ହନିମୁନ୍ରେ ସ୍ତ୍ରୀକୁ ‘ସେକେଣ୍ଡ ହ୍ୟାଣ୍ଡ’ କହିଥିଲା ସ୍ୱାମୀ, ଦେବେ ୩ କୋଟି ଜରିମାନା
![ହନିମୁନ୍ରେ ସ୍ତ୍ରୀକୁ ‘ସେକେଣ୍ଡ ହ୍ୟାଣ୍ଡ’ କହିଥିଲା ସ୍ୱାମୀ, ଦେବେ ୩ କୋଟି ଜରିମାନା](https://odishanewslens.com/news_gallery/28944_1711570732.jpg)
ଆମେରିକାରେ ରହୁଥିବା ଜଣେ ବ୍ୟକ୍ତିଙ୍କୁ ବମ୍ବେ ହାଇକୋର୍ଟଙ୍କ ପକ୍ଷରୁ ତାଙ୍କୁ ସ୍ତ୍ରୀଙ୍କୁ ୩ କୋଟି ଟଙ୍କା ଜରିମାନା ଦେବାକୁ ନିର୍ଦ୍ଦେଶ ଜାରି କରାଯାଇଛି। ହନିମୁନ୍ ସମୟରେ ସ୍ବାମୀ ସ୍ତ୍ରୀଙ୍କୁ ସେକେଣ୍ଡ ହ୍ୟାଣ୍ଡ୍ ବୋଲି କହିଥିଲେ। ପତ୍ନୀଙ୍କୁ ସେକେଣ୍ଡ ହ୍ୟାଣ୍ଡ କହିବା ଶାରୀରିକ ଦୁର୍ବବ୍ୟବହାର ସହ ସମାନ ବୋଲି ହାଇକୋର୍ଟ କହିଛନ୍ତି।
ଉଭୟ ସ୍ୱାମୀ ଓ ସ୍ତ୍ରୀ ଆମେରିକାର ନାଗରିକ। ୧୯୯୪ ମସିହା ଜାନୁଆରୀ ୩ରେ ସେମାନେ ମୁମ୍ବାଇରେ ବାହା ହୋଇଥିଲେ। ଆମେରିକାରେ ମଧ୍ୟ ସେମାନେ ଆଉ ଥରେ ବିବାହ ଉତ୍ସବ ମନାଇଥିଲେ। କିନ୍ତୁ ୨୦୦୫-୨୦୦୬ ବେଳକୁ ସେମାନେ ମୁମ୍ବାଇ ଫେରିବା ସହ ଏଠାରେ ଗୋଟିଏ ଘରେ ରହିବା ଆରମ୍ଭ କରିଥିଲେ।
ମୁମ୍ବାଇରେ ପତ୍ନୀ ଚାକିରି କରିବା ପରେ ପରବର୍ତ୍ତୀ ଅବସ୍ଥାରେ ତାଙ୍କ ମା’ଙ୍କ ଘରକୁ ଚାଲି ଯାଇଥିଲେ। ୨୦୧୪-୧୫ ବେଳକୁ ସ୍ୱାମୀ ଜଣଙ୍କ ଆମେରିକା ଚାଲି ଯାଇଥିଲେ। ୨୦୧୭ରେ ସେ ଆମେରିକାରେ ରହି ସେଠାରେ ଛାଡ଼ପତ୍ର ପାଇଁ ଆବେଦନ କରିଥିଲେ।
କୋର୍ଟ ପତ୍ନୀଙ୍କୁ ସମନ ବି କରିଥିଲେ। ସମାନ ବର୍ଷ ପତ୍ନୀ ମୁମ୍ବାଇ ମାଜିଷ୍ଟ୍ରେଟ କୋର୍ଟରେ ଘରୋଇ ହିଂସା ଆଇନ ଅନୁସାରେ ମାମଲା କରିଥିଲେ। ୨୦୧୮ରେ ଆମେରିକାର ଗୋଟିଏ କୋର୍ଟରେ ଉଭୟଙ୍କ ଛାଡ଼ପତ୍ର ହୋଇ ଯାଇଥିଲା। ତେବେ ପତ୍ନୀ କରିଥିବା ଆବେଦନର ବିଚାର ଶେଷ ହୋଇ ନଥିଲା।
ସ୍ତ୍ରୀ ଅଭିଯୋଗ ଆଣିଥିଲେ ଯେ, ହନିମୁନ୍ ସମୟରେ ସ୍ବାମୀ ତାଙ୍କୁ ସେକେଣ୍ଡ ହ୍ୟାଣ୍ଡ୍ ବୋଲି କହିଥିଲେ। କାରଣ ତାଙ୍କର ଏକ ନିର୍ବନ୍ଧ ଭାଙ୍ଗିଯାଇଥିଲା। ଏହି ସହିତ ହନିମୁନ ରାତ୍ରିରେ ସ୍ତ୍ରୀଙ୍କର ଅନ୍ୟମାନଙ୍କ ସହ ସମ୍ପର୍କ ଥିବା ସ୍ବାମୀ କହିଥିଲେ। ସ୍ତ୍ରୀ ଏହା ସ୍ବୀକାର ନ କରିବା ପର୍ଯ୍ୟନ୍ତ ସ୍ବାମୀ ତାଙ୍କୁ ଶୋଇବାକୁ ଦେଇ ନଥିଲେ।
୨୦୦୮ରେ ସ୍ବାମୀ ସ୍ତ୍ରୀଙ୍କ ମୁହଁରେ ତକିଆ ରଖି ମାରିବାକୁ ଉଦ୍ୟମ କରିଥିବା ଅଭିଯୋଗ ସ୍ତ୍ରୀଙ୍କ ପକ୍ଷରୁ ଅଣାଯାଇଥିଲା। ଏହାପରେ ସ୍ତ୍ରୀ ନିଜ ବାପଘରକୁ ଚାଲିଯାଇଥିଲେ। ୨୦୨୩ରେ ଟ୍ରାଏଲ୍ କୋର୍ଟ ସ୍ତ୍ରୀଙ୍କ ସପକ୍ଷରେ ରାୟ ପ୍ରଦାନ କରିଥିଲେ। ସ୍ବାମୀଙ୍କ ଉପରେ ୩ କୋଟି ଟଙ୍କାର ଜରିମାନା ଲାଗୁ କରାଯିବ ସହିତ ଦାଦରରେ ୧,୦୦୦ ବର୍ଗଫୁଟ ବାସସ୍ଥାନ ଅବା ୭୫,୦୦୦ ମାସିକ ଘରଭଡ଼ା ଦେବାକୁ ନିର୍ଦ୍ଦେଶ ଦେଇଥିଲେ। ସ୍ତ୍ରୀଙ୍କ ସମସ୍ତ ଅଳଙ୍କାର ଫେରସ୍ତ ସହିତ ମାସିକ ୧,୫୦,୦୦୦ ଭରଣପୋଷଣ ଦେବାକୁ ସ୍ବାମୀଙ୍କୁ କୋର୍ଟ ଆଦେଶ ଦେଇଥିଲେ।
ଏହା ପରେ ସ୍ବାମୀ ଟ୍ରାଏଲ୍ କୋର୍ଟଙ୍କ ରାୟକୁ ଚ୍ୟାଲେଞ୍ଜ୍ କରି ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ। କିନ୍ତୁ ଏହାକୁ କୋର୍ଟ ଗ୍ରହଣ କରି ନଥିଲେ। ହାଇକୋର୍ଟ ଏହି ମାମଲାର ବିଚାର କରି ଟ୍ରାଏଲ୍ କୋର୍ଟଙ୍କ ରାୟକୁ କାଏମ୍ ରଖିବା ସହିତ ସ୍ବାମୀଙ୍କ ପଟିସନ ଗ୍ରହଣ କରିବାକୁ ମନା କରିଛନ୍ତି।
Powered by Froala Editor