ନୂଆଦିଲ୍ଲୀ:  ବିଶ୍ୱବାସୀଙ୍କୁ  ବଡ଼ ଖୁସି ଖବର ମିଳିଛି। କାରଣ ବିଶ୍ୱବାସୀଙ୍କୁ ମିଳିଛି କରୋନା ବିରୋଧୀ ପ୍ରଥମ ବଟିକା। ବିଶ୍ୱର ପ୍ରଥମ କୋଭିଡ ବଟିକା ମୋଲନୁପିରାଭିରକୁ ଆଜି ବ୍ରିଟେନ ସରକାର ବ୍ୟବହାର ପାଇଁ ଅନୁମତି ଦେଇଛନ୍ତି।

ସୂଚନାନୁଯାୟୀ , ଏହା ଲକ୍ଷଣ ଯୁକ୍ତ କରୋନା ରୋଗୀଙ୍କ ଚିକିତ୍ସାରେ ଗେମ ଚେଞ୍ଜର ସାବ୍ୟସ୍ତ ହେଉଥିବା ଟ୍ରାଏଲରୁ ଜଣାପଡ଼ିଥିଲା। ଏହାପରେ ବ୍ରିଟେନ ସରକାର ଏହାର ବ୍ୟବହାର ପାଇଁ ସର୍ତ୍ତମୂଳକ ଅନୁମତି ପ୍ରଦାନ କରିଛନ୍ତି। ବ୍ରିଟେନ ବିଶ୍ୱର ପ୍ରଥମ ରାଷ୍ଟ୍ର ଭାବେ କରୋନା ବଟିକାକୁ ଚିକିତ୍ସା ପ୍ରକ୍ରିୟାରେ ସାମିଲ କରିବାକୁ ଗ୍ରୀନ ସିଗ୍ନାଲ ଦେଇଛି ସତ, ହେଲେ ଅନ୍ୟ ରାଷ୍ଟ୍ରଗୁଡ଼ିକୁ ଏହି ବଟିକା କେବେ ମିଳିବ ସେକଥା କହିବାମ ମୁସ୍କିଲ।

ଅନ୍ୟପକ୍ଷରେ  ବିଶ୍ୱରେ ମହାମାରୀ କୋଭିଡର ଆଉ ଏକ ଲହର ଆସିବା ନେଇ ଚେତାବନୀ ଦେଇଛି ବିଶ୍ୱ ସ୍ୱାସ୍ଥ୍ୟ ସଂଗଠନ (ହୁ) । ସଂଗଠନ ପକ୍ଷରୁ କୁହାଯାଇଛି ଯେ ଜନସାଧାରଣଙ୍କୁ କୋଭିଡ ଟିକା ପ୍ରଦାନରେ ବିଳମ୍ବ ଏବଂ କୋଭିଡ ସମ୍ପର୍କିତ ନିର୍ଦ୍ଦେଶାବଳୀକୁ ଜନସାଧାରଣ କଡାକଡି ପାଳନ କରୁନଥିବାରୁ ୟୁରୋପ ଏବଂ କେନ୍ଦ୍ର ଏସିଆରେ ଫେବ୍ରୁଆରୀ ସୁଦ୍ଧା ପ୍ରାୟ ୫ ଲକ୍ଷ ଲୋକ କୋଭିଡରେ ପ୍ରାଣ ହରାଇବେ । ବିଶ୍ୱ ସ୍ୱାସ୍ଥ୍ୟ ସଂଗଠନର ଆଞ୍ଚଳିକ ନିର୍ଦ୍ଦେଶକ ଡା.ହାନ୍ସ କ୍ଲୁଗେ କହିଛନ୍ତି ଯେ, ୟୁରୋପ ଏବଂ କେନ୍ଦ୍ର ଏସିଆ ରାଷ୍ଟ୍ରଗୁଡିକରେ ୯୫% ଲୋକ ଯଦି ତୁଣ୍ଡି ପିନ୍ଧନ୍ତି ତେବେ ସେମାନେ ୫ ଲକ୍ଷ ଲୋକଙ୍କ ମଧ୍ୟରୁ ୧,୮୮,୦୦୦ ଲୋକଙ୍କର ଜୀବନ ବଞ୍ଚାଇପାରିବେ ।
ଗତ ଚାରି ସପ୍ତାହ ମଧ୍ୟରେ ଏହି ଅଞ୍ଚଳରେ ନୂଆ କରୋନା ସଂକ୍ରମଣ ମାମଲାରେ ୫୫% ବୃଦ୍ଧି ପରିଲକ୍ଷିତ ହୋଇଛି । ସମୁଦାୟ ବିଶ୍ୱରେ ଯେତିକି କୋଭିଡ ଆକ୍ରାନ୍ତ ରହିଛନ୍ତି, ସେମାନଙ୍କ ମଧ୍ୟରୁ ୫୯% କେବଳ ୟୁରୋପ ଏବଂ କେନ୍ଦ୍ର ଏସିଆ ରାଷ୍ଟ୍ରରେ ରହିଥିବାବେଳେ ସମଗ୍ର ବିଶ୍ୱରେ ହେଉଥିବା କରୋନା ଜନିତ ମୃତ୍ୟୁର ୪୮% ଏହି ରାଷ୍ଟ୍ରଗୁଡିକରେ ଘଟୁଛି । ତେଣୁ କୋଭିଡ ମହାମାରୀର ଆଉ ଏକ ଲହରକୁ ନେଇ ଆମେ ଅତ୍ୟନ୍ତ ସମ୍ବେଦନଶୀଳ ସ୍ଥିତିରେ ରହିଥିବା ଡା. କ୍ଲୁଗେ କହିଛନ୍ତି । ତାଙ୍କ କହିବା ଅନୁଯାୟୀ ୟୁରୋପ ସଂପ୍ରତି ଏହି ମହାମାରୀ ପ୍ରତ୍ୟାବର୍ତ୍ତନର କେନ୍ଦ୍ର ସ୍ଥଳ ପାଲଟିଛି । ଅବଶ୍ୟ ସ୍ୱାସ୍ଥ୍ୟ ଅଧିକାରୀମାନେ ସଂପ୍ରତି ଏହି ଭୂତାଣୁ ସମ୍ପର୍କରେ ଅଧିକ ଭଲ ଭାବରେ ଜାଣିଛନ୍ତି ଏବଂ ତାହାର ମୁକାବିଲା କରିବାର ଯଥେଷ୍ଟ ସାଧନ ସେମାନଙ୍କ ନିକଟରେ ରହିଛି । ସେ କହିଛନ୍ତି ଯେ, ଯେଉଁସବୁ ସ୍ଥାନରେ ଟିକାକରଣ ହାର କମ୍‍ ରହିଛି, ସେଠାରେ ଅଧିକ ସଂଖ୍ୟାରେ ଲୋକ ଡାକ୍ତରଖାନାରେ ଭର୍ତ୍ତି ହେଉଛନ୍ତି । ୟୁରୋପରେ ସଂପ୍ରତି ପ୍ରତି ସପ୍ତାହରେ ପ୍ରାୟ ୧.୮ ନିୟୁତ ନୂଆ କରୋନା ଆକ୍ରାନ୍ତ ଚିହ୍ନଟ ହେଉଛନ୍ତି, ଯାହା ପୂର୍ବ ସପ୍ତାହ ତୁଳନାରେ ୬% ଅଧିକ । ସେହିଭଳି ଏଠାରେ ମୃତ୍ୟୁହାର ମଧ୍ୟ ୧୨% ବୃଦ୍ଧିପାଇଛି ।

Powered by Froala Editor