ଜଘନ୍ୟ କାଣ୍ଡ: ବିବାହ କରିବାକୁ ଜିଦ୍ କରିବାରୁ ପ୍ରେମିକାକୁ ହତ୍ୟା
ଭୁବନେଶ୍ୱର: ଜହ୍ଲାଦ ପ୍ରେମିକ ଘଟାଇଛି ଜଘନ୍ୟ କାଣ୍ଡ । ବିବାହ କରିବାକୁ ଜିଦ୍ କରିବାରୁ ପ୍ରେମିକାକୁ ଭୁବନେଶ୍ୱରରୁ ସୁଦୂର ସୁରତ ନେଇ ନିର୍ମମ ଭାବେ କରିଛି ହତ୍ୟା। ଛୁରୀରେ ୪୯ ଥର ଆକ୍ରମଣ ମାରିଛି ନିର୍ଦ୍ଦୟ ପ୍ରେମିକ । ମୃତା ଯୁବତୀ ହେଉଛନ୍ତି ଓଡ଼ିଆ ଯୁବତୀ ଲୁନି ଦାସ । ଲୁନିଙ୍କୁ ହତ୍ୟା ଅଭିଯୋଗରେ ତାଙ୍କ ପ୍ରେମିକ ଜଗନ୍ନାଥ ଗୌଡ଼ଙ୍କୁ ବାନ୍ଧିଛି ଗୁଜରାଟର ସୁରତ ପୁଲିସ୍।
ପ୍ରାୟ ୧୫ ଦିନ ତଳେ ସୁରତ ଅଞ୍ଜନି ଇଣ୍ଡଷ୍ଟ୍ରିଆଲ୍ ଇଷ୍ଟେଟ୍ ପାଖରୁ ଜଣେ ଯୁବତୀଙ୍କ ରକ୍ତାକ୍ତ ମୃତଦେହ ଉଦ୍ଧାର ହୋଇଥିଲା । ପୁଲିସ୍ ପ୍ରାଥମିକ ତଦନ୍ତ ଆରମ୍ଭ କରି ଏହା ଓଡ଼ିଅ ଯୁବତୀ ଲୁନି ଦାସଙ୍କ ମୃତଦେହ ବୋଲି ଜାଣିବାକୁ ପାଇଥିଲା। ଏହାପରେ ପୁଲିସ୍ ଏହି ଘଟଣାର ତନାଘନା ଆରମ୍ଭ କରି ୫୦୦ରୁ ଅଧିକ ସିସିଟିଭି ଫୁଟେଜ୍ ଓ କଲ୍ ଡିଟେଲ୍ସର ତଦନ୍ତ କରିବା ପରେ ତାଙ୍କ ପ୍ରେମିକ ଜଗନ୍ନାଥକୁ ଗିରଫ କରିଛି।
ଭୁବନେଶ୍ୱରରେ ରହୁଥିବା ଲୁନି ସହ ଜଗନ୍ନାଥର ଗତ ୩ ବର୍ଷ ଧରି ପ୍ରେମ ସମ୍ପର୍କ ଥିଲା। ବିବାହ ପାଇଁ ଲୁନି ଜଗନ୍ନାଥକୁ ବାଧ୍ୟ କରିବାରୁ ଶେଷରେ ସେ ଲୁନିକୁ ରାସ୍ତାରୁ ହଟାଇବାକୁ ନିଷ୍ପତ୍ତି ନେଇଥିଲା ।
ଏଥିନିମନ୍ତେ ସୁଚିନ୍ତିତ ଯୋଜନା କରି ଦୁଇ ସପ୍ତାହ ତଳେ ଭୁବନେଶ୍ୱର ଯାଇ ପୁରୀ-ଅହମ୍ମଦାବାଦ୍ ଟ୍ରେନ୍ରେ ଲୁନିକୁ ସୁରତ ଆଣିଥିଲା ଜଗନ୍ନାଥ । ଆଉ ଯୋଜନା ମୁତାବକ ସିଧା ଅଞ୍ଜନି ଇଣ୍ଡଷ୍ଟ୍ରିଆଲ୍ ଇଷ୍ଟେଟ୍ ପାଖରେ ଥିବା ନିଛାଟିଆ ଜାଗାକୁ ନେଇ ଯାଇଥିଲା। ସେଠାରେ ଧାରୁଆ ଅସ୍ତ୍ରରେ ହାଣି ତାକୁ ହତ୍ୟା କରିଥିଲା । ଜଗନ୍ନାଥର ରାଗ ଏତେ ଥିଲା ଯେ, ନିଜ ପ୍ରେମିକାଙ୍କୁ ୪୯ ଥର ଛୁରୀରେ ଆକ୍ରମଣ କରି ହତ୍ୟା କରିଥିଲା । ଏବେ ପୁଲିସ୍ ଅଭିଯୁକ୍ତକୁ ଗିରଫ କରି ଅଧିକ ତଦନ୍ତ କରୁଛି ।
Powered by Froala Editor
