ସନ୍ଦିଗ୍ଧ ଭାବେ ବୁଲୁଥିବା ଚୀନ ନାଗରିକଙ୍କୁ ଧରିଲା ବିଏସ୍ଏଫ୍
ଭାରତ-ବାଂଲାଦେଶ ସୀମାରେ ସନ୍ଦିଗ୍ଧ କାର୍ଯ୍ୟକଳାପ ଚଳାଇଥିବା ଜଣେ ୩୫ ବର୍ଷୀୟ ଚୀନ ନାଗରିକଙ୍କୁ ଧରିଛି ବିଏସ୍ଏଫ। ସେ ପଶ୍ଚିମବଙ୍ଗର ମାଲଦା ସ୍ଥିତ ବାଂଲାଦେଶ ସୀମାରେ ସନ୍ଦିଗ୍ଧ ଅବସ୍ଥାରେ ବୁଲୁଥିବା ବେଳେ ସୁରକ୍ଷାକର୍ମୀମାନେ ତାଙ୍କୁ କାବୁ କରିଛନ୍ତି। ଅଭିଯୋଗ ହୋଇଛି ଯେ, ଏହି ଚୀନ ନାଗରିକ ଅନ୍ତର୍ଜାତୀୟ ସୀମା ପାର କରି ଭାରତରେ ବେଆଇନ ଭାବେ ପ୍ରବେଶ କରିଛି। ତାଙ୍କ ଠାରୁ ଚାଇନିଜ ପାସପୋର୍ଟ, ବାଂଲାଦେଶ ଭିସା, ଗୋଟିଏ ଲ୍ୟାପଟପ ଓ ୩ଟି ସିମ କାର୍ଡ ମିଳିଛି। ତାଙ୍କ ନାଁ ହାନ ଜୁନୱେଇ ବୋଲି ସୁରକ୍ଷାକର୍ମୀମାନେ ପାସପୋର୍ଟରୁ ଜାଣିବାକୁ ପାଇଛନ୍ତି।
ଅଧିକାରୀମାନେ କହିଛନ୍ତି ଯେ, ଗୁରୁବାର ସକାଳେ ଚୀନ ନାଗରିକ ଜଣକ ମାଲଦାର ମାଣିକଚକକୁ ଲାଗିଥିବା ଭାରତ-ବାଂଲାଦେଶ ସୀମାବର୍ତ୍ତୀ ଅଞ୍ଚଳରେ ପ୍ରବେଶ କରୁଥିବାବେଳେ ସେଠାରେ ଡ୍ୟୁଟିରେ ଥିବା ବିଏସଏଫର ଯବାନ ତାଙ୍କ ସନ୍ଦେହଜନକ ଗତିବିଧି ଦେଖିବା ପରେ ତାଙ୍କୁ ଅଟକ ରଖିଥିଲେ। ସେ କାହିଁକି ଏବଂ କେଉଁ ଉଦ୍ଦେଶ୍ୟରେ ଭାରତ ଆସିବାକୁ ଚେଷ୍ଟା କରୁଥିଲେ ସେନେଇ ବିଭିନ୍ନ କେନ୍ଦ୍ରୀୟ ଏଜେନ୍ସି ମଧ୍ୟ ତାଙ୍କୁ ପଚରାଉଚରା କରୁଛନ୍ତି। ହାନ ଏକୁଟିଆ ଭାରତରେ ପ୍ରବେଶ କରିଥିଲେ ନା ତାଙ୍କ ସହ ଆଉ କିଛି ଲୋକ ଭାରତକୁ ଆସିଛନ୍ତି, ତା’ର ଖୋଳତାଡ଼ କରାଯାଉଛି।
ଉଲ୍ଲେଖନୀୟ ଯେ, ବର୍ତ୍ତମାନ ସୀମା ବିବାଦକୁ ନେଇ ଭାରତ ଏବଂ ଚୀନ୍ ମଧ୍ୟରେ ତିକ୍ତତା ଚାଲିଛି । ଏଭଳି ପରିସ୍ଥିତିରେ ଚୀନ୍ ନାଗରିକଙ୍କୁ ବାଂଲାଦେଶ ସୀମାରୁ ଗିରଫ କରାଯିବା ପରେ ଅନେକ ପ୍ରଶ୍ନ ଉଠିଛି।
Powered by Froala Editor