ଆର୍ଥର ରୋଡ୍ ଜେଲ୍ର ପ୍ରଥମ ଫ୍ଲୋର୍ ବାରାକ୍ ନମ୍ବର-୧ରେ କଟିଲା ଆର୍ୟନଙ୍କ ପ୍ରଥମ ରାତି
ମୁମ୍ବାଇ: ମୁମ୍ବାଇ ଡ୍ରଗ୍ସ ପାର୍ଟି ମାମଲାରେ ଗିରଫ ହୋଇଥିବା ବଲିଉଡ୍ ସୁପରଷ୍ଟାର ଶାହାରୁଖ୍ ଖାନ୍ଙ୍କ ପୁଅ ଆର୍ୟନ୍ ଖାନ୍ଙ୍କ ଜାମିନ୍ ଆବେଦନ ଖାରଜ ହୋଇଛି । ଏହାପରେ ତାଙ୍କୁ ଆର୍ଥର ରୋଡ୍ ଜେଲ୍ର ପ୍ରଥମ ଫ୍ଲୋର୍ ବାରାକ୍ ନମ୍ବର-୧ରେ ରଖାଯାଇଥିଲା । ସେଠାରେ ତାଙ୍କର ପ୍ରଥମ ରାତି କଟିଛି । ତାଙ୍କ ସମେତ ଗିରଫ ହୋଇଥିବା ଅନ୍ୟ ୮ ଜଣ ମଧ୍ୟ ସେଠାରେ ରହିଛନ୍ତି । ସମସ୍ତଙ୍କୁ କ୍ୱାରେଣ୍ଟାଇନ୍ରେ ରଖାଯାଇଥିବା ବେଳେ କରୋନା ପରୀକ୍ଷା କରାଯାଇଥିଲା । ରିପୋର୍ଟ ନେଗେଟିଭ୍ ଆସିଛି । ଆଉ ୫ ଦିନ ସେଠାରେ ସମସ୍ତଙ୍କୁ ରଖାଯିବ । ଯଦି କାହାର ଲକ୍ଷଣ ଦେଖାଯାଏ ତେବେ ଆଉ ଥରେ କରୋନା ପରୀକ୍ଷା ହେବ ।
ବର୍ତ୍ତମାନ କାହାରିକୁ ଜେଲ୍ ୟୁନିଫର୍ମ ଦିଆଯାଇନି । ହେଲେ ସମସ୍ତଙ୍କୁ ଜେଲ୍ ଅନ୍ତେବାସୀ ଭାବେ ରହିବାକୁ ପଡ଼ିବ । ଜେଲରେ ଘର ଖାଇବା ଚାହିଁଲେ କୋର୍ଟଙ୍କ ଅନୁମତି ଆଣିବାକୁ ହେବ । ଜେଲ୍ ରୁଟିନ୍ ମାନିବାକୁ ପଡ଼ିବ । ସକାଳ ୬ଟାରେ ଉଠିବେ । ୭ଟାରେ ଜଳଖିଆ ମିଳିବ । ୧୧ଟାରେ ଦିନବେଳା ଖାଇବା ଦିଆଯିବ । ଦିନ ଓ ରାତି ବେଳା ଖାଇବାରେ ରୋଟି, ତରକାରୀ, ଭାତ ଓ ଡାଳି ଦିଆଯିବ । ସନ୍ଧ୍ୟା ୬ଟା ଅନ୍ତେବସୀଙ୍କୁ ଦିଆଯାଏ ରାତି ଖାଇବା । ଅଲଗା ଖାଇବା ଜେଲ୍ କ୍ୟାଣ୍ଟିନରୁ ମଗାଇ ପାରିବେ । ଏଥିପାଇଁ ଟଙ୍କା ମନି ଅର୍ଡର କରିବାକୁ ହେବ ।
ସେପଟେ ଏନସିବି ଅଧିକାରୀଙ୍କ ନିକଟରେ ସତ ମାନିଛନ୍ତି ଆର୍ୟନ୍ । ଚରସ ସେବନ କରୁଥିବା ନେଇ ସ୍ୱୀକାର କରିଛନ୍ତି । ତାଙ୍କ ବନ୍ଧୁ ଅରବାଜ ମର୍ଚାଣ୍ଟ ତାଙ୍କ ଜୋତାରେ ୬ ଗ୍ରାମର ପ୍ୟାକେଟ ଲୁଚାଇ ରଖିଥିଲେ । ଯିଏକି, ସେହି ବିଳାସପୂର୍ଣ୍ଣ କ୍ରୁଜରେ ଯାଉଥିଲେ । ସମୁଦ୍ରରେ କ୍ରୁଜ ପାର୍ଟିରେ ଲିପ୍ତ ଥିଲେ । ପଚରାଉଚରା ବେଳେ ନିଜେ ଉକ୍ତ ଡ୍ରଗ୍ସକୁ ଜୋତା ଭିତରୁ ବାହାର କରି ଏନ୍ସିବିକୁ ଦେଇଥିଲେ । ଏହା ମଧ୍ୟ ସ୍ୱୀକାର କରିଥିଲେ କି, ଯେ ସେ ଆର୍ୟନ୍ ଖାନଙ୍କ ସହ ଚରସ ନେଉଛନ୍ତି । ଏହାସହ ସେମାନେ କ୍ରୁଜରେ ମଧ୍ୟ ନିଶା ସପ୍ଲାଏ କରିବାକୁ ଯୋଜନା କରିଥିଲେ ବୋଲି ଏନସିବି ରିପୋର୍ଟରେ ସ୍ପଷ୍ଟ କରାଯାଇଛି ।
Powered by Froala Editor
