ବିଜେପିର ବିଜୟ ପାଇଁ କର୍ମୀ କରିଥିଲେ ମାନସିକ । ଆଉ ମାନସିକ ପୂରଣ ହେବା ପରେ କାଳୀ ମନ୍ଦିରରେ ଆଙ୍ଗୁଠି କାଟି ଚଢ଼ାଇଲେ ଯୁବକ। ଏପରି ଏକ ସାଂଘାତିକ ଘଟଣା ଛତିଶଗଡ଼ର ବଳରାମପୁରରେ ଘଟିଛି। ତୁରନ୍ତ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେ ଏବେ ବିପଦମୁକ୍ତ ଅଛନ୍ତି । ମାତ୍ର ତାଙ୍କ କଟା ଆଙ୍ଗୁଠିକୁ ଯୋଡ଼ା ଯାଇ ପାରି ନ ଥିବା ଜଣାଯାଇଛି।

ଦୁର୍ଗେଶ ପାଣ୍ଡେ ନାମକ ୩୦ ବର୍ଷୀୟ ଯୁବକ ଜଣକ ଜଣେ ବିଜେପି ସମର୍ଥକ ହୋଇଥିବା ବେଳେ ଦଳର ବିଜୟ ପାଇଁ ମାନସିକ କରିଥିଲେ ଏବଂ ଏହା ପୂରଣ ହେବା ପରେ ସେ ମନ୍ଦିରକୁ ଯାଇ ଦେବୀଙ୍କୁ ଆଙ୍ଗୁଠି କାଟି ଅର୍ପଣ କରିଥିଲେ ।  ତାହା ପୂରା ବାହାରି ଯାଇ ନ ଥିବା ବେଳେ ପ୍ରବଳ ରକ୍ତସ୍ରାବ ହୋଇ ଯାଇଥିଲା। ତେବେ ଏଭଳି କରିବା ପରେ ଯୁବକଙ୍କ ଅବସ୍ଥା ଖରାପ ହେବାରୁ ତାଙ୍କ ପରିବାର ତାଙ୍କୁ କମ୍ୟୁନିଟି ହେଲଥ ସେଣ୍ଟରରେ ଭର୍ତ୍ତି କରିଥିଲେ ଯେଉଁଠାରୁ ତାଙ୍କୁ ଅମ୍ବିକାପୁର ମେଡିକାଲ କଲେଜକୁ ପଠାଯାଇଥିଲା। ଚିକିତ୍ସା ପରେ ବର୍ତ୍ତମାନ ଯୁବକ ବିପଦ ମୁକ୍ତ ଥିବା ଜଣାପଡିଛି ।

ଦୁର୍ଗେଶ କହିଛନ୍ତି, କଂଗ୍ରେସ କର୍ମୀଙ୍କ ଉତ୍ସାହ ମୁଁ ସହ୍ୟ କରି ପାରି ନ ଥିଲି। ତେଣୁ ମା’ଙ୍କ ନିକଟରେ ମାନସିକ କରି ଆଙ୍ଗୁଠି ଅର୍ପଣ କରିଥିଲି। ମାତ୍ର ବିଜେପି ୪ଶହ ପାର୍‌ କରି ପାରିଥିଲେ ଖୁସି ଦ୍ୱିଗୁଣିତ ହୋଇ ପାରି ଥାଆନ୍ତା।

Powered by Froala Editor