ଦୈନଦିନ ଜୀବନରେ ଥଣ୍ଡା ଏବଂ କାଶ ହେବା ସାଧାରଣ । କିନ୍ତୁ ଯଦି ଏହା ଅଧିକ ଦିନ ଧରି ଲାଗି ରହୁଛି ତେବେ ଅଣଦେଖା କରିବା ଭୁଲ । ଅନେକ ଥର ପାଣିପାଗର ପରିବର୍ତ୍ତନ କିମ୍ବା ସଂକ୍ରମଣ ଯୋଗୁ ଥଣ୍ଡା କାଶ ଲାଗି ରହିଥାଏ । ଥଣ୍ଡା କାଶ ଅଧିକ ଦିନ ଲାଗି ରହୁଥିଲେ ଏହା ବିପଜ୍ଜନକ ହୋଇପାରେ । ନିକଟରେ ଜଣେ ଡାକ୍ତରଙ୍କୁ ଥଣ୍ଡା କାଶ ଲାଗି ରହିବାରୁ ସେ କେଉଁ ପରିସ୍ଥିତି ଦେଇ ଗତି କରିଥିଲେ ତାହାର ସୂଚନା ଦେଇଛନ୍ତି ।

ଏକ ଗଣମାଧ୍ୟମ ରିପୋର୍ଟ ଅନୁଯାୟୀ ଡକ୍ଟର ଦୀପକ କୃଷ୍ଣମୂର୍ତ୍ତି ସୋସିଆଲ ମିଡିଆରେ ସୂଚନା ଦେଇ କହିଛନ୍ତି ଯେ ଥଣ୍ଡା ଏବଂ କାଶ ଜୀବାଣୁ ଯୋଗୁ ତାଙ୍କ ସ୍ୱାସ୍ଥ୍ୟବସ୍ଥା ଗମ୍ଭୀର ହୋଇଥିଲା । ରାତିରେ ଶୋଇବା ବେଳେ ଅତ୍ୟଧିକ ମାତ୍ରାରେ କାଶ ହେବା କାରଣରୁ ସେ ଶ୍ୱାସାକ୍ରିୟାରେ କଷ୍ଟ ଅନୁଭବ କରିଥିଲେ । ଅତ୍ୟନ୍ତ କଷ୍ଟ ହେବା କାରଣରୁ ସେ ନେବୁଲାଇଜେସନର ସାହାଯ୍ୟ ନେଇଥିଲେ । ଫଳରେ କାଶରୁ ଟିକେ ମୁକ୍ତି ମିଳିଥିଲା ।
ଏଭଳି ଥଣ୍ଡା ଓ କାଶ ହେବାର ଅନେକ ପ୍ରକାର କାରଣ ହୋଇପାରେ । ଯେପରିକି କୋଭିଡ ଲକ୍ଷଣ, ସାଧାରଣ ଫ୍ଲୁ ହେଲେ ଥଣ୍ଡା ପରି ଶ୍ୱାସକ୍ରିୟା ସଂକ୍ରମଣ ସବୁଠାରୁ ଅଧିକ ଦେଖାଯାଏ । ନାକ ବନ୍ଦ ହେବା, କାଶ ଲାଗି ରହିବା ଏବଂ ଗଳା ଫୁଲିଯିବା ଭଳି ଲକ୍ଷଣ ଦେଖାଯାଏ । ଯେକୌଣସି ଔଷଧ ଖାଇଲେ ମଧ୍ୟ କାମ କରିନଥାଏ । କିଛି ରୋଗୀଙ୍କୁ ଏହା ମାସେ ଧରି ଲାଗି ରହିଥାଏ । ବାୟୁ ପ୍ରଦୂଷଣ ଏବଂ ଆଲର୍ଜି ଦ୍ୱାରା କାଶ ସବୁବେଳେ ଲାଗି ରହିଥାଏ । ବର୍ତ୍ତମାନ ସମୟରେ ବାରମ୍ବାର ଜଳବାୟୁ ପରିବର୍ତ୍ତନ ମଧ୍ୟ ଏହାର ଆଉ ଏକ କାରଣ ହୋଇପାରେ ବୋଲି ବିଶେଷଜ୍ଞ ମାନେ ମତ ଦେଇଛନ୍ତି ।

Powered by Froala Editor