ପଶ୍ଚିମବଙ୍ଗ ଶିକ୍ଷକ ନିଯୁକ୍ତି ଦୁର୍ନୀତି ମାମଲାରେ ଗିରଫ ହୋଇଥିବା ଅର୍ପିତା ମୁଖାର୍ଜୀଙ୍କ ବିରୋଧରେ ଇଡି ଅନୁସନ୍ଧାନର ପରିସର ବୃଦ୍ଧି କରିଛି। ଗତ ମାସରେ ଇଡି କୋଲକାତାରେ ଥିବା ଅର୍ପିତାଙ୍କ ବିଭିନ୍ନ ଘର ଉପରେ ଚଢ଼ାଉ କରି ନଗଦ ଟଙ୍କା ଓ ସୁନା ଜବତ କରିଥିଲା। ଅର୍ପିତାଙ୍କ ଏକ ଘରୁ ଇଡିକୁ ଚାରିଟି ବଡ଼ ହାର, ୧୮ଟି କାନଫୁଲ, ଗୋଟିଏ ସୁନା କଲମ, ୫ଟି ମୁଦି ମିଳିଥିଲା। ତଦନ୍ତ ଯେମିତି ଯେମିତି ଆଗକୁ ବଢୁଛି ନୂତନ ନୂତନ ଖୁଲାସା ହେବାରେ ଲାଗିଛି। ଏମିତି ଏକ ଖୁଲାସା ଅର୍ପିତା ମୁଖାର୍ଜୀଙ୍କୁ ନେଇ ହୋଇଛି। ତଦନ୍ତରୁ ଜଣା ପଡିଛି ଯେ, ତାଙ୍କ ନାମରେ ଏଲଆଇସିର ମୋଟ୍ ୩୧ ପଲିସି ରହିଛି। ସବୁଠୁ ବଡ କଥା ଏହି ସବୁ ପୋଲିସିରେ ନୋମିନି ଭାବେ ପାର୍ଥ ଚାଟାର୍ଜୀଙ୍କ ନାମ ରହିଛି।

ଏହି ସବୁ ସୂଚନା ଇଡିର ରିମାଣ୍ଡ କପିରୁ ମିଳିଛି। ଏଥିରୁ ଖୁଲାସା ହୋଇଛି ଯେ, ପାର୍ଥ ଏବଂ ଅର୍ପିତା ଦୁହେଁ ଏପିଏ ୟୁଟିଲିଟି କମ୍ପାନୀରେ ଭାଗିଦାରୀ ଥିଲେ। ଅର୍ପିତା ନଗଦ ଦେଇ କିଛି ଫ୍ଲାଟ୍ ମଧ୍ୟ କିଣିଥିଲେ। ଉକ୍ତ ଟଙ୍କା କାହାର ଥିଲା ଏବଂ ଅର୍ପିତା ଏତେ ଟଙ୍କା କେଉଁଠୁ ଆଣିଲେ ଇଡି ଏହାର ଯାଞ୍ଚ କରୁଛି। ବର୍ତ୍ତମାନ ଅର୍ପିତା ମୁଖାର୍ଜୀ ଏବଂ ପାର୍ଥ ଚାଟାର୍ଜୀ ଅଗଷ୍ଟ ପାଞ୍ଚ ପର୍ଯ୍ୟନ୍ତ ଇଡି ରିମାଣ୍ଡରେ ଅଛନ୍ତି। ତଦନ୍ତ ସମୟରେ ଉଭୟଙ୍କ ବିରୋଧରେ ଇଡିକୁ ପର୍ଯ୍ୟାପ୍ତ ପ୍ରମାଣ ମିଳିଛି।

ତେବେ ଅର୍ପିତା ମୁଖାର୍ଜୀଙ୍କ ବିଭିନ୍ନ ଫ୍ଲାଟ୍‌ରୁ ୫୦ କୋଟିରୁ ଊର୍ଦ୍ଧ୍ବ ଟଙ୍କା ଜବତ କଲା ପରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଦୃଷ୍ଟି ଏବେ ପଡ଼ିଛି ପାର୍ଥ-ଅର୍ପିତାଙ୍କ ୧୧ଟି ବ୍ୟାଙ୍କ ଆକାଉଣ୍ଟ ଉପରେ। ଏଥିରୁ ୩ଟି ଆକାଉଣ୍ଟ ହେଉଛି ପାର୍ଥଙ୍କର ଏବଂ ୮ଟି ଅର୍ପିତାଙ୍କର। ଏହି ଆକାଉଣ୍ଟଗୁଡ଼ିକରେ ପ୍ରାୟ ୮ କୋଟି ଟଙ୍କା ରହିଥିବା ବେଳେ ସେଥିରୁ ୨.୫ କୋଟି ଟଙ୍କାକୁ ଫ୍ରିଜ୍ (ଅଚଳ) କରିଦିଆଯାଇଛି। ଇଡିର କହିବା ଅନୁସାରେ ପାର୍ଥଙ୍କର ୫ଟି ଆକାଉଣ୍ଟ ଅଛି। ସେଥିରୁ ଦୁଇଟି ଅଛି ରାଷ୍ଟ୍ରାୟତ୍ତ ବ୍ୟାଙ୍କରେ ଏବଂ ଗୋଟିଏ ଅଛି ଘରୋଇ ବ୍ୟାଙ୍କରେ। ସେ ୨୦୨୧ରେ ନିର୍ବାଚନ କମିସନ ନିକଟରେ କରିଥିବା ସତ୍ୟପାଠ ଅନୁଯାୟୀ ତାଙ୍କ ବ୍ୟାଙ୍କ ଖାତାଗୁଡ଼ିକରେ ପ୍ରାୟ ୬୦ ଲକ୍ଷ ଟଙ୍କା ଥିଲା। ଅର୍ପିତାଙ୍କ ସହ ତାଙ୍କର ୧୦ ବର୍ଷରୁ ଅଧିକ କାଳ ହେଲା ସମ୍ପର୍କ ରହିଛି ବୋଲି ଇଡି କେତେକ କାଗଜପତ୍ରରୁ ଜାଣିବାକୁ ପାଇଛି।

Powered by Froala Editor