ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀରେ ରାଇଜିଂ ଭାରତ ଶିଖର ସମ୍ମିଳନୀକୁ ସମ୍ବୋଧିତ କରି ୱେଭ୍ସ-୨୦୨୫ ଆୟୋଜନ ସମ୍ପର୍କରେ ସୂଚନା ଦେଇଛନ୍ତି । ଶ୍ରୀ ମୋଦୀ କହିଛନ୍ତି, ଆସନ୍ତା ମାସ ୧ରୁ ୪ ତାରିଖ ପର୍ଯ୍ୟନ୍ତ ମୁମ୍ବାଇରେ ବିଶ୍ୱ ଅଡିଓ ଭିଜୁଆଲ ଏବଂ ମନୋରଞ୍ଜନ ଶିଖର ସମ୍ମିଳନୀ (ୱେଭ୍ସ) -୨୦୨୫ର ଭବ୍ୟ ଆୟୋଜନ କରାଯିବ। ଭବିଷ୍ୟତରେ ଏହି ସମ୍ମିଳନୀ କ୍ରମାଗତ ଭାବେ ଆୟୋଜନ କରିବା ପାଇଁ ଏକ ଦୀର୍ଘସୂତ୍ରୀ ବ୍ୟବସ୍ଥା କରାଯାଉଛି।

ଶ୍ରୀ ମୋଦୀ କହିଛନ୍ତି, ମନୋରଞ୍ଜନ ଆଜି ବିଶ୍ୱର ସବୁଠୁ ବଡ଼ ଉଦ୍ୟୋଗ ପାଲଟିଛି। ଆଗାମୀ ଦିନରେ ଏହାର ଆହୁରି ଅଧିକ ବିସ୍ତାର ହେବ। ଏଭଳି ଏକ ସମୟରେ ଆମେ କଳା ଓ ସଂସ୍କୃତିକୁ ପ୍ରୋତ୍ସାହନ ଦେବା ଏବଂ ପାଳନ କରିବା ଲାଗି ୱେଭ୍ସ -୨୦୨୫ ଆୟୋଜନ କରିବାକୁ ଯାଉଛୁ।

ପ୍ରଧାନମନ୍ତ୍ରୀ ଆହୁରି କହିଛନ୍ତି, ଭାରତରେ ଚଳଚ୍ଚିତ୍ର, ପଡକାଷ୍ଟ, ଗେମିଂ, ସଂଗୀତ, ଏଆର ଏବଂ ଭିଆରର ବହୁତ ଉଜ୍ଜ୍ୱଳ ଏବଂ ସୃଜନଶୀଳ ଅର୍ଥବ୍ୟବସ୍ଥା ରହିଛି । ଆମେ କ୍ରିଏଟ୍‌ ଇନ ଇଣ୍ଡିଆର ମନ୍ତ୍ର ନେଇ ଏହାକୁ ସର୍ବୋଚ୍ଚ ସ୍ତରକୁ ନେଇଯିବା ପାଇଁ ଯୋଜନା କରିଛୁ। ୱେଭ୍ସ-୨୦୨୫ ଭାରତୀୟ କଳାକାରମାନଙ୍କୁ କଣ୍ଟେଣ୍ଟ ପ୍ରସ୍ତୁତ କରିବା ଏବଂ ଏହାକୁ ବିଶ୍ୱସ୍ତରରେ ପହଞ୍ଚାଇବା ଲାଗି ମଞ୍ଚ ଯୋଗାଇ ଦେବ।

ଏଥିସହିତ କ୍ରିଏଟ୍‌ ଇନ୍‌ ଇଣ୍ଡିଆ ସାରା ବିଶ୍ୱର କଳାପ୍ରେମୀମାନଙ୍କୁ ଭାରତକୁ ଆସିବା ଲାଗି ସୁଯୋଗ ମଧ୍ୟ ପ୍ରଦାନ କରିବ। ୱେଭ୍ସ-୨୦୨୫କୁ ଅଧିକରୁ ଅଧିକ ମାତ୍ରାରେ ଲୋକପ୍ରିୟ କରାଇବା ଉପରେ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଥିଲେ।

Powered by Froala Editor