ଭୁବନେଶ୍ୱର:  ପୂର୍ବ କେନ୍ଦ୍ରୀୟ ବଙ୍ଗୋପସାଗର ଓ ଉତ୍ତର ଆଣ୍ଡାମାନ ସଂଲଗ୍ନ ଅଞ୍ଚଳରେ ଶୁକ୍ରବାର ସୃଷ୍ଟି ହୋଇଥିବା ଘୂର୍ଣ୍ଣିବଳୟ ଶନିବାର ଲଘୁଚାପର ରୂପ ନେଇଥିଲା । ତେବେ ଉକ୍ତ ଲଘୁଚାପ ଆଜି ୱେଲମାର୍କଡରେ ପରିଣତ ହୋଇଛି ।  ଆସନ୍ତା ୧୨ ଘଣ୍ଟାରେ ୱେଲମାର୍କଡ ଲୋ ପ୍ରେସର ଅବପାତ ରୂପ ନେବ ।  ଉତ୍ତର, ଉତ୍ତର-ପଶ୍ଚିମ ଦିଗକୁ ଗତି କରି ୨୪ ତାରିଖରେ ସାମୁଦ୍ରିକ ଝଡ଼ ରୂପ ନେବ ।  ପରବର୍ତ୍ତୀ ୨୪ ଘଣ୍ଟାରେ ଅତି ଭୀଷଣ ବାତ୍ୟାରେ ପରିଣତ ହେବ । ବାତ୍ୟା ‘ୟଶ’କୁ ନେଇ ଏବେ ସମସ୍ତେ  ତପôର ।  ଏହାରି ଭିତରେ ବାତ୍ୟା ମୁକାବିଲା ପ୍ରସ୍ତୁତି ତଦାରଖ ପାଇଁ ସ୍ୱତନ୍ତ୍ର ରିଲିଫ କମିଶନର ପ୍ରଦୀପ ଜେନା  ବାଲେଶ୍ୱର ଗସ୍ତ କରି ବାତ୍ୟା ପୂର୍ବରୁ ପ୍ରସ୍ତୁତି ନେଇ ବିଭିନ୍ନ ଅଧିକାରୀମାନଙ୍କ ସହ ଆଲୋଚନା କରିଛନ୍ତି ।

ଆଲୋଚନା ପରେ ସେ କହିଛନ୍ତି ଯେ, କଚ୍ଚା ଓ ଆଜବେଷ୍ଟସ ଘରେ ଥିବା ଲୋକଙ୍କୁ ସେଲଟର ହୋମକୁ ନିଆଯିବ ।  ଏପରିକି ଯଦି କୋଠାଘରେ ପାଣି ପଶିବାକୁ ଥାଏ ତାହେଲେ ବି ସ୍ଥାନାନ୍ତର କରାଯିବ ।  ବାତ୍ୟା ହେଲେ ପ୍ରଭାବ ରହିବ । ତଥାପି କ୍ଷୟକ୍ଷତି କମ ପାଇଁ ଚେଷ୍ଟା ରହିବ ।  ସୂଚନା ଦିଆଯିବା ମାତ୍ରେ ଶୀଘ୍ର ସେଲଟର ହୋମକୁ ଚାଲିଆସିବା ପାଇଁ ଶ୍ରୀ ଜେନା ପରାମର୍ଶ ଦେଇଛନ୍ତି । ଶୀଘ୍ର ଆସିଲେ କୋଭିଡ ଟେଷ୍ଟ ହେବ । ଦରକାର ପଡ଼ିଥିଲେ କୋଭିଡ କେୟାର ସେଣ୍ଟରକୁ ପଠାଯିବ ।  ବାତ୍ୟା ବେଳେ ବୟସ୍କ ଲୋକେ ଘରୁ ନବାହାରିବାକୁ ବି ଶ୍ରୀ ଜେନା ପରାମର୍ଶ ଦେଇଛନ୍ତି ।  ଯୁବ ପିଢି ପବନ ବହିବା ବେଳେ ବାଇକରେ ଏଣେତେଣେ ବୁଲନ୍ତୁ ନାହିଁ ।  ଆମ୍ବ, ନଡ଼ିଆ ଗୋଟାଇବା ପାଇଁ ବାହାରକୁ ବାହାରିବେ ନାହିଁ ।  ଆଶ୍ରୟସ୍ଥଳକୁ ଯାଇନଥିଲେ ପିଇବା ପାଣି ଆଗୁଆ ମହଜୁଦ ରଖିବାକୁ ସ୍ୱତନ୍ତ୍ର ରିଲିଫ କମିଶନର ପ୍ରଦୀପ ଜେନା ପରାମର୍ଶ ଦେଇଛନ୍ତି । 

Powered by Froala Editor