ସୁରକ୍ଷିତ ପ୍ରଜ୍ଞାନ, ଖାଲରେ ପଡ଼ୁ ପଡ଼ୁ ରହିଗଲା
ଚନ୍ଦ୍ରପୃଷ୍ଠରେ ଚାଲିବା ଜାରି ରଖିଛି ପ୍ରଜ୍ଞାନ ରୋଭର । ରବିବାର ଅର୍ଥାତ ଅଗଷ୍ଟ ୨୭ରେ ରୋଭର ଏକ ବଡ଼ ଖାଲ ନିକଟରେ ପହଞ୍ଚିଥିଲା । ରୋଭରରେ ଉନ୍ନତ ମାନର ସେନସର ସିଷ୍ଟମ ଲାଗିଥିବାରୁ ଏହା ଖାଲରେ ପଡ଼ିବାରୁ ବର୍ତ୍ତିଯାଇଛି । ଚନ୍ଦ୍ର ପୃଷ୍ଠରେ ଗଡ଼ିବା ବେଳେ ରୋଭର ଏହି ଖାଲର ସନ୍ଧାନ କରିଛି । ରୋଭର ପ୍ରଜ୍ଞାନ ଯେଉଁ ବାଟ ଦେଇ ଯାଉଥିଲା ସେହିଠାରୁ ୩ ମିଟର ଆଗରେ ଏକ ଖାଲଥିବା ଜାଣିବାକୁ ପାଇଥିଲା । ଉକ୍ତ ଖାଲର ବ୍ୟାସ ପ୍ରାୟ ୪ ମିଟର ହେବ । କିନ୍ତୁ ଖାଲରେ ପଡ଼ିବା ପୂର୍ବରୁ ରୋଭର ସୁରକ୍ଷିତ ଫେରିଆସିଥିଲା । ଏବେ ଏହା ସୁରକ୍ଷିତ ଭାବେ ଏକ ନୂଆ ମାର୍ଗରେ ଗତି କରୁଛି।
ଯଦି ରୋଭରଟି ଉକ୍ତ ଖାଲରେ ପଡ଼ିଥାନ୍ତା, ତାହା ନଷ୍ଟ ହେବାର ଆଶଙ୍କା ଥିଲା । ଏପରି ସ୍ଥଳରେ ଭୂପୃଷ୍ଠରେ ଥିବା ନିୟନ୍ତ୍ରଣ କକ୍ଷରୁ ତାହାର ଯୋଗାଯୋଗ ବିଚ୍ଛିନ୍ନ ହୋଇଯାଇଥାନ୍ତା । ଅଳ୍ପକେ ଏକ ଦୁର୍ଘଟଣାରୁ ରକ୍ଷା ପାଇ ଯାଇଛି ପ୍ରଜ୍ଞାନ ରୋଭର। ଏବେ ରୋଭର ନୂଆ ରାସ୍ତାରେ ସୁରକ୍ଷିତ ଭାବେ ଅଗ୍ରସର ହେଉଥିବା ନେଇ ଟ୍ୱିଟ କରି ସୂଚନା ଦେଇଛି ଇସ୍ରୋ।
Powered by Froala Editor
