ଉତ୍ତରପ୍ରଦେଶର କୁସିନଗରରେ ‌ଦୁଇ ଜଣ ପରିବାରର ୪ ଜଣ ଶିଶୁ ବିଷାକ୍ତ ଚକୋଲେଟ୍‌ ଖାଇ ମୃତ୍ୟୁବରଣ କରିଛନ୍ତି। ଏକାସାଙ୍ଗରେ ୪ଜଣ ଶିଶୁଙ୍କ ମୃତ୍ୟୁ ଖବର ମିଳିବା ପରେ ସମଗ୍ର ଅଞ୍ଚଳରେ ଶୋକରଛାୟ ଖେଳି ଯାଇଛି। ମୃତକଙ୍କ ମଧ୍ୟରେ ଦୁଇଜଣ ପୁଅ ଏବଂ ଦୁଇଜଣ ଝିଅ ସାମିଲ ଅଛନ୍ତି। ସମସ୍ତଙ୍କର ବୟସ ୨ରୁ ୬ ବର୍ଷ ମଧ୍ୟରେ ରହିଛି। ଏହି ଦୁଃଖଦ ଘଟଣା କସୟା ପୁଲିସ ଷ୍ଟେସନର କୁଡୱା ଓରଫ ଦିଲୀପନଗରର ଲଠଉର ଟୋଲେରୁ ଆସିଛି।

ପରିବାର ଳୋକଙ୍କ କହିବା ଅନୁଯାୟୀ, ଘରେ ବାହାରେ ପଡ଼ିଥିବା ଚକୋଲେଟ ଖାଇ ସେମାନଙ୍କର ମୃତ୍ୟୁ ଘଟିଛି। ସେହିପରି ଚକୋଲେଟ ଛଡ଼ା ଘର ବାହାରେ ପଇସା ପଡ଼ିଥିବା ଦେଖାଯାଇଛି। ପରିବାର ଲୋକଙ୍କ କହିବା ଅନୁଯାୟୀ, ମୃତକଙ୍କ ମଧ୍ୟରୁ ବଡ଼ ପିଲାଟି ଚକୋଲେଟ ଆଣି ଅନ୍ୟ ୩ ଜଣଙ୍କୁ ବାଣ୍ଟିଥିଲେ। ଚକୋଲେଟ ଖାଇବା ପରେ ୪ ଜଣ ଯାକ ଅସୁସ୍ଥ ହୋଇ ପଡ଼ିଥିଲେ। ସେମାନଙ୍କୁ ସଙ୍ଗେ ସଙ୍ଗେ ମେଡିକାଲ ନିଆଯାଇଥିଲା। ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଛନ୍ତି । ସମ୍ପୃକ୍ତ ପରିବାର ଅନୁସୂଚିତ ଉପଜାତି ବର୍ଗର ବୋଲି ଜଣାପଡ଼ିଛି।

ମୃତ୍ୟୁର କାରଣକୁ ନେଇ ପୁଲିସ ତନାଘନା ଆରମ୍ଭ କରିଛି। ଘଟଣାର ତଦନ୍ତ ପାଇଁ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନିର୍ଦ୍ଦେଶ ଦେଇଛନ୍ତି। ସେହିପରି ସମ୍ପୃକ୍ତ ପରିବାରକୁ ସମସ୍ତ ସହାୟତା ଯୋଗାଇ ଦେବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।

Powered by Froala Editor