କେନ୍ଦ୍ର ସରକାର ଆମ୍ ଆଦମୀ ପାର୍ଟି(ଆପ୍)ର ପୂର୍ବତନ ନେତା କୁମାର ବିଶ୍ଵାସଙ୍କ ସୁରକ୍ଷା ବ୍ୟବସ୍ଥା ବଢାଇଛନ୍ତି। ବର୍ତ୍ତମାନ କେନ୍ଦ୍ରୀୟ ସୁରକ୍ଷା ଏଜେନ୍ସି ସିଆରପିଏଫ ଜରିଆରେ କୁମାର ବିଶ୍ଵାସଙ୍କୁ ଓ୍ଵାଇ ଶ୍ରେଣୀ ସୁରକ୍ଷା ଯୋଗାଇ ଦେବେ। ବିଶ୍ଵାସ ଆପ୍ ସଂଯୋଜକ ତଥା ଦିଲ୍ଲୀର ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ଵାଲଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଥିଲେ। ଏହାର ସମୀକ୍ଷା ପରେ କେନ୍ଦ୍ର ସରକାର ଏହି ପଦକ୍ଷେପ ନେଇଛନ୍ତି।

ଗୁଇନ୍ଦା ସୂଚନା ଆଧାରରେ ବିପଦକୁ ଆକଳନ କରିବା ପରେ ତାଙ୍କୁ ଓ୍ଵାଇ ଶ୍ରେଣୀ ସୁରକ୍ଷା ଯୋଗାଇ ଦେବାକୁ ନିଷ୍ପତ୍ତି ହୋଇଛି। ବିଶ୍ଵାସ ପଞ୍ଜାବରେ ବିଧାନସଭା ନିର୍ବାଚନ ପାଇଁ ପ୍ରଚାର ସମୟରେ କେଜ୍ରିଓ୍ଵାଲଙ୍କ ଉପରେ ବିଚ୍ଛିନ୍ନତାବାଦୀଙ୍କ ସମର୍ଥନ କରୁଥିବା ଅଭିଯୋଗ କରିଥିଲେ।

କୁମାର ବିଶ୍ୱାସ କହିଥିଲେ ଯେ “କିଛି ବର୍ଷ ତଳେ ଗୋଟିଏ ଆଲୋଚନାରେ କେଜ୍ରିୱାଲ ମୋତେ କହିଥିଲେ ଯେ ସେ ପଞ୍ଜାବର ମୁଖ୍ୟମନ୍ତ୍ରୀ ହେବେ ନଚେତ ଗୋଟିଏ ସ୍ୱାଧୀନ ଦେଶ(ଖଲିସ୍ତାନ)ର ପ୍ରଧାନମନ୍ତ୍ରୀ ପଦ ପାଇବେ।”

ଶ୍ରୀ ବିଶ୍ୱାସଙ୍କ ଏପରି ବୟାନ ସବୁ ରାଜନୀତିକ ଦଳର ନେତାଙ୍କ ଦୃଷ୍ଟି ଆକର୍ଷଣ କରିଥିଲା। ଏପରିକି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ କୁମାର ବିଶ୍ୱାସଙ୍କ ଏହି ବୟାନକୁ ଗୋଟିଏ ନିର୍ବାଚନ ରାଲିରେ ଉଠାଇଥିଲେ।

Powered by Froala Editor