ଆମେ ଇଡି ଅଧିକାରୀ । ରେଡ୍ କରିବାକୁ ଆସିଛୁ । ଏମିତି କହି ଦିଲ୍ଲୀ ହରିଦାସ ନଗରରେ କଳାକନା ବୁଲାଇଛନ୍ତି କିଛି ଲୁଟେରା । ପ୍ରାୟ ୩ କୋଟି ଟଙ୍କା ନେଇଯାଇଛନ୍ତି । ସବୁ ଦେଖି ବି କିଛି କରିପାରିନାହାନ୍ତି ଘର ମାଲିକ । ପରେ ଜାଣିଲା ବେଳକୁ ସବୁ କିଛି ଚାଲିଯାଇଥିଲା ।

ଦିଲ୍ଲୀର ହରିଦାସ ନଗରରେ ସକାଳୁ କିଛି ଲୋକ ଦ୍ୱାରକାର ବାବା ହରିଦାସ ନାଗରରେ ଥିବା ଏକ ଘରର କବାଟ ବାଡେଇଥିଲେ। କବାଟ ଖୋଲିବା ପରେ ଅଭିଯୁକ୍ତମାନେ ଇଡି ଅଧିକାରୀ ଭାବେ ପରିଚୟ ଦେଇ ତାଙ୍କ ଘରେ ପଶିଥିଲେ। ଘରେ ବେଆଇନ୍‌ ଟଙ୍କା ରଖା ଯାଇଥିବା କହି ଅଭିଯୁକ୍ତମାନେ ଆରମ୍ଭ କରିଦେଇଥିଲେ ଯାଞ୍ଚ। ଘରୁ ଯାଞ୍ଚ କରିବା ବାହାନାରେ ସେମାନେ ନଗଦ ୩ କୋଟି ୨୦ ଲକ୍ଷ ଟଙ୍କା ଲୁଟି ନେଇଥିଲେ। କେବଳ ସେତିକି ନୁହେଁ ପରିବାର ଲୋକଙ୍କୁ ଏ ବାବଦରେ ପଚରାଉଚରା କରିବାକୁ ଅଫିସକୁ ଡକାଯିବ ବୋଲି ମଧ୍ୟ କହିଥିଲେ।

ଯେଉଁ ବ୍ୟକ୍ତିଙ୍କ ଘରେ ନକଲି ଇଡି ଅଧିକାରୀମାନେ ଚଢ଼ାଉ କରିଥିଲେ ସେ ନିକଟରେ ଦ୍ୱାରକାଠାରେ ତାଙ୍କର ଗୋଟିଏ ଜମି ବିକ୍ରି କରି ଟଙ୍କା ଘରେ ଆଣି ରଖିଥିଲେ। ତେବେ ଏମାନେ ନକଲି ଇଡି ଅଧିକାରୀ ଜଣାପଡିବା ପରେ ଘର ଲୋକେ ପୁଲିସକୁ ସୂଚନା ଦେଇଛନ୍ତି।

ପୁଲିସ ଜଣେ ଅଭିଯୁକ୍ତଙ୍କୁ ଗିରଫ କରିଛି। ଏହି ମାମଲାରେ ଏକ କାର୍‌କୁ ଜବତ କରାଯାଇଛି। ସେଥିରୁ ୭୦ ଲକ୍ଷ ଟଙ୍କା ମିଳିଛି।

Powered by Froala Editor