ପୂଜାକୁ ସଫଳ ଓ ଫଳଦାୟୀ କରିବାକୁ ହେଲେ ଠାକୁରଘରେ ଦେବଦେବୀଙ୍କର ପ୍ରତିମା ସ୍ଥାପନାଠୁ ଆରମ୍ଭ କରି ତାଙ୍କୁ ଆରାଧନା କରିବା ପର୍ଯ୍ୟନ୍ତ ସବୁ ପାଇଁ କିଛି ନା କିଛି ନିୟମ ମାନିବାକୁ ହୋଇଥାଏ। ଯଦ୍ଦ୍ବାରା ଦେବଦେବୀଙ୍କର ଆଶିଷ ଲାଭ ହେବା ସହ ଘରେ ସୁଖ ସମୃଦ୍ଧି ବୃଦ୍ଧି ପାଇଥାଏ। ଯେମିତିକି:

*ଠାକୁର ଘରେ ଦେବଦେବୀଙ୍କ ପ୍ରତିମା ସ୍ଥାପନା କରିବା ପୂର୍ବରୁ ପ୍ରଥମେ ଘରକୁ ଭଲଭାବେ ସଫାକରି ଅନାବଶ୍ୟକ ଜିନିଷକୁ ଘରୁ ବାହାର କରିଦେବା ଆବଶ୍ୟକ। କାରଣ ବେକାର ପଡ଼ିଥିବା ଜିନିଷ ଘରେ ନକାରାତ୍ମକ ଊର୍ଜା ସୃଷ୍ଟି କରିଥାଏ।

*ଦେବଦେବୀଙ୍କର ମୂର୍ତ୍ତି ହେଉ ଅବା ଫଟୋକୁ ଘରର ପୂର୍ବ ଦିଗରେ ଏପରି ସ୍ଥାପନା କରିବେ, ଯେମିତିକି ତାଙ୍କ ମୁଖ ପଶ୍ଚିମ ଦିଗ ଆଡକୁ ଏବଂ ପୂଜା କରିବା ସମୟରେ ବ୍ୟକ୍ତିଙ୍କ ମୁହଁ ପୂର୍ବ ଦିଗ ଆଡକୁ ରହୁଥିବ। ଏହାଦ୍ୱାରା ପୂଜା ସଫଳ ହୋଇଥାଏ ବୋଲି ବିଶ୍ୱାସ ରହିଛି।

* ଠାକୁର ଘରେ କେବେ ବି ଅଧିକ ଉଚ୍ଚତା ବିଶିଷ୍ଟ ଦେବଦେବୀଙ୍କ ମୂର୍ତ୍ତି ରଖିବା ଠିକ୍‌ ନୁହେଁ। ବାସ୍ତୁଶାସ୍ତ୍ର ଅନୁଯାୟୀ ୭ ଇଞ୍ଚ ହେଉ ଅବା ୯ ଆଙ୍ଗୁଠି ଉଚ୍ଚତା ବିଶିଷ୍ଟ ଠାକୁରଙ୍କ ମୂର୍ତ୍ତିକୁ ଘରେ ରଖି ପୂଜା କରିବା ଶୁଭ ହୋଇଥାଏ।

* ସେହିପରି ଠାକୁରଙ୍କ ମୂର୍ତ୍ତି ହେଉ ଅବା ଫଟୋକୁ ସିଧାସଳଖ ଚଟାଣ ଉପରେ ନ ରଖି ନାଲି ରଙ୍ଗର ସଫା କପଡ଼ା ଉପରେ ରଖିବା ଆବଶ୍ୟକ।

* ଠାକୁର ଘରେ ପୂଜା ପାଉଥିବା ଦେବଦେବୀଙ୍କର ମୂର୍ତ୍ତି ହେଉ ଅବା ଫଟୋକୁ ଫୁଲରେ ପୂରା ଭର୍ତ୍ତି କରିଦେବା ଠିକ୍‌ ନୁହେଁ। ସେମାନଙ୍କ ମୁହଁ ଯେପରି ଦେଖାଯାଉଥିବ ସେଥିପ୍ରତି ଧ୍ୟାନଦେବା ଜରୁରୀ।

* ଠାକୁର ଘରର କାନ୍ଥରେ ନାଲି ସିନ୍ଦୁରରେ ଓଁ ଏବଂ ସ୍ବସ୍ତିକ ଚିହ୍ନ କରିବା ମଧ୍ୟ ଅତ୍ୟନ୍ତ ଶୁଭ ହୋଇଥାଏ।

* ଠାକୁର ପୂଜାରେ ତମ୍ବା, ପିତଳ ହେଉ ଅବା ରୁପାର ବାସନକୁସନ ବ୍ୟବହାର କରିବା ଉତ୍ତମ ଫଳ ଦେଇଥାଏ।

* ଘରର ମୁଖ୍ୟ ଦ୍ୱାର ହେଉ ଅବା ଠାକୁର ଘରର ପ୍ରବେଶ ଦ୍ୱାରରେ ସିନ୍ଦୂରରେ ସ୍ବସ୍ତିକ ଚିହ୍ନ କରି ଆମ୍ବ ଡାଳ ବାନ୍ଧିଲେ ଘରେ ସକାରାତ୍ମକ ଊର୍ଜା ଉତ୍ପନ୍ନ ହେବା ସହ ପ୍ରଭୁକୃପା ଲାଭ ହୋଇଥାଏ ବୋଲି ବିଶ୍ୱାସ ମଧ୍ୟ ରହିଛି।

Powered by Froala Editor