ଶିଶୁର ଉତ୍ତମ ସ୍ୱାସ୍ଥ୍ୟ ତଥା ଶାରୀରିକ ଓ ମାନସିକ ବିକାଶ ପାଇଁ ଆବଶ୍ୟକ ପୌଷ୍ଟିକ ଆହାର, କେବଳ ମା’ କ୍ଷୀରରୁ ହିଁ ମିଳେ। ସେଥିପାଇଁ ଶିଶୁ ଜନ୍ମ ହେବା ପରଠାରୁ ୬ ମାସ ପର୍ଯ୍ୟନ୍ତ ତାକୁ କେବଳ ମା’ କ୍ଷୀର ଦେବା ଆବଶ୍ୟକ। ପ୍ରସବ ପରେ ସୃଷ୍ଟି ହେଉଥିବା ମା’ର କଷ କ୍ଷୀରରେ ପ୍ରଚୁର ପରିମାଣ ପୁଷ୍ଟିସାର, ଶ୍ୱେତସାର, ସ୍ନେହସାର ତଥା ଅନ୍ୟାନ୍ୟ ୧୦୦ ପ୍ରକାରର ଉପାଦାନ ରହିଥାଏ। ଯାହାକି ଶିଶୁର ଶାରୀରିକ ଓ ମାନସିକ ଶକ୍ତି ବୃଦ୍ଧି କରିବାରେ ସାହାଯ୍ୟ କରିଥାଏ।

ପିଲାଙ୍କ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାରେ ସାହାଯ୍ୟ କରିଥାଏ। ମା’ର ପ୍ରଥମ କ୍ଷୀରରେ ଥିବା ରୋଗ ପ୍ରତିରୋଧକ ଶକ୍ତି ବିଭିନ୍ନ ପ୍ରକାରର ଜୀବାଣୁ ଓ ଭୂତାଣୁ ସଂକ୍ରମଣଠାରୁ ଶିଶୁକୁ ରକ୍ଷା କରିବାରେ ସହାୟକ ହୋଇଥାଏ। ସାଧାରଣ ପ୍ରସବର ଏକ ଘଣ୍ଟା ମଧ୍ୟରେ ଶିଶୁକୁ ମା’ କ୍ଷୀର ଖୁଆଇବା ଉଚିତ୍‌। କିନ୍ତୁ ସିଜରିଆନ୍‌ ଡେଲିଭରି ଦ୍ୱାରା ପ୍ରସବ କରାଯାଇଥିଲେ ଶିଶୁ ଜନ୍ମର ଦୁଇଘଣ୍ଟା ପରେ ସ୍ତନ୍ୟପାନ କରାଯାଇପାରିବ। ନିୟମିତ ସ୍ତନ୍ୟପାନ କରାଉଥିବା ଶିଶୁମାନଙ୍କୁ ତରଳ ଝାଡ଼ା, ତଣ୍ଟି ଓ ଫୁସ୍‌ଫୁସ୍‌ ସଂକ୍ରମଣ, ଟାଇଫଏଡ୍‌, ଚର୍ମରୋଗ, କଲେରା ପ୍ରଭୃତି ରୋଗ ହେବାର ସମ୍ଭାବନା କମ୍‌ ଥାଏ

ନିୟମିତ ସ୍ତନ୍ୟପାନ କରାଉଥିବା ମହିଳାମାନଙ୍କ ଓଜନ ପ୍ରସବ ପରେ ବଢ଼େ ନାହିଁ, ଚୁଟି ଝଡ଼େ ନାହିଁ। ଏହି ମହିଳାମାନଙ୍କୁ ସ୍ତନ କର୍କଟ ଭଳି ମାରାତ୍ମକ ରୋଗ ହେବାର ଆଶଙ୍କା ମଧ୍ୟ କମ୍‌ ଥାଏ। ସ୍ତନ୍ୟପାନ ପରେ ଶିଶୁଟିକୁ କାନ୍ଧରେ ପକାଇ ପିଠିକୁ ଥାପୁଡ଼େଇ ଦେଲେ ସେ ହାକୁଟି ମାରିଥାଏ। ଏହା ଦ୍ୱାରା ତା’ ପେଟ ଭିତରକୁ ଯାଇଥିବା ପବନ ବାହାରି ଆସେ ଫଳରେ ସେ ବାନ୍ତି କରେନାହିଁ। ଶିଶୁକୁ ସବୁବେଳେ ଦୁଇ ସ୍ତନରୁ ସମ ପରିମାଣରେ କ୍ଷୀର ପିଆଇବା ଉଚିତ୍‌। ସ୍ତନ୍ୟପାନ କରାଇବା ବେଳେ ଶିଶୁକୁ ଆଦୌ ଗୋଟିଏ ପଟେ କଡ଼େଇ ଖୁଆଇବା ଉଚିତ୍ ନୁହେଁ। ଏହା ଦ୍ୱାରା କ୍ଷୀର ଶିଶୁର ଛାତି ଭିତରକୁ ଚାଲିଯାଇ ଶ୍ୱାସନଳୀ ମଧ୍ୟ ବନ୍ଦ କରି ଦେଇପାରେ। 

Powered by Froala Editor