ରାଜଧାନୀରେ ଦିଲ୍ଲୀରେ ସାଂଘାତିକ ହେଲାଣି ସ୍ଥିତି । ଆକ୍ରାନ୍ତ ସଂଖ୍ୟା ବଢୁଥିବା ବେଳେ ଚିକିତ୍ସାରେ ବାଧକ ସାଜିଛି ଅକ୍ସିଜେନ୍ ଅଭାବ । ଅକ୍ସିଜେନ ଅଭାବରୁ ଅନେକ ରୋଗୀ ପ୍ରାଣ ହରାଇଲେଣି । ହସପିଟାଲରେ ଅକ୍ସିଜେନର ଅଭାବ ଦେଖା ଦେଇଥିବା ବେଳେ, ଆଜି ଦେଶର ସବୁ ମୁଖ୍ୟମନ୍ତ୍ରୀଙ୍କୁ ଅକ୍ସିଜେନ୍ ମାଗିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ । ଏନେଇ ସେ ଟ୍ୱିଟ୍ କରି ସୂଚନା ଦେଇଛନ୍ତି।

ସେ ଟ୍ୱିଟ୍ କରି ଲେଖିଛନ୍ତି " ମୁଁ ଦେଶର ସବୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛି ଯେ ଯଦି ସେମାନଙ୍କ ପାଖରେ ବଳକା ଅକ୍ସିଜେନ୍‌ ଅଛନ୍ତି ତେବେ ସେମାନେ ଦିଲ୍ଲୀକୁ ଦିଅନ୍ତୁ । ଯଦିଓ କେନ୍ଦ୍ର ସରକାର ସାହାଯ୍ୟ କରୁଛନ୍ତି କିନ୍ତୁ କରୋନା ସଂଖ୍ୟା ବଢ଼ୁଥିବାର ତାହା ପର୍ଯ୍ୟାପ୍ତ ନୁହେଁ।"

ସମ୍ପ୍ରତି ସବୁଠାରୁ ଅଧିକ କ୍ଷତିଗ୍ରସ୍ତ ସହର ଦିଲ୍ଲୀ ଗତ କିଛି ଦିନ ହେବ ଦୈନିକ ୨୦ ହଜାରରୁ ଅଧିକ କରୋନା ପଜିଟିଭ୍ ଚିହ୍ନଟ ହେଉଛନ୍ତି। ଶୁକ୍ରବାର ଦିନ, ଏହା ଗୋଟିଏ ଦିନରେ ସର୍ବାଧିକ ୩୪୮ଜଣ କରୋନା ସଂକ୍ରମିତଙ୍କ ମୃତ୍ୟୁ ରେକର୍ଡ ସୃଷ୍ଟି କରିଛି। ଗତ ୨୪ ଘଣ୍ଟା ଭିତରେ ସହରରେ ୨୪,୩୩୧ ଜଣ ନୂତନ କରୋନା ପଜିଟିଭ୍ ଚିହ୍ନଟ ହୋଇଛନ୍ତି।

ଦିଲ୍ଲୀରେ ଏବେ ବି ୯୦ ହଜାରରୁ ଅଧିକ ସକ୍ରିୟ ମାମଲା ଏହାର ସ୍ୱାସ୍ଥ୍ୟ ଭିତ୍ତିଭୂମି ଉପରେ ପ୍ରବଳ ଚାପ ପକାଉଛି। ସହରରେ ମେଡିକାଲ ଅମ୍ଳଜାନ, ଔଷଧ ଏବଂ ଚିକିତ୍ସା ଶଯ୍ୟାରେ ବ୍ୟାପକ ଅଭାବ ଦେଖାଦେଇଛି।

ଅକ୍ସିଜେନ୍ ଅଭାବରୁ ଦିଲ୍ଲୀର ଗୋଲ୍ଡେନ୍ ହସ୍ପିଟାଲରେ ୨୫ ଜଣ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଛି । ଏହାସହ ଅକ୍ସିଜେନ ନଥିବାରୁ ଅନେକ ହସପିଟାଲ ବେଡ୍ ହଟାଇ ଦେଇଛନ୍ତି । ତେଣୁ କରୋନା ଭଳି ମହାମାରୀ ସମୟରେ ଚିକିତ୍ସାରେ ଯେପରି କୌଣସି ସମସ୍ୟା ନଉପୁଜିବ, ସେଥିପାଇଁ ଅକ୍ସିଜେନ୍ ଯୋଗାଇ ଦେବାକୁ ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି ଅରବିନ୍ଦ କେଜରିଓ୍ବାଲ ।

Powered by Froala Editor