲେ। ଏବେ ପ୍ରାୟ ୧୫ ବର୍ଷ ପରେ ସେ ପୁରୁଣା କ୍ୟାରିୟରକୁ ଫେରୁଛନ୍ତି।

Powered by Froala Editor