ବାପା ହାତରୁ ୪୦ ଫୁଟ୍ ତଳକୁ ଖସି ପଡ଼ିଲା ବର୍ଷକର ପୁଅ
![ବାପା ହାତରୁ ୪୦ ଫୁଟ୍ ତଳକୁ ଖସି ପଡ଼ିଲା ବର୍ଷକର ପୁଅ](https://odishanewslens.com/news_gallery/28811_1710964455.jpg)
ଜଣେ ବାପା ଦୁଇ ପୁଅଙ୍କୁ ଧରି ମଲ୍ ବୁଲିବାକୁ ଯାଇଥିବାବେଳେ ଘଟିଛି ଦୁଃଖଦ ଘଟଣା । ଏକ୍ସଲେଟରରେ ୬ ବର୍ଷର ପୁଅର ଗୋଡ ଖସିଯିବାରୁ ବାପା ଧରିବାକୁ ହଡ଼ବଡେଇ ଯାଇଥିଲେ । ଯେଉଁଥିପାଇଁ ତାଙ୍କ ହାତରୁ ବର୍ଷକର ପୁଅ ଖସି ୪୦ ଫୁଟ୍ ତଳେ ପଡିଯାଇଥିଲା । ଏତେ ଉଚ୍ଚରୁ ପଡି ପୁଅର ମୃତ୍ୟୁ ହୋଇଥିବାବେଳେ ବାପା ମା’ ପାଗଳପ୍ରାୟ ହୋଇଯାଇଛନ୍ତି । ଏ ଘଟଣା ଘଟିଛି ଛତିଶଗଡ ରାୟପୁରରେ ।
ରାୟପୁରରେ ଥିବା ସିଟି ସେଣ୍ଟର ମଲକୁ ଗତ ମଙ୍ଗଳାବର ରାଜନ କୁମାର ତାଙ୍କର ୬ ବର୍ଷର ପୁଅ ଓ ବର୍ଷକର ପୁଅକୁ ଧରି ବୁଲିବାକୁ ଯାଇଥିଲେ। ଏହି ସମୟରେ ସେ ଏକ୍ସଲେଟରେ ତୃତୀୟ ମହଲାକୁ ତଳକୁ ଆସୁଥିଲେ। ଏତିକି ବେଳେ ବଡ଼ ପୁଅର ଗୋଡ଼ ଖସି ଯାଇଥିଲା। ବଡ଼କୁ ଧରିବାକୁ ଚେଷ୍ଟା କରୁଥିବା ବେଳେ ରାଜନଙ୍କ ହାତରୁ ସାନ ପୁଅ ଖସି ପଡ଼ିଥିଲା। ଆଖି ପିଛୁଳାକେ ବର୍ଷକର ଶିଶୁ ୪୦ ଫୁଟ ତଳେ କଚାଡ଼ି ହୋଇ ପଡ଼ିଥିଲା। ଶିଶୁକୁ ଘଟଣାସ୍ଥଳରୁ ଉଦ୍ଧାର କରି ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ଡାକ୍ତର ମୃତ ଘୋଷଣା କରିଥିଲେ।
ଏହି ଘଟଣା ସମ୍ପର୍କରେ ଯେତେବେଳେ ରାଜନଙ୍କ ସ୍ତ୍ରୀ ଜାଣିଥିଲେ ସେ ପୁଅକୁ ହରାଇ ପାଗଳପ୍ରାୟ ହୋଇଯାଇଥିଲେ। ହସ୍ପିଟାଲରେ ପହଞ୍ଚି ସମସ୍ତଙ୍କୁ ଧରି ପୁଅକୁ ବଞ୍ଚାଇ ଦେବାକୁ ଅନୁରୋଧ କରୁଥିଲେ। ତେବେ ମା’ର କାନ୍ଦକୁ ଯିଏ ଦେଖୁଥିଲେ ତାଙ୍କ ଆଖି ଲୁହରେ ଭରି ଯାଉଥିଲା।
Powered by Froala Editor